عشان تتأكد إنك ماشي في الطريق الصح وتوصل للهدف اللي بتتمناه، بتلاقي نفسك تلقائياً بتشوف الناس اللي وصلت لهدفك ده وصلوله إزاي، وإيه الأخطاء اللي وقعوا فيها وتحاول تتجنبها، وايه شكل شغلهم بعد ما وصلوا للمرحلة ديه عشان تحاول توصله وتختصر على نفسك الطريق.

كفريلانسر الحاجتين اللي تقدر تتعلمهم من الفريلانسرز التانيين هما مهاراتهم في المجال اللي شغالين فيه، ومهارة العمل الحر اللي بتتضمن تسويقهم لنفسهم وجذب العميل للشغل معاهم. أول نقطة بتتطلب منك تطور من نفسك وتسأل على الكورسات أو الكتب أو الحاجات اللي هتساعدك تكبر في مجالك وديه مش النقطة اللي تهمنا أوي، النقطة المهمة حاليا هي النقطة التانية وهنخص فيها بالذات شكل البروفايل بتاعك على موقع Upwork.

شكل البروفايل بتاعك على مواقع العمل الحر هو اللي بيحدد من الأول الموقع يقبلك ولا لا، وبعد ما الموقع يقبلك شكل البروفايل ده هو اللي بيحدد العميل نفسه يقبلك ولا لا، لإنه بيضم كل التفاصيل اللي بتقول للعميل انت الشخص المناسب ليه ولا لا، فيه اسمك ومجالك وتعريف عنك وفيديو ليك واسعارك والريت بتاعك والفيدباك والبورتفوليو بتاعك وكمان خبرتك في المجال. 

البروفايل بتاعك بيكون مهم ليك جداً كفريلانسر لإن هو السبب ورا إنك تجيب عملاء وشغل أكتر، عشان ببساطة كل ما تهتم بيه وكل ما تحط فيه تفاصيل ليك ولشغلك بشكل محترف فرصة ظهورك أول ما العميل يبحث عن حد في مجالك هتكون اكبر فده هيساعد عملاء كتير يشوفوا شغلك ويشتغلوا معاك بالفعل.

أهم أمثلة لأفضل فريلانسرز على موقع Upwork 

1- مجال التصميم “Graphic Design”

ده مثال لبروفايل فريلانسر من أفضل الفريلانسرز اللي موجودة على Upwork في مجال التصميم، بيوضح 3 أمثلة لمشاريع الفريلانسر اشتغلت عليهم، والوصف الخاص بيها بيوضح الخبرة اللي عندها وتفاصيل شغلها أكتر، كمان البروفايل بتاعها بيوضح كل الخدمات اللي بتقدمها في مجال التصميم وأهم خدمة هي بتحترفها. 

2- مجال إدارة مواقع التواصل الإجتماعي “Social Media Managing”

ده مثال لبروفايل فريلانسر من أفضل الفريلانسرز اللي موجودة على Upwork في مجال إدارة مواقع التواصل الاجتماعي، بيوضح ضرورة الاهتمام بإسم المجال اللي العميل بيطلبه وحيث إن المجال ده ليه كذا اسم فالفريلانسر وضح في البروفايل بتاعه أسماء كل المجالات اللي العميل بيدور عليها بس كلها تندرج تحت نفس الخدمة وبكده الفريلانسر يكون وضح المهارات والخدمات اللي بيقدمها كلها. 

3- مجال التسويق الرقمي “Digital Marketing” 

ده مثال لبروفايل فريلانسر من أفضل الفريلانسرز اللي موجودة على Upwork في مجال التسويق الرقمي، الفريلانسر ده وضح في البروفايل الخاص بيه كل الشهادات والكورسات اللي حضرها وموثقة من جوجل واللي بتضم 6 شهادات وده بيوضح انه شاطر في مجاله ومن أحسن الخيارات اللي ممكن أي عميل يختارها لإنه هيقدمله شغل احترافي. 

4- مجال تطوير تطبيقات الجوال “Mobile Application Development”

ده مثال لبروفايل فريلانسر من أفضل الفريلانسرز اللي موجودة على Upwork في مجال تطوير تطبيقات الجوال، اختلاف الفريلانسر ده وتميزه بيظهر في كتابته للوصف بتاعه بحيث انه بدل ما يكتب عن نفسه اتكلم عن ازاي هو هيساعد العميل في المشروع بتاعه والمهارات اللي هيقدمهاله وده بيشد انتباه العميل أكتر من إنه يكتب عن نفسه بس. 

5- مجال تصميم مواقع الويب “Web Designing”

ده مثال لبروفايل فريلانسر من أفضل الفريلانسرز اللي موجودة على Upwork في مجال تصميم مواقع الويب، الفريلانسر ده قَدم البروفايل بتاعه بشكل منظم ومُرتب عشان يظهِر شكل البورتفوليو الخاص بيه والبورتفوليو بتاعه منظم ومنسق من جميع النواحي وده ظهر في استخدامه للخطوط والألوان وتنسيق الهيئة العامة الخاصة بالبورتفوليو وده أظهر خبرته فعلاً في المجال لإن التنظيم والتنسيق أساس شغله. 

أهم الأجزاء في البورتفوليو الخاص بيك

1- العنوان 

العنوان جزء مهم جداً في البروفايل بتاعك، لانه بيحتوي على المجال اللي بتشتغل فيه أو الخدمة اللي بتقدمها، وبيكون مهم لإنه أول حاجه عين العميل بتلاحظها قبل ما يفتح البروفايل بتاعك، لو العميل شاف العنوان اللي هو عايزه بيدخل على البروفايل بتاعك ويشوف باقي الأجزاء.

ولازم العنوان يكون واضح ودقيق ويقدر يشد العميل ولما العميل يقرأه يفهم إن ديه الخدمة اللي هو طالبها، مثال على ده إنك تكتب إنك بتشتغل “Software Developer” بس أحسن ليك وللعميل إنك تحدد الخدمة اللي بتقدمها بالظبط داخل المجال زي الـ “UX/UI Design” أو الـ “Full Stack Developer”

2- الوصف

جزء الوصف بتوضح فيه تعريف بسيط ليك وللخدمات اللي بتقدمها والمشاريع المهمة اللي اشتغلت عليها واللي لو ذكرتها هتبين مدى احترافيتك، هتتكلم كمان في الوصف أكتر عن مجال شغلك والمدة أو عدد السنين اللي بتشتغل فيها في المجال ده ووضح كل التفاصيل اللي انت شايف العميل محتاج يعرفها عنك عشان يشوفك فريلانسر محترف. 

استغل الجزء ده في إظهار شطارتك في المجال وتوضيح الأجزاء اللي العميل مش هيعرفها عنك غير لو قولتها، وضح مدى قوتك في المجال واستخدم جُمل وكلمات سهلة وبسيطة مش مُعقدة وانت بتكتب الوصف، وبعد ما تخلصه حاول تراجع اللي كتبته مع ناس متخصصة في الكتابة ومتنساش تراجع الجرامر بتاعك على Grammarly. 

3- المهارات 

وانت بتضيف المهارات والخدمات اللي بتقدمها أحرص إنك تضيف أي مجال وأي خدمة ليها علاقة بالمجال الاساسي بتاعك بجانب كتابتك للمجال الأساسي بشكل واضح، لإن ده هيساعدك تجيب عملاء وشغل أكتر.

مهاراتك كمان بتتكتب في جزء الشهادات، وده جزء بتوضح فيه الشهادات والكورسات المهمة اللي حضرتها واللي بتدل على خبرتك في المجال بتاعك، لإن كل ما يكون في إثباتات ليك ولمستوى شغلك العميل هيثق فيك أكتر وهيجيلك وهو مطمن. 

4- صورتك والفيديو التعريفي 

نظراً إن شغلك مع العميل بيكون أون لاين وده بيخلي ثقة العميل فيك مذبذبة غصب عنه لإنه بيتعامل مع شخص مجهول، فالهدف من إنك تحط صورتك وإنك تعمل فيديو تعريفي ليك على المنصة هو انك تظهِر شكلك وتطمن العميل أكتر ويحس إنه عارفك وانك مش مجرد شخص مجهول. 

صورتك لازم تكون فورمال على أد ما تقدر وتكون واضحة وبكواليتي عالية، والفيديو التعريفي يكون فورمال برضو ولا يتعدى الـ 60 ثانية، وتحاول تتكلم فيه عن تعريف لنفسك وتخصصك وشغلك السابق مع العملاء والمشاريع المهمة اللي اشتغلت عليها.

الخلاصة 

عشان تعمل بروفايل على أي موقع من مواقع العمل الحر وخصوصاً Upwork هتحتاج وقت ومجهود عشان البروفايل يطلع بأحسن صورة لإن البروفايل بتاعك هو السبب الوحيد اللي يخلى العميل يرفضك أو يقبلك، وهتفضل كل فترة بتعدله وبتحسن فيه كل ما تتطور ومستواك يعلى. 

وعشان تعمل بروفايل مميز وتهتم بكل أجزائه صح وتعرف ازاي تخلي الموقع يقبله فبنصحك تقرأ دليلك للبدء على موقع Upwork.