ايه هي مهارة المونتاج؟
عمرك فكرت في اللي بيحصل في نص الرحلة بين تصوير الفيديوهات ووصولها ليك على السوشيال ميديا أو اليوتيوب؟ ببساطة، السر يكمن في مهارة المونتاج!
المونتير هو الشخص المبدع اللي بياخد الفيديوهات المصورة وبيحولها لتحفة فنية. بيضيف لمسات جذابة، تأثيرات بصرية مبهرة، ومشاهد بتشد انتباهك. كمان بيظبط الألوان، الإضاءات، وبيضيف عناصر بصرية تمثل الأفكار والكلام اللي بيتقال في الفيديو. وكمان ممكن يضيف نصوص على الفيديوهات علشان تسهل فهم المحتوى وتوصيله بشكل أفضل.
تخيل لو شوفت فيديو بنفس شكله الأصلي من غير أي مونتاج، أكيد هيكون من أكتر الفيديوهات المملة مهما كان المحتوى قيم ومهم. علشان كده، في عصر بيعتمد بشكل كبير على الفيديوهات والريلز للتسويق والتواصل، المونتير أصبح عنصر أساسي لا يمكن الاستغناء عنه لأي براند أو شركة.
أهمية مهارة المونتاج في سوق العمل الحر
المونتاج بيُعتبر من أكبر وأهم المهارات اللي مطلوبة بشكل كبير في سوق العمل الحر وعبر الإنترنت. الاحصائيات في 2023 وضحت إن الفيديوهات والريلز بتمثل حوالي 86% من إجمالي حركة المرور على الإنترنت، وده بيوضح أد إيه الشركات والماركات بقت مهتمة جدًا بوجود شخص محترف في المونتاج لجذب المتابعين ليهم.
والإحصائيات برضو بتقول إن سوق العمل الحر حتى الآن غير متشبع بمحرري الفيديوهات، فالمونتاج مهارة مطلوبة جداً، والمميز فيها كمان إنها مهارة أجرها عالي جداً خصوصاً مع المحترفين فيها. فكل ما كنت أشطر وأقوى في استخدام الأدوات وعندك نظرة كريتيف، كل ما زادت فرصك في إنك تكون مطلوب من العملاء بشكل مستمر، سواء في العمل الحر أو حتى في الوظائف التقليدية.
برامج المونتاج وكيفية استخدامها
المونتاج بشكل أساسي بتحتاج لجهاز PC أو Laptop تشتغل عليه. في البداية، مش لازم يكون الجهاز امكانياته عالية، لكن كل ما تتطور في المراحل المتقدمة، هتحتاج لجهاز أقوى عشان يستحمل البرامج التقيلة وتسرّع عملية الإنتاج. والمهارة دي تقدر تقدمها ببرامج كتير وكل برنامج ليه مميزاته وعيوبه وتقدر انت تختار الأفضل ليك.
- Adobe Premiere Pro
ده برنامج من أشهر برامج المونتاج على مستوى العالم ويقدر يستخدمه أي مونتير مهما كان مبتدئ لإن التعامل معاه سهل وبسيط وبيوفرلك عدد كبير جدا من الادوات والمميزات.
ولو عايز تعرف ازاي تتعامل مع البرنامج وشرح كامل ومفصل ليه فالفيديو ده هيساعدك جداً
- Davinci Resolve
ده برنامج مجاني من أقوى برامج المونتاج اللي بيساعدك بمميزات وأدوات قوية جداً
ولو عايز تعرف ازاي تتعامل مع البرنامج وشرح كامل ومفصل ليه فالفيديو ده هيساعدك جداً.
- Filmora
وده برنامج من أشهر برامج المونتاج للمبتدئين وبيوفرلك أدوات ومميزات تساعدك للوصول لفيديوهات احترافية
ولو عايز تعرف ازاي تتعامل مع البرنامج وشرح كامل ومفصل ليه فالفيديو ده هيساعدك جداً.
ازاي تبقى مطلوب في مجال تحرير وتعديل الفيديوهات؟
في مجال العمل الحر، الفريلانسرز مطلوبين في كل المستويات سواء مبتدئين أو محترفين، لكن في حالات معينة بيحتاج فيها العملاء لأشخاص مبتدئين علشان ينفذوا تعديلات بسيطة، أو لإنهم بيطلبوا أجور أقل. علشان كده، انت كمبتدئ عندك الفرصة انك تشتغل في سوق العمل الحر، بس علشان تبقى فريلانسر مطلوب في المجال، لازم تركز على النقاط دي:
- اتعلم المهارات الأساسية
قبل ما تبدأ الشغل كمونتير، مهم جدًا إنك تعرف أساسيات مهارة المونتاج زي تحسين الصوت، ضبط الألوان، إضافة المؤثرات البصرية. ومهم جداً تتعلم ازاي تتعامل مع برنامج المونتاج اللي هتشتغل عليه بشكل احترافي. لإن ده هيخليك جاهز تقدم شغل بجودة عالية في أي مشروع. - اعمل بورتفوليو قوي
أول ما تبدأ، لازم تبني بورتفوليو قوي يضم نماذج من أعمالك السابقة. وبما إنك مبتدئ، حاول تبدأ بمشاريع وهمية أو حتى تعديل لفيديوهات شخصية ليك وضيفها للبورتفوليو. ده هيعكس مهاراتك وهيساعد العملاء في انهم يعرفوا مستواك. - سوق لنفسك
حاول تبني شبكة معارف قوية في المجال، واعرض شغلك على السوشيال ميديا، وشارك مشاريعك مع الناس حواليك. علشان تخلّي الناس يعرفوا إنك بدأت تشتغل في مهارة المونتاج وبتقدم خدمات. - طور نفسك بشكل مستمر
المونتاج مش مهارة ثابتة، بل مهارة بتحتاج تتطور فيها باستمرار. كل فترة لازم تراجع مهاراتك وتتعلم مهارات جديد. وحاول تحدد خطة تطوير يومية أو أسبوعية علشان تضمن إنك بتطور فعلاً وتقدر تواكب التطور في المجال. - تابع التغيرات في المجال
بما إن المجال ده بيتطور بسرعة، لازم تتابع التحديثات الجديدة بشكل مستمر. وتدخل الجروبات أو المجتمعات الخاصة بالمجال على السوشيال ميديا. واتفرج على شغل الناس في مجالك، وشارك في النقاشات علشان تعرف أحدث الأساليب والأدوات المستخدمة.
لو ركزت على النقاط دي، هتكون قادر تبني سمعة قوية لنفسك في سوق العمل الحر، وهيبقى عندك فرصة أكبر للنجاح والتفوق وسط المنافسة الشرسة.
ازاي تلاقي فرص عمل في مجال تعديل الفيديوهات؟
مهارة المونتاج وأي مهارة تاني هيمشي عليها كل التفاصيل والمعلومات اللي احنا بنشرحها في خطة تعليم الفريلانس للمبتدئين.
والخطة دي بتعرفك ازاي تختار موقع العمل الحر المناسب ليك، وازاي تعمل اكاونت عليه، وازاي تختار الوظيفة والعميل، وازاي تكتب بروبوزال لحد ما توصل لأول عميل.
فلو اتعلمت المهارة، وجاهز تشتغل بيها فعلاً وجاهز تقدم على أول وظيفة ليك وتكسب أول دولارات ليك منها، فالخطة هي أنسب مساعد ليك في المرحلة دي. في خلال إسبوعين بس أضمنلك يبقى معاك أول عميل على موقع من مواقع العمل الحر، وتقدر تشترك في الخطة بشكل مجاني تماماً من هنا.
مصادر مجانية لتعلم مهارة المونتاج
بعد ما رسمت خطتك وعرفت اكتر عن مهارة المونتاج والبرامج اللي بيتم استخدامها في المجال ده وازاي تشتغل بيها، فده الوقت اللي تاخد فيه أول خطوة بالفعل وتتعلم المهارة نفسها.
مصادر تعلم المونتاج كتير جداً وواسعة جداً وتقدر بشوية سيرش وتدوير بسيط توصل لعدد مهول من الدورات والكورسات اللي هتساعدك في المرحلة دي. ولكني هختصر عليك الطريق بأفضل كورسات وبلاي ليست تقدر تتابعهم وتتعلم منهم كتير جداً كمبتدئ.
- كورس من منصة تعارف لتعلم المونتاج ببرنامج أدوبي بريمير من الصفر
- بلاي ليست صانع المحتوى عمرو عطاالله لتعليم المونتاج ببرنامج أدوبي بريمير
لينك البلاي ليست - قناة صانع المحتوى مصطفى مكرم لتعليم المونتاج
في البداية مش هتحتاج اكتر من كده، ولكن مع الوقت هتلاقي مصادر أكتر بكتير تساعدك تطور من مهاراتك.
الخلاصة
مهارة المونتاج مش مهارة صعبة ولكنها مهارة دسمة، محتاجة منك مجهود في البداية علشان تقدر تشتغل بيها في القريب العاجل، فحط لنفسك خطة واضحة وصريحة من البداية وجدول تمشي عليه بشكل يومي علشان في خلال 3 شهور بالكتير تلاقي أول وظيفة ليك وتكسب من المهارة بشكل فعلي.
وبمساعدة ChatGPT تقدر توصل لأفضل خطة تناسب وقتك وحياتك وتساعدك تحس إنك بتتقدم فعلاً، فاتمنى تكون استفدت من المقال، وبالتوفيق يا صديقي ^^
