ليه عايز تكون فريلانسر؟ التفكير في السؤال ده بيحتاج وقت وقعدة مُطولة عشان تقدر تدرس عيوب ومميزات العمل الحر بشكل كويس وتقدر تحدد هل فعلاً انت حابب تدخل المجال ده ولا لا. 

طب أخدت القرار واتأكدت إن مميزاته بالنسبالك أكتر بكتير من عيوبه، وشايف إنك هتزود دَخلك بشكل ملحوظ وهتطور نفسك دايما ومتحمس تشتغل بنفسك لنفسك وتبعد تماماً عن الشغل التقليدي في الشركات، وفي نفس الوقت مقَدر فكرة انك هتتخلى عن حاجات كتير وأولهم الإستقرار المادي ومستعد تبدأ المغامرة ديه. 

ايه الخطوة اللي بعد كده؟

الخطوة التانية بعد التأكد من إنك خدت القرار الصح، هو انك تبدأ تشتغل كفريلانسر بالفعل! 

ولإن الخطوة الأولى دايما بتبقي الأصعب، فده دليلك الكامل عشان تكون فريلانسر في 7 خطوات بس. 

1- حدد مجال شغلك واتطور فيه

واحدة من مميزات العمل الحر هو انك بتختار فعلاً انت حابب تشتغل ايه وحابب تحترف أنهي مجال بالظبط وتبدأ شغل فيه ومظنش هتلاقي أبداً فريلانسر بيشتغل حاجة مش بيحبها، ونتيجة لشغلك في الحاجة اللي بتحبها هتلاقي نفسك بتديها كل وقتك ومستعد تتطور وتبدع فيها.

لو انت عندك مهارة معينة انت حاببها فعلاً وناوي تكمل فيها فتقدر تعمل ده بكل راحة وتكون مبسوط وانت بتعملها، بس الهدف الأساسي هيكون انك تستمر في تطوير نفسك في المجال ده لإن التطوير هو اللي هيساعدك تكبر في مجالك وتشتغل أكتر وتحقق إنجازات وعائد مادي أكبر، وعشان توصل لده تقدر تشوف مقال إزاي أطور المهارة اللي بشتغل بيها Freelancer.

لو انت بقى معندكش مهارة أو مشتت بين كذا مجال فكل اللي محتاج تعمله هو انك تختار المجال المناسب ليك الأول وتقدر تعرفه من دليلك لتحديد مجال احترافك كفريلانسر وسط سوق العمل الحر وبعدها تعرف الخطوات الأولى في ازاي تبدأ في المجال أو المهارة ديه عن 

طريق مقال إزاي أتعلم مهارة من الصفر.

2-اعمل بورتفوليو

البورتفوليو هو معرض لبعض أعمالك السابقة اللي قدمتها في المجال اللي انت متخصص فيه، وبيعرض كل التفاصيل عن أحسن مشاريع انت اشتغلت فيها، وده النقطة الأساسية اللي أي عميل بيفكر على أساسها يشغلّك معاه أو لا، لإن البورتفوليو بيعرض مهاراتك ومستواك في المجال اللي انت بتشتغل فيه ونظراً للمواصفات والمشاريع ديه العميل بيحدد على أساسها هو شايفك مناسب أو لا للمشروع اللي هو طالبه، وهل خبرتك ديه هتحققله النتائج المطلوبة ولا لا. 

لو لسه بادئ جديد في المجال ده ومقدمتش أي أعمال سابقة تقدر تعمل مشاريع وهمية وتضيفها عندك في البورتفوليو الخاص بيك، أو تعرض انك تقدم شغل لمعارفك أو لأشخاص حواليك بشكل تطوعي عشان تقدر تحط المشاريع اللي قدمتها ديه في البورتفوليو بتاعك وتقدمه للعملاء وقت ما يطلبوه منك، ونظراً إن البورتفوليو بيعكس مهاراتك ومستواك والخبرة اللي عندك فأنت محتاج تكون دقيق جداً في اختيار المشاريع اللي هتقدمها فيه لأنها هتكون سبب كافي في انك تكون موضع قبول ورفض للعميل. 

3- حدد أسعارك

تحديد الأسعار هو موضوع شائك جداً وبيختلف بين كل مجال والتاني لإن في مجالات أسعارها بتتحدد بالكلمة زي مجالات الكتابة وفي مجالات أسعارها بتتحدد بالثانية زي المجالات الخاصة بالفيديوهات وما إلى ذلك، بس مشكلة الأسعار في مجال العمل الحر هي إن صعب على شخص يوزن بين السعر اللي يستحقه والسعر اللي العميل هيدفعه. 

عشان تحدد سعرك هتسأل كتير حواليك في المجال اللي انت شغال فيه وتعرف الناس حواليك بيسعروا شغلهم ازاي، وازاي خبرتهم واحترافيتهم بتأثر في زيادة أسعارهم نتيجة لجودة الخدمة اللي بيقدموها، وعشان توصل لسعرك المناسب هتعمل تيست لكل الأسعار اللي انت متردد فيها وتجرب نتيجة ده مع كل عميل وازاي العملاء بيتفاعلوا معاك أما يعرفوا الأسعار ديه وهل انت مزودها أوي ولا مقللها أوي، وبعد فترة محددة هتبدأ تفهم الدنيا ماشية ازاي وتعرف فعلاً السعر المناسب ليك. 

عشان تخلي السعر المناسب ليك ده السعر المناسب للسوق حواليك برضو، هتقيسها على أساس الكواليتي اللي بتقدمها بحيث تكون الكواليتي اللي بتقدمها سعرها أقل بنسبة صغيرة عن سعر نفس الكوالتي اللي السوق بيقدمه، ولما تعمل ده هتلاقي العملاء بينجذبوا ليك أكتر وبيتعاملوا معاك بشكل مميز لإنك بتجاملهم وبتقدملهم خدمة بسعر أقل من اللي موجود في السوق، ومش بس كده دا العملاء دول بعد ما يشتغلوا معاك ويرتاحولك هيبدأوا يرشحوك لعملاء وشركات تانية وده هيخلي الشغل اللي معاك يكتر وتبدأ تثبِت نفسك في سوق العمل الحر

4- خلى عندك علاقات دايما

العلاقات في عالم العمل الحر هي أحد أهم وأكبر الأسباب اللي هتساعدك تكبر، لإن العميل أما يستريح معاك هيشتغل معاك انت دايما، والعميل اللي بيشتغل معاك دايما هيرشحك لعملاء تانين، وعلاقاتك مع الفريلانسرز اللي زيك هتديك خبرة تجيب بيها عملاء، وصحابك لما تيجي الفرصة قدامهم هيرشحوك لناس تانية محتاجاك، ديه الدورة اللي حياتك هتمشي بيها بعد كده، علاقات أكتر يعني شغل أكتر! 

والشغل اللي هيجيلك من ورا دايرة علاقاتك ممكن يصادف ويبقي فيه فرصة عظيمة توصلك لحتة تانية خالص، عشان كده مهم تكون شخص اجتماعي وتِعرف ناس كتير في حياتك وتكون على تواصل معاهم بشكل مستمر، ومهم جداً تعَرف كل الناس اللي في حياتك زي إخواتك وأهلك وأصحابك انت مين وبتقدم ايه وايه الشغل اللي بتشتغله عشان لما يكون قدامهم فرص مناسباك في وقت من الأوقات يقدروا يوصلوك بيها. 

5- دور على عملاء أكتر

العلاقات هتساعدك توصل لشغل وفرص كتير بس متقدرش تعتمد عليها في شغلك كفريلانسر، لازم انت تبدأ تسوق لنفسك وتدور على عملاء ومشاريع عشان تشتغل وده مش هيحصل غير لو بدأت تحط لنفسك خطة تجاوبك على “إزاي أوصل لأكبر عدد من العملاء عشان يبقى قدامي فرص شغل كتير؟”

عشان توصل لعملاء أكتر فلازم تعرف إن 90% منهم موجود في مكانين:

• على مواقع العمل الحر زي Upwork و Fiverr و مستقل، وخمسات وغيرهم كتير، وديه مواقع بتساعد بشكل كبير على الربط بين العملاء والفريلانسرز بحيث يقدروا يتواصلوا مع بعض ويقدروا يشتغلوا على خدمات ومشاريع سوا، وقصاد العملية ديه الموقع بياخد عمولة مادية بسيطة
• على السوشيال ميديا، وده بيضمن الجروبات الكبيرة اللي بتضم تجمعات العملاء والفريلانسرز في مجال معين أو تحت أي مسمى زي تجمعات عملاء وفريلانسرز موقع خمسات، السوشيال ميديا كمان بتضم عرضك لشغلك على جميع منصات التواصل الاجتماعي وتقول انت بتشتغل فين وبتشتغل في إيه عشان ده ممكن يكون السبب في إن عميل يدخل يكلمك مخصوص. 

6- اعتبر نفسك شركة مش شخص

نظراً إنك أنت المسئول عن كل خطوات شغلك من البداية للنهاية زي جذب العملاء وكتابة بروبوزال وتسويق لنفسك والتعامل مع العملاء وتقديم الخدمة وما إلى ذلك، فأنت تُعتبر بزنس متكامل مش شخص، وعشان تنجح ككُل فأنت لازم تنجح في كل خطوة من دول.

وعشان العميل لما يجي يتعامل معاك هيثق في بزنس أكتر ما هيثق في شخص، وعشان تحقق ده فممكن تعمل لنفسك لوجو أو تتعلم إزاي تقدم البروبوزال والبورتفوليو بتوعك بشكل محترف اكنك شركة أو تعمل لنفسك بيدچ على السوشيال ميديا أو ويبسايت، وبعدها تقدر 

تعرّف نفسك كمؤسس البراند أو البزنس ده. 

7- اتعلم ازاي تنظم حياتك وتنضبط في شغلك

نظراً للتغيير المفاجئ بين شغلك في مكان فيه قواعد ومواعيد والتزامات وبين شغلك لوحدك بالوقت والمواعيد والطريقة اللي تريحك فهتلاحظ فرق كبير جداً في التزامك بشغلك وبمواعيدك.

عشان كده اول خطوة هتعملها هي انك تتعلم الإلتزام، حط لنفسك مواعيد شغل أكنك موظف عادي والتزم بيها، اتعود متزودش ساعات راحتك أو ساعات نومك عن المطلوب بحجة انك هتقدر تعوض الفرق ده يوم تاني، واعرف أهمية انضباطك ده على كمية الفلوس اللي هتقدر توفرها لنفسك.

عشان تتعلم الإنضباط الذاتي هتحتاج وقت طويل عشان تتأقلم معاه وتحوله لروتين يومي لإنه مش مفتاح تقدر تفتحه وتقفله في أي وقت لا انت لازم تتعود عليه، هيبقي صعب جداً في البداية ومُرهق وهتحس انك بتيجي على نفسك كتير وعلى راحتك، بس دا الحل الأساسي والوحيد اللي هيضمنلك انك تقدم نتيجة فعلاً وتحوّل إنتاجيتك كفريلانسر لأضعاف إنتاجيتك كموظف عادي. 

صورة من صور الالتزام هو انك متحسش انك فالبيت فتصحى تشتغل وانت على السرير أو قدام التلفزيون أو في المكان اللي بيوفرلك إحساس الراحة أو النوم، لا خصص مكان للشغل لوحده وأقعد على المكتب قدام اللابتوب أو الكمبيوتر وانت بتدي نفسك الإحساس بتاع “أنا رايح الشغل”، وابدأ أكتب لنفسك أهداف كل يوم عشان تحققها وتحس نفسك في مود الشغل فعلاً. 

الخلاصة

بعد كل الخطوات ديه تقدر وانت مغمض عينك تبدأ وتشتغل كفريلانسر من غير ما تحس انك مُشتت أو إن في خطوة كانت المفروض تتعمل وانت معملتهاش، كبداية ده كل اللي انت محتاجه ومع الوقت هتفهم البيئة اللي حواليك أكتر وتقدر تحدد من نفسك الخطوات اللي انت محتاج تاخدها والخطوات اللي هتحتاج تكررها عشان تكبر وتتطور أكتر.