كفريلانسر شغال على مواقع العمل الحر المختلفة لمدة 9 سنين، أدركت إن مهارتك اللي بتشتغل بيها عبارة عن جزء منفصل تماماً عن مهارة الفريلانس نفسها. ومهارة الفريلانس دي هي المهارة اللي بتكتسبها وبتتعلمها علشان تعرف تجيب عميل تشتغل معاه وتتفوق على المنافسة اللي موجودة في السوق.

المهارة دي أنا لحد دلوقتي وبعد 9 سنين بتعلم فيها حاجات جديدة، وبكتشف فيها طرق وتركات كتير ممكن تتعمل وأقدر أطبقها عشان تساعدني أوصل للعملاء بسهولة وأنافس الفريلانسرز اللي بيقدموا نفس الخدمة بتاعتي.

وفي 2024 أنا اشتغلت كتير جداً على عدد كبير من الوظائف بفضل الله ومع عدد كبير من العملاء، وفي المقال ده هقولك خلاصة الدروس اللي اتعلمتها السنة اللي فاتت في 20 نصيحة سريعة لو اتعلمتهم وطبقتهم في 2025 هتبقى فريلانسر أقوى! فتعالى أقولك ايه النصائح دي وتتعلم منهم ايه.

قبل ما تفكر في دوشة وتفاصيل ازاي تجيب العميل وتتفوق على المنافسة في سوق العمل الحر لازم تقرر الأول انت عايز تقدم ايه للعملاء. ومش بس تحدد مهارتك الأساسية اللي هي الجرافيك ديزاين مثلاً لا تحدد الخدمات المتاحة في مجالك كمان. فلو انت جرافيك ديزاينر الخدمات دي هتبقى زي تصميم اللوجوهات أو تصميمات السوشيال ميديا أو صور مصغرة لليوتيوب وهكذا.

ولو انت شاطر كفاية مش هتقف عند النقطة دي. انت هتدور على شكل العملاء اللي انت عايز تشتغل معاهم وتشوف العملاء دول بيطلبوا ايه. فتضيفه وسط الخدمات اللي انت حابب تقدمها للعملاء.

ولو انت لسه مبتدئ في المجال تقدر تشتغل بمهاراتك كمبتدئ عادي لإن بعض العملاء احياناً بيطلبوا وظائف بسيطة مش محتاجة خبرة ومهارة كبيرة قصاد سعر رمزي للوظيفة، فمتسوّفش في إنك تبدأ شغل كفريلانسر مهما كانت خبرتك.

وانت بتكتب الــ Proposal للعميل وبتقدم على الوظيفة اللي هو منزلها مهم جداً تكون عارف إنك بتكتب البروبوزال مخصوص للوظيفة دي بس، مش تمبلت بتكتبه وتقدم بيه لكل الوظائف.

فلما تبقى بتكتب بروبوزال لوظيفة محددة هتدرس كويس العميل طالب ايه للوظيفة دي، وايه المشاكل اللي بيواجهها وطالب فريلانسر يساعده في حلها. وبعد ما تدرس التفاصيل دي هتعرف انت ايه المقوّمات اللي عندك تخليك فعلاً مناسب للوظيفة وتقول للعميل عليها.

فمثلاً أنا طبيب خريج كلية الطب البشري، وبشتغل فريلانسر في مجال إدارة قنوات اليوتيوب. فأوقات بلاقي وظائف العميل عايز حد يدير له قناة اليوتيوب بتاعته اللي محتواها طبي. فبستغل الفرصة أقصى استغلال واقول للعميل اني طبيب بالفعل وهقدر اساعده في المحتوى نفسه وهبقى متفهم المصطلحات الطبية والجمهور المستهدف وهكذا.

انت كمان هتلاقي اللحظات اللي زي دي اللي لازم تستغلها جداً، وتقول للعميل عن مهاراتك في مجال معين، أو تعرَفه شيء مميز عندك يخليك الفريلانسر المناسب للوظيفة دي فعلاً.

ولو محتاج تعرف إزاي تكتب بروبوزال قوي تطبق فيه الكلام ده ويزود نسب قبولك في الوظائف فتقدر تشوف الفيديو ده وهتعرف إزاي بالتفصيل: دليلك الشامل لكتابة عرض عمل علي مواقع العمل الحر

من عيوب الفريلانس إن المنافسة فيه شديدة جداً، بس من مميزاته إنك حر!

بتختار المجال اللي انت عايز تدرسه براحتك، وبتتخصص فيه في الحتة اللي تريحك. ودي ميزة لو استغلتها صح المنافسة حواليك هتقل وسعرك هيبقى أعلى.

تخيل معايا كده في كام كاتب مقالات في السوق؟ عدد كبير جداً. بس في كام كاتب مقالات لمحتوى طبي بس؟ أكيد أقل كتير، واكيد بيبقى أشطر في كتابة المقالات الطبية من أي كاتب مقالات عادي، فمعنى كده إن فلوسه بتبقى أكتر. فانت كمان محتاج تختار الحته بتاعتك علشان تقلل المنافسة وتزود سعرك!

عارف إيه أهم حاجة فى الأكونت بتاعك؟ البورتفوليو. مهما كان الأكونت بتاعك مُبهر ومفيش منه اتنين لو البورتفوليو مش قوي أو فيه شوية شغل قديم ليك أي كلام عمرك ماهتعرف تشد العميل ليك.

لإن ببساطة العميل صارف فلوس علشان ياخد منك خدمة محددة، فايه يخليه يثق فيك وهو شايف شغلك السابق مش حلو أو انت عارضه بشكل مش كويس؟

انت محتاج تهتم بالبورتفوليو بتاعك جداً، وتديله أقصى درجات اهتمامك لإنه النقطة الفاصلة اللي بتحدد للعميل هو يقبلك ولا لا. ولو انت شاطر كفاية تحدث البورتفوليو بتاعك مرة شهرياً عالأقل بأفضل الأعمال ليك. وتضيف فيه نتائج أعمالك دي ونسب المشاهدة للشغل ده والأرقام اللي العميل بيدور عليها مش الشغل بس.

مش كل العملاء موجودين على مواقع العمل الحر بس، في ناس موجودة على الفيسبوك في جروبات المهارة اللي انت بتشتغلها، وبينزلوا فرص شغل أو بيصطادوا الناس اللي معجبين بشغلهم ويكلموهم. وفي منهم موجودين على لينكد إن وبيدورا في شكل وظائف فعلاً والناس بتروح تقدم هناك وهكذا.

وأغلب مواقع السوشيال ميديا  لو ركزت معاها بشكل أو بآخر هتلاقي دايماً في عملاء هناك. فمهم جداً تعرف نوع العملاء اللي بتدور عليهم ممكن يبقوا موجودين فين وتروح تصطادهم وتبان قدامهم.

ظهورك كفريلانسر للناس مهم جداً لإن ده بيساعد العملاء يتعرفوا عليك ويدخلوا يطلبوك في شغل من غير ما انت تدور عليهم. وده بالظبط اللي بيحصلي بالفعل وبلاقي العملاء بيكلموني بعد ما بيشوفوا قناة اليوتيوب بتاعتي وظهوري على السوشيال ميديا ويقولولي إنهم عايزني اشتغل معاهم.

بس هل الـ Personal Branding ظهور على السوشيال ميديا بس؟ لا الـ Personal Branding ليه طريقين. الأول هو الخاص بالسوشيال ميديا والتاني هو الظهور وسط دايرة معارفك.

في جزء ظهورك على السوشيال ميديا تقدر تعمل محتوى وتقدمه وتعرض مهاراتك وخبراتك للناس. بس في الجزء التانى والأهم ظهورك وسط دايرة معارفك وإن الناس اللي حواليك تبقى عارفة بالظبط انت بتعمل ايه ده شيء مهم جدا. ومتستهونش بدايرة المعارف دي ابداً لإنها ماشية بمبدأ “أنا اعرف حد بيعمل ده” وهتلاقي بيجيلك لحد عندك عميل واتنين وتلاتة!

بما إنك قررت تشتغل فريلانسر فانت لازم تعرف إنك هتقوم بمهام الشركة كلها بداية من تنظيم يومك ووقتك، وتنظيم الاجتماعات اللي بينك وبين العملاء، وتنظيم شغلك نفسه.

فانت بلا شك محتاج مساعدين يكونوا ايدك اليمين من اول ما تصحى من النوم لحد ما تنام تاني، أدوات هتساعدك تكتب النوتس بتاعتك صح، تدير أموالك، تنظم وقتك، وتسهل على نفسك الشغل اللي بتعمله كل يوم.

وبعض الأدوات دي ليها اشتراكات بفلوس، فلو في أدوات مهمة جداً في يومك وليها وظيفة لا يمكن يومك يكمل من غيرها فانت محتاج تستثمر فيها وتدفع فلوس الاشتراك. اصل ليه لا؟  سهلها على نفسك وهتلاقي النتيجة في الآخر.

قبل ما تحدد سعرك هتحتاج تشوف أسعار السوق إيه وتعمل سيرش كويس جداً يعرّفك انت المفروض تتحرك في أنهي مساحة أسعار، وهو ده الفاصل اللي هيساعدك تحدد تسعيرة خدمتك.

ولإن مفيش مقياس ثابت يحدد انت المفروض تاخد كام، السعر ليه عوامل كتير بتتجمع سوا وبتشكل الرقم اللي بيظهر في الآخر ده، زي:

• خبرتك 
• الطلب على مهارتك في السوق
• مجال شغلك
• مدة المشروع
• مدى سهولة أو صعوبة المشروع
• الوقت المطلوب للتسليم

وطرق تحديد سعرك مع العميل بتختلف من مشروع للتاني، أو من موقع عمل حر للتاني. فتقدر تحدد تسعيرتك بأكتر من شكل منهم التسعير بالساعة، أو تحدد سعر المشروع بالكامل مع العميل في البداية.

في عالم الفريلانس أغلب شغلك ماشي بالحب، يعني مرة هتلاقي عميل سلس وسهل وموافق على اللي بتعمله، ومرة هتلاقي عميل صعب وشديد وبيُقفلك عالواحدة، ومرة هتلاقي عميل فلوسه حلوة، ومرة هتلاقي عميل بيقطع من جلده.

وتتعلم من ده إنك لازم تبقى سلس وقادر تريح العميل بالشكل اللي ميتضاربش مع حقوقك. أوقات هتقدم تنازلات؟ اه عادي، بس أوقات ربنا هيكرمك بأكتر من اللي انت طالبه. فكل القصة انك متنشفش دماغك على حاجات معينة، لا اتعلم ازاي تاخد وتدي مع العميل.

دايماً بقول جملة كده في فيديوهاتي وهي “العميل مش ابن خالتك” يعني لو في أي وقت حصلك ظرف خلاك تأخر الشغل أو تخالف وعودك معاه هو من حقه يقولك أنا مليش دعوة أنا عايز الشغل!

فلو انت عارف إنك ممكن تتأخر في الشغل لسبب ما، أو قلقان يحصل ظرف يخليك تأخر الشغل، أو مش قادر تحدد اوي الشغل هياخد وقت قد ايه فحط دايماً وقت كافي وزيادة ليك علشان لو حصل مشاكل فتبقى انت لسه في السليم.

وبلاش الحماس الزايد ياخدك وتقول للعميل وقت تسليم صغير أوي عشان تكسبه. بس لو اديته وقت طويل وسلمتله قبل الديدلاين فانت هتبقى كسبته بجد.

طريقة تواصلك مع العميل هي سر نجاح أو فشل المشروع اللي انت شغال عليه مع العميل. والتواصل ده بيقلل مشاكل كتير ممكن تحصل علشان كل واحد فيكم فاكر إن التاني فاهم قصده.

وانت لازم تعرف إن العميل ده إنسان مش روبوت، يعني عنده مشاعر وأفكار زيك مش مجرد حد طالب خدمة هتعملهاله وتجري. فالتواصل بينكم مهم، وطريقتك ممكن تكون سبب إن العميل يختار يشتغل معاك مرة واتنين وألف، أو يقرر ميشتغلش معاك تاني حتى لو كنت آخر واحد قدامه في الدنيا. 

الشغل في مجال العمل الحر ملوش أي قيود بس علشان نحاول نحسن الوضع ونضمن حقوق العميل وحقوق الفريلانسر بنمضي عقد قبل بداية الشغل. ونصيحة من فريلانسر زيك متشتغلش أبداً من غير العقد ده لإنه هيغنيك عن مشاكل كتير ممكن تحصل مع العميل وهيطمنك إن العميل مش هيطلع نصاب في الآخر.

ايه اللي بيتكتب في العقد؟

• نبذة عن المشروع وايه الخدمة المطلوب منك تقدمها 
• معاد التسليم 
• سعر الشغل وهتستلم الفلوس امتى وهل مرة واحدة ولا على دفعات
• عدد التعديلات المسموحة للعميل
• ازاي هتتواصل مع العميل خلال فترة المشروع 
• ريفرنس العميل هيبعتهولك شبيه للي هو طالبه منك عشان تقدمله زيه

كتبت العقد والعميل مضى؟ ابدأ شغل وانت مطمن.

على غرار مقولة “العميل دايماً على حق” إحنا بنهتم برضا العميل جداً. لإن مفيش أهم من إنك تخلص المشروع وانت راضي عنه، وإن العميل يستلم المشروع ويدفع الفلوس وهو مبسوط وراضي وحاسس إنك تستاهل كل جنيه هو دفعه.

ولو ركزت على الجوانب الإيجابية التانية هتلاقي مفيش أقوى من إن العميل ده يرشحك لعميل تاني طالب حد يشتغله في مشروع خاص بمجالك! فأسلوبك وشغلك وكل خطواتك مع العميل هتبقى سبب في رضاه عن شغلك أو لا، فاستغل ده كويس.

جربت تتحط في موقف إنك بعد ما تخلص شغل في المشروع بتاع العميل وتبعتهوله يقولك “اييه ده مش ده اللي انا طالبه!”. لو جربت فالله يعينك، لو مجربتش فمتحطش نفسك في الموقف ده.

والغلطة هنا بتبقى سوء تفاهم بينك وبين العميل، وحلها إنك تبعت للعميل أول بأول انت خلصت ايه وتاخد رأيه في اللي خلص وتقوله كده احنا ماشيين تمام؟ بحيث لو وقعتوا في مشكلة في النص يبقى حجمها بسيط وتعديلها مش هياخد منك مجهود لو قارنته بمجهود إعادة المشروع من الأول.

كفريلانسر، بعد ما بتخلص المشروع مع العميل بتستنى الفيدباك على شغلك اللي هيقولك العميل كان راضي عنك وعن الشغل بنسبة قد ايه.

ومن مصلحتك انك تاخد الفيدباك ده علشان تتعرف على نفسك في عيون الآخرين. يمكن عندك ميزة انت متعرفهاش فتستغلها وتبروزها بعد كده، أو عندك عيب انت متعرفهوش وهتحتاج تشتغل عليه فيما بعد.

وخليني أقولك إن تقبُل الفيدباك السلبي مش بالسهولة دي، وبيحتاج تكنيك محدد علشان تعرف ترد عليه وتتعامل معاه ولو عايز تعرف عن الجزء ده أكتر فالمقال ده هيساعدك وهيعرفك ازاي تتعامل مع الفيدباك السلبي: اسم المقال.

من مميزات وعيوب الفريلانس إنك حر. والحرية دي قادرة تخليك اشطر فريلانسر في السوق بس شغال 24 ساعة ومعندكش حياة. وقادرة تخليك عايش حياتك جداً وبتعمل كل اللي نفسك فيه بس بتشتغل قليل جدا ومش قادر تطور نفسك ولا بتلاقي عملاء.

فالتوازن بين شغلك وحياتك مهم جداً، والحل الوحيد علشان تعرف تحقق ده انك تخططله صح. حدد من بداية كل اسبوع مواعيد شغلك ومواعيد راحتك. قرر تلزم نفسك بمدة شغل محددة بس والوقت الباقي بتتطور فيه أو عايش فيه حياتك فيه عادي.

يومك كفريلانسر مش هيتحدد بدايته من نهايته لو منظمتش وقتك فيه. فلو سبتها عايمة كده هتزهق وهتضيع وقت مهول، بس لو نظمتها صح يومياً هتستغل كل دقيقة.

وعلشان تنظم وقتك إنت محتاجة أداة تنظيم للوقت تساعدك في ده وتزُق معاك اليوم والشغل بالطريقة والشكل اللي يريحك، بس المهم تمشي عليها فعلاً. وفي حالتي أنا بستخدم برنامج نوشن اللي مساعدني أنظم حياتي كلها مش وقتي بس.

نظراً إنك بتشتغل فريلانسر ومعندكش دخل مادي ثابت شهرياً فمهم جداً تتابع الفلوس اللي بتدخلك والفلوس اللي بتصرفها علشان تبني خطة مالية كويسة تقدر منها تدفع التزاماتك وتصرف منها وتحوش جزء أو تستثمر. ومع الوقت هتعرف إنت محتاج تقريباً كام شهرياً وتكون مستريح. 

بدخولنا 2025 لاحظنا تطور المجالات كلها بشكل ملحوظ وسريع. فلو انت معندكش القابلية تواكب السوق وتذاكر اللي بيحصل جديد وتعرف تطبقه في شغلك فانت مش هتعرف تنافس الفريلانسرز في السوق.

فعلى سبيل المثال ظهور الـ AI مؤخراً سهل شغل وظائف كتير جداً. لو انت مصمم انك مش بتستخدمه ومش هتستخدمه وفاكر ده ذكاء منك فاللي بيستخدمه صح هيتفوق عليك بلا شك. وده علِمنا إن شطارتك مش بعدد سنين خبرتك ولكن بقابليتك على مواكبة العصر الحالي، وهو ده اللي العميل عايزه.

مفيش فريلانسر بيشتغل كفريلانسر وهو مضايق ومش مبسوط لإن كل الفريلانسرز اختاروا يدخلوا المجال ده بنفسهم مش بالإجبار. عكس اللي بيحصل كتير في الوظائف التقليدية اللي فيها ناس كتير مجبرة تشتغل من 9 لـ 5 يومياً ومفيش حل تاني قصادها.فمعنى إنك اختارت تبقى فريلانسر إنك اكيد مبسوط بقرارك ده بشكل أو بآخر، والدافع ده هيخليك تبقى أفضل وتتطور طول الوقت مهما كان الطريق صعب بس انت تصبر عليه.

صديقي الفريلانسر…

الفريلانس ما هو إلا رحلة فيها الحلو والوحش، السهل والصعب، بس احنا اللي بنكبر الوحش في عينينا أو بنكبر الحلو، ومعنى إنك هنا ووصلت للمرحلة دي فانت اكيد بتحاول علشان تكبر الحلو.

فكمل في الطريق ده ومتستسلم.ن مكانتش رحلة يوم وليلة.

ربنا يوفقك يا صديقي^^