الحقيقة أما بدأت اشتغل في مجال العمل الحر مكانش في حد بيساعدني فى ده خالص، وكنت مشتت جدا واخدت وقت طويل عشان أجرب حاجات كتير وأتعلم وأعرف ايه صح وايه غلط، واللي حقيقي كنت بتمناه هو وجود حد مر بالتجربة ديه قبلي يجيبلي الزتونة ومضيعش وقتي في حاجات كتير كانت غلط.
وده بالضبط السبب الأساسي اللي خلاني أكتب المقال ده، وهو ايه أهم 5 نصائح لازم تعرفها في مجال العمل الحر سواء كمبتدأ أو كمحترف؟
1- أهمية كتابة عقود بينك وبين العملاء
السببين الأساسيين ورا كتابة العقود دايما بيكونوا توثيق كل المطلوب منك في المشروع وتحديد مسئولياتك عشان تتجنب أي سوء تفاهم ممكن يحصل بعد كده، وكمان عشان يحدد السعر اللي العميل هيدفعه وطريقة الدفع ومواعيد الدفع ومواعيد استلام المشروع وما إلى ذلك.
بالنسبة ليك كفريلانسر فالعقد هو الشيء اللي يضمن لك حقوقك وبيخلي في ثقة بينك وبين العميل، لإن العملاء دايما بيتعاملوا مع العقود علي إنها مقياس ال professionality وإن ده بيدل على أد ايه تعاملاتك مُنظمة ومُريحة ويساعده يحس بالراحة معاك ويرجعلك دايما في أي تعاملات مشابهة أو أي مشاريع يطلبها بعد كده.
2- قَسم المشروع على مراحل
شغلك كفريلانسر هيجبرك تشتغل على أكتر من مشروع في نفس الوقت، وعلى أد ما تفنيش مشروع كامل على بعضه بيبقى مريح نفسيا عن تقطيعه لكذا جزء بس لو عايز تشتغل صح فهتحتاج تقسم المشروع لمراحل.
وده بيرجع لأسباب كتير، زي إنك هتنظم وقتك بين المشاريع المطلوبة منك كلها في نفس الوقت من غير ما تخلّص واحد تماما وتقصر مع واحد تاني، أو إنك مش هتزهق طول ما انت بتعمل جزء صغير وتسيبه وتكمل بعد فترة، وعدم الزهق ده هيخليك متكروتش حاجات وتقلل نسبة الأخطاء اللي ممكن تعملها في الشغل، وده هيخليك توصل لنتيجة إحترافية أكتر مش بس نتيجة مرضِية.
3- نظم وقتك
رحلتك مع تنظيم وقتك دايما بدايتها بتكون خطوة الإلتزام بمواعيد الشغل وإنك محتاج تعتبر نفسك موظف بالظبط وتصحي في مواعيد ثابتة وتنام في مواعيد ثابتة، هتحتاج تقتنع إنك مدير نفسك ولو سبت نفسك لأوقات اما تكون كويس وليك مزاج ونايم كويس والحاجات ديه هتلاقي غصب عنك إنتاجيتك بتقل ومش بتشتغل عدد ساعات كفاية تغطي احتياجاتك المادية والمعنوية.
عَود نفسك تكتب كل فترة ايه المسئوليات المطلوبة منك الفترة ديه وايه المشاريع اللي شغال عليها، كمان اتعود تكتب يوميا كل اللي محتاج تخلصه خلال اليوم وتصمم تخلصه فعلا لإن ده هيساعدك تنجز وتبقى منظم أكتر.
4- حدد اسعارك بذكاء
طريقة تسعير شغلك بتعتمد على حاجات كتير جدا أهمهم هو مجالك، لأن مجالك بيساعدك تعرف انت تقدر تحدد أسعارك بالساعة ولا باليوم ولا بالمشروع ولا بالكلمة حتى.
بس عشان تبقى شاطر في تسعيرتك لازم تحط لنفسك قواعد تمشي عليها، زي إنك تبقى عارف انك مش بتشغل ببلاش لأي سبب، وإن اسعارك ثابتة دايما مش بتقِل إلا لو عميل هياخد منك شغل كتير جدا مثلا فعشان تجر رجليه لشغل أكتر هتقلله السعر او لو انت متأكد انك هتكسب عميل جديد وتاخده تحت جناحك لفترة طويلة بعد كده.
فلازم تعرف دايما إن شطارتك هتكمُن في ثقتك بإنك انت اللي بتحدد قيمتك وقيمة مشروع مش العميل.
5- تطور من نفسك بإستمرار
وحقيقي رحلة التطوير من النفس ديه أساسية جدا طول فترة شغلك لأنها السبب الوحيد اللي هيأهلك تتنقل من شخص مبتدأ لشخص بروفيشنال في مجاله وتبقى مطلوب دايما والعين عليك.
كمان شغلك كفريلانسر جوا سوق العمل الحر مختلف جدا عن كونك موظف، لإن محدش مجبر يشغَلك طول ما هو شايفك مش كفايه أو مش مؤهل للمطلوب فهتحتاج ديما تطور من نفسك عشان تفضل دايما وسط باقي المنافسين.
والأهم من ده هو تطور العصر اللي احنا عايشينه بإستمرار ومع كل ثانيه، فتطويرك من نفسك بيأهلك تواكب التغيير ده وتعرف دايما سوق العمل بيطلب ايه عشان تقدر تحققه.
الخلاصة
وديه كانت أهم النصائح اللي حقيقي كانت هتفرق معايا شخصيا من 8 سنين فاتوا واللي يشهد بأهميتها جميع مواقع ومنصات العمل الحر، وبالتوفيق لجميع أصدقائي في جميع مجالات العمل الحر.
