موقع خمسات هو من أشهر مواقع العمل الحر علي مستوي الوطن العربي, من خلاله بيتم شراء وبيع الخدمات المصغرة بصورة يومية, وعليه فرص عمل كتير متاحة. فلو عندك أي مهارة مطلوبة فى سوق العمل, فممكن تعرضها علي موقع خمسات, وهتلاقي فى مئات العملا يوميا اللي بيبحثوا عن حد يقدر يعمل المهارة دي ليهم بمقابل مادي يبدأ من 5 دولار, وممكن يوصل لأكتر من 150 دولار فى الخدمة الواحدة.

وإتقانك لموقع خمسات هيفتحلك فرص كتير لشغل يومي بإذن الله عليه, وده لأنه في طريقتين مختلفتين عشان العميل يوصلك علي الموقع.

• عن طريق أنك تنزل خدمة والعميل يبحث عنها بنفسه, فتظهر خدمتك ضمن الخدمات المرشحة من موقع خمسات, فيختارها العميل ويبدأ يتواصل معاك وتبدأوا الشغل سوا.
• عن طريق أنك بنفسك تروح للعملا عن طريق قايمة “طلبات الخدمات الغير موجودة” وتبص علي الطلبات اللي نازلة فى اللحظة الحالية, وبعدها تقدم أنت علي الوظيفة المناسبة ليك, ولو العميل عجبه عرضم, فوقتها بتتفقوا علي التفاصيل وتشتغلوا سوا.

لما بتبدأ تضيف خدمة جديدة ليك, فوقتها خمسات مش بتظهرها علطول, وبتقولك أنه هيتم مراجعتها من خلال التيم المخصص معاهم, ولو فيها أي مشكلة, فهيبعتولك إشعار فيه التفاصيل اللي رفضوا الخدمة عشانها, وهيقولوك أنك تقوم بتعديل الخدمة, وترجع تقدمها تاني عشان يراجعوها من الأول.

وهتلاقي الإشعار بيظهر زي كده بالظبط: “للأسف لم يتم قبول خدمتك, يرجي زيارة صفحة الخدمة للإطلاع علي التعديلات المطلوبة لنشرها”.

وده معناه أن الخدمة مخالفة لشروط الموقع, ولازم تعدلها وترجعلهم تاني.

وبما أن مش دايما أسباب الرفض بتكون واضحة من موقع خمسات, فأحنا هنشوف أشهر الأسباب اللي الموقع نفسه كان بيتكلم عنها, واللي هي تعتبر مخالفة لشروط وسياسات موقع خمسات. وتقدر تشوف شروط الأستخدام للموقع كامل لو ضغطت علي الكلمة دي من هنا.

وهنا هنكتب أشهر الأسباب لرفض خدمتك علي خمسات, وشرح جنب كل سبب فيهم:

• أن تكون الخدمة غير محددة: مثلا أنت قايل أنك هتكتب مقال كامل للعميل, بس مش محدد المقال ده هيبقي تقريبا كام كلمة؟ فكده بالنسبالهم الخدمة مش كاملة ومش واضحة. فلازم تكون خدمتك واضحة وصريحة.

• الخدمة مكتوبة بلغة غير اللغة العربية الفصحي: ودي من أشهر أسباب رفض الخدمات, أن أحيانا ممكن تكون خدمتك أنت ضايف فيها كلام بلغة أجنبية, أو كاتبها بلغة عامية لبلدك, ففي الحالة دي خمسات هترفض الخدمة لأنها مش باللغة العربية الفصحي. فخليك حريص أنك تراجع ده.

• الخدمة فيها عروض ترويجية مبالغة: مثلا كاتب فى العنوان أو الوصف “أفضل خدمة, عرض حصري, ألحق قبل نفاذ الكمية (هزار ^^) أو أي حاجة فيها مبالغة زي دي. فخليك كاتب خدمتك عادي جدا بدون أي مبالغة.
• أشتراط أن البائع يكلمك قبل طلب الخدمة: بعض الناس بتشترط أن البائع يتواصل معاهم أولا قبل طلب الخدمة, والحكاية دي خمسات بترفضها, لأن هما بالنسبالهم لازم تكون الخدمة واضحة تفاصيلها, والعميل ليه حرية الأختيار يتواصل معاك قبلها ولا لأ.

• الخدمة تحتوي علي وسائل تواصل خارجية: دي طبعا حاجة هتترفض تماما, بل ممكن تؤدي لغلق حسابك كامل, لأن كده أنت بتاخد العميل بره موقع خمسات وبتتحايل عليه, فدي مرفوضة تماما.

• لا يوجد أمثلة ونماذج عمل سابقة مرفوقة: لازم عشان تنزل خدمة علي خمسات, يكون فى أمثلة بتعرضها لشغلك أنت, وتكون الأمثلة واضحة وبجودة عالية, يعني لو صورة مثلا لتصميم أنت عملته, وكانت جودته ضعيفة, فخمسات هترفض ده. ولازم تكون الصور أصلية, مش واخدها من أي مكان تاني, تكون أنت اللي مصممها بنفسك, وإلا فخمسات هترفض ده.

اللي فوق دي كانت أسباب رفض خدمات عادية علي خمسات. أنما في خدمات أصلا خمسات مش بتوافق عليها أنها تنزل علي موقعها, فبالتالي هتترفض تماما من البداية, ومنها:

• خدمات سياسية أو طائفية أو مخالفة لتعاليم الإسلام: أي حاجة من دول, فخمسات هترفضهم تماما, ودي من الشروط الواضحة والصريحة عندهم.

• خدمات تقديم فتوي شرعية: دي طبعا ليها أماكنها وأهل العلم, وخمسات رافضة وجود ده علي موقعها, ودي حاجة تٌحترم منهم, عشان يفضل مكان ده ليه أهل العلم, وأماكنهم الموثوقة معروفة.

• خدمات طبية: لو عاوز خدمة طبية, يبقي تروح لطبيب أو أهل العلم فى مكانهم المعروف, وليهم مواقع عادي, بس مش موقع خمسات لأنها بالنسبالهم ممكن الاستشارة تتسبب بضرر صحي, وده يسيئ ليهم.

• خدمات الفوركس والتسويق بالعمولة: الخدمات دي كلها مرفوضة عند خمسات, وأكتر من حد كان بيسأل علي سبب رفض خدمته وكانت فى الآخر تبع التسويق بالعمولة.

• خدمات تسويق إلكتروني بطرق غير شرعية: لو كانت الطريقة اللي بتسوّق بيها للعملا غير شرعية, وبتحتال علي العميل وتزوّر نتايج ليه, فخمسات بترفض ده تماما, وحتي لو خدمتك اتقبلت دلوقتي وراجعوها تاني بعدين, فهتتقفل علطول.

• خدمات ليست واضحة: اللي هي خدمة تقراها متبقاش فاهم هو البائع هيقدم أيه بالظبط؟ ولا أيه نوع الخدمة دي, مادام خدمة مش صريحة وواضحة, فخمسات هترفضها.

• تقديم خدمة إعداد أبحاث للطلبة ومساعدتهم فى حل امتحاناتهم الدراسي: دي مرفوضة من خمسات, لأنها بتضيع جهد ناس وتعتبر من الغش, وهما شكرا ليهم رافضين ده.

دي كانت أسباب رفض خدماتك علي موقع خمسات. ولو حابب تنطلق علي موقع خمسات وتوصل لأول عميل من البداية خالص بإذن الله. فأحنا في Freelanzwya كنا بدأنا سلسلة شرح موقع خمسات بطريقة عملية وبسيطة. هناخدكم فيهما من بداية أننا هنعمل أكونت جديد علي الموقع, ولحد ما نجيب أول عميل ونستلم فلوسنا سوا بإذن الله. هتقدروا تلاقوا السلسلة علي اليوتيوب علي قناة د.أحمد السباعي. وهو مؤسس موقع Freelanzwya بالفعل, وعنده خبره أكتر من 8 سنين فى مجال العمل الحر فى أشهر المواقع.

هتقدر تلاقي السلسلة كاملة علي قناتنا علي اليوتيوب.

وده أول فيديو فى السلسلة لو حابب تتفرج عليه عشان تعرف هتتعلم ايه فى السلسلة دي.