بعد رحلة دامت 8 سنين في مجال العمل الحر وبعد الوصول لبعض الإنجازات اللي فخور بيها والتعثر في بعض المشاكل اللي ياما رجعتني لنقطة الصفر، أدركت إن كان ممكن يتم اختصار الرحلة ديه بسهولة لو كنت لقيت التوجيه الصحيح أو لو كنت شوفت المقال اللي بكتبه ده من 8 سنين.

عشان كده بكتبلك المقال ده اللي هياخدك في رحلة الوصول لأول عميل ليك خطوة بخطوة من أول من ما تعمل تسجيل دخول لموقع ابوورك لحد ما العميل يكلمك وتبدأ شغل معاه على أول مشروع ليك على الموقع.

وفي المقال ده انا مش هكلمك عن مهارتك اللي بتمثل 70% من مشوارك كمستقل بل هكلمك في الـ 30% الباقيين اللي هيساعدوك  توَصل مهاراتك للعميل، والـ 30% دول بيمثلوا مهارتك في مجال الفريلانس، اللي هي عبارة عن ازاي تبني بورتفوليو، ازاي تقدم بروبوزال قوي، ازاي تتواصل مع العميل بشكل احترافي، ايه الفرق بين مواقع العمل الحر المختلفة، وما إلى ذلك.

بعد ما تقرأ المقال ده هتعرف:

• ازاى تنظم شكل البروفايل بتاعك على موقع ابوورك 
• ازاي تبحث عن وظيفة على موقع ابوورك 
• ازاي تستخدم الفلتر الموجود علي الموقع بعد البحث عن وظيفة 
• ازاي تختار الوظائف المناسبة ليك 
• ازاى تتعرف على العميل قبل ما تشتغل معاه 
• ازاي تقدم على وظيفة 
• ازاي تكتب بروبوزال احترافي

عشان نوصل للعميل هنمر بـ 3 مراحل هنناقشهم في المقال ده :

• شكل البروفايل الخاص بيك على الموقع 
• ازاي تدور على وظيفة على Upwork 
• التقديم على الوظيفة المناسبة

المقال ده هدفه إن العميل يشوف البروفايل بتاعك في الآخر، لو العميل شاف البروفايل بتاعك بعد ما قرأ البروبوزال وعجبه  فانت كده دخلت المنافسة مع باقي الفريلانسرز اللي مقدمين على الوظيفة بالفعل وقدرت تخلي العميل يلاحظ وجودك، ولو وصلت لده فانت عملت اللي عليك ومش باقي غير إن العميل يراجع مهاراتك وشغلك السابق ويقرر وقتها هل ستايلك ومهاراتك تناسبه أو لا.

وخليني أقولك إن شكل البروفايل بتاعك على موقع العمل الحر بيعكس شكلك الحقيقي قدام العميل كانك روحتله انترفيو في شركة، كل حرف موجود على البروفايل بيقول للعميل انت مين، وصدقني بعد الرحلة الشاقة اللي هتمر بيها عشان تجذب العميل أكبر غلطة تعملها هي إنك تضيع المجهود ده كله لما العميل يدخل البروفايل بتاعك يلاقيه مش مميز ومش بيظهر قوتك و مش بيوضحله إنت مين.

أهم تفاصيل في بروفايلك على ابوورك :

1- صورة البروفايل

صورتك لازم يتوفر فيها الـ 4 عناصر دول :

– تكون فورمال مش سيلفي 

– تكون واضحة وبجودة عالية مش مبكسلة

– خلفية الصورة تكون بيضا

– تلبس لبس لائق

 وده كله الهدف منك إنك تظهر بصورة احترافية و مهندمة للعميل كأنك بالظبط بتحط صورة لنفسك في ال CV بتاعك.

وده مهم جدا في مجال العمل الحر عشان التعامل كله بيكون أون لاين فانت محتاج تدي العميل صورة ليك تطمنه وتخليه يثق فيك اكتر وميحسش انه بيتعامل مع شخص مجهول.

2- الـ Description بتاعك 

كل فريلانسر بيكتب ديسكربشن خاص بيه على الأكونت بتاعه وده مهم جدا لإنه بيعرف العميل انت مين وده الجزء الوحيد اللي بيسمحلك تكتب وتتكلم عن نفسك بكلمات حقيقية، بس اللي بيظهر للعميل من الدسكربشن ده هما أول 250 حرف بس والباقي هيظهر لو العميل داس على البروفايل بتاعك.

عشان كده لازم تركز أوي على أول جزء ده وتخليه مميز ويشد العميل يكمل قراءة، و متحرقش فيه الكلام الممل اللي زي “أنا أحمد السباعي طبيب بشري عندي 25 سنة” والكلام اللي محدش مهتم بيه ده.

خلي السطرين دول فيهم كلام يخلي عين العميل بتلمع زي أكبر إنجازاتك أو أحسن تقييم ليك، وخد لفة في الموقع شوف الفريلانسرز التوب ريتد كاتبين ايه ي الدسكربشن بتاعهم  وكاتبينه ازاى وبعد ما تخلص اعرض شغلك على شخص شاطر في الكتابة يساعدك تحسن الأسلوب والكلمات. 

3- الـ Title بتاعك

دا المسمى الوظيفي الخاص بيك اللي بتكتبه عندك على الأكونت وبتقدم بيه على وظايف في نفس المجال، وأكبر غلط ممكن تقع فيه إنك تكتب التايتل بتاعك تبع مجال وتقدم على وظيفة في مجال تاني خالص، كده العميل مش هيتعب نفسه ويبص عليك حتى هو هيقول “دا بيعمل ايه هنا ده؟” وهيتجاهل البروبوزال بتاعك. 

بس لو انت بتعرف تقدم كذا مهارة ومش هتقدر تربط نفسك بمجال واحد فموقع أبوورك عملك خاصية تساعدك تعمل اكتر من بروفايل خارجي ليك وكل بروفايل خاص بمهارة معينة وكلهم تبع أكونت واحد وتقدر قبل ما تقدم على وظيفة تختار انت بتقدم بأنهي بروفايل وبأنهي مهارة زي ما الصورة هنا بتوضحلك.

وتقدر تفعل الخاصية ديه عن طريق الخطوات ديه:

• هتروح على الـ Setting 
• هتختار Profile Setting
• هتنزل عند Specialized profiles وتعدل المهارات اللي انت عايزها براحتك

4- البورتفوليو

وده معرض أعمالك اللي بتضيف فيه أهم شغل ليك والنماذج اللي انت عايز العميل يشوفها، و اوعى تسيبها فاضيه لإن العميل معندوش ضامن لمستواك غير من خلال البورتفوليو، ومن غير البورتفوليو مش هيختارك اصلا لإنه هيبقى بيرمي فلوسه عالأرض. 

بعد ما ظبطت البروفايل بتاعك وبقي جاهز أي عميل يدخل عليه ويعرفك فعلا، جه الوقت نشوف بنجيب العميل ازاي، وهاخدك في المرحلة ديه خطوة بخطوة وسجل ورايا: 

1. من قائمة Find Work فوق خالص على الشمال هتختار Find Work 
2. هتبحث في جزء Search For job على الوظائف وممكن تبحث بالمهارة بتاعتك أو بالوظيفة اللي بتبقى مطلوبة ومع الوقت هتعرف إيه أهم الكلمات المفتاحية اللي تبحث عنها وتجيبلك اكبر عدد من الوظائف.

في المثال ده أنا عملت سيرش بالمسمى الوظيفي “YouTube Manager” وظهرلي كل الوظائف اللي انت شايفها دى، مئات وآلاف الوظائف

3. من قائمة Sort اللي هتشوفها على اليمين اختار Newest عشان يظهرلك الوظائف من الجديد للقديم، ونصيحة ليك متقدمش على وظيفة عدا عليها اكتر من يومين 
4. هتسرع عملية البحث وتروح على الفلتر اللي على الشمال ده ونختار الوظايف اللي تناسبنا أكتر وهتعدي علي الحاجات ديه:

• الـ Category: لو متأكد إن الوظيفة اللي بتقدم عليها موجودة في كاتيجوري معين اختاره هنا، بس أحيانا العملاء بيحطوا الوظيفة من غير كاتيجوري فمن رأيي تسيبها فاضية عشان متخسرش وظيفة كويسة. 

• الـ Experience Level : هتسيبها فاضية برضو لإن ديه تصنيفات العميل هو اللي بيحطها وهو مش بيركز في التصنيف الدقيق للحاجات دى فسيبها فاضية عشان متخسرش وظيفة كويسة. 
• الـ Job Title : دا نوع الوظيفة اللي بتحدد فيه إنت بتشتغل بالساعة ولا بالمشروع ولا ايه بالظبط، وسعر كل واحدة فيهم ايه، و كمبتدىء انت مش محتاج كل ده انت محتاج العميل يدخل يكلمك بس فده مش مهم ليك دلوقتي فهنسيبها فاضية برضو. 
• الـ Number of Proposals : ده عدد الناس اللي قدمت على الوظيفة، انت وظيفة قدم عليها كام شخص؟

نصيحتي ليك متقدمش على وظيفة قدم عليها أكتر من 20 شخص، لإن ده هيخلي المنافسة أقوى وفرصتك في القبول هتبقى ضعيفة جدا، بس مع الوقت ولما تبقي أقوي هتقدر تقدم على وظائف قدم عليها 50 شخص قبلك عادي لو انت واثق من نفسك ومن مهاراتك. 

عشان كده هتختار كل الاختيارات الموجودة من أول Less than 5 لحد 20، بس ده بيكون عدد الاشخاص اللي مقدمين في الوقت الحالي وممكن تزيد مع الوقت عادي.

وديه المرحلة اللي بنخلص فيها كل الدوشة والفلترة وبنوصل فيها لاختيار الوظيفة المناسبة بجد، والمرحلة دي هنقسمها 3 أجزاء :

• جزء مراجعة كل الوظائف المتاحة 
• جزء مراجعة صفات العميل 
• جزء التقديم الفعلي على الوظيفة

 أول جزء : مراجعة كل الوظائف المتاحة

ده الجزء اللي هتبدأ تشوف فيه الوظائف اللي طلعتلك من الفلتر وتاخد بصة عليهم سريعة كده واللي تشوفه مناسب ليك هتحفظه بعلامة القلب اللي على اليمين ده عشان نرجعله نقدم عليه بهدوء واحترافية في الآخر بعد ما نجمع كذا وظيفة سوا.

وخد بالك من حاجة مهمة جدا، التقديم على Upwork بفلوس غير مباشرة، عن طريق حاجه اسمها “الكونكت”، والكونكت ده عملة ابوورك اللي بتقدر تشتري بيها مكانك في الوظيفة ولما تدفعها بيسمحلك تقدم، وسعر الكونكت الواحد هو 15 سنت والوظيفة اللي بتقدم عليها الكونكتات بتاعتها بتختلف حسب قوتها، يعني هتلاقي من أول الوظائف اللي تقديمها بـ 2 كونكت لحد 4 و 6 وانت طالع. 

معني كده انك بتصرف فلوس على التقديم فلازم تقديمك على وظيفة يكون مدروس كويس جدا وتكون عارف ان الوظيفة مناسبة ليك وإن عندك فرصة تتقبل فيها، عشان كده محتاج تدرس كل خطوة وتكتب بروبوزال قوي عشان متبقاش بترمي فلوسك عالأرض. 

تعالى ناخد وظيفة كمثال ونطبق عليها :

• الأول بتشوف عنوان الوظيفة، هل هو مناسبك ومناسب لشغلك وانت تقدر تقدم المطلوب؟
• هتبص تحت خالص العميل ده صرف كام على الموقع في الوظايف اللي بيقدمها، وتقدر تحدد هو تقيل ولا لا.
• هتشوف التقديم على الوظيفة ديه بكام والمثال هنا بيقول التقديم بـ 4 كونكت
• هتشوف بلد العميل لو انت مهتم تشتغل مع بلد محددة لسبب شخصي أو لو مبتحبش تشتغل مع بلد ما لسبب شخصي برضو
• هتشوف فيدباك العميل اللي الفريلانسرز بيدوه للعميل آخر الشغل، لأن زي ما العميل بيقيمك انت كمان بتقيم العميل والعميل هنا واخد خمس نجوم يعني دا ممتاز جدا
• كده نقدر ندخل على الوظيفة بقى نراجع باقي التفاصيل كلها ونشوفها مناسبة لينا. 
• اما تنزل تحت خالص هتشوف سعر الوظيفة اللي هو زي ما مكتوب هنا 6 دولار في الساعة، ولو لقيت الرقم انت موافق عليه بتكمل بحثك في باقي تفاصيل الوظيفة

تاني جزء : مراجعة صفات العميل

وارد تلاقي عميل بينزل وظيفة وميوظفش حد، أو يكون نصاب بس انت متعرفش، او يكون فيه أي مشكلة فلازم تشوف اكونت العميل وتقرر إنت موافق تشتغل معاه ولا لا زي ما هو بيدخل الأكونت بتاعك وبيعمل نفس الحاجه، فتعالى اقولك بتلاحظ ايه من اكونت العميل:

• هتشوف جنسية العميل، وفي المثال ده معانا عميل من أمريكا، وأنا احب اشتغل معاهم جدا فمعنديش مشكلة معاه 
• هتشوف عدد الوظائف اللي نزلها وهنا العميل ده نزل 670 وظيفة قبل كده وده عدد رائع 
• هتركز مع نسبة قبول العميل، وديه اللي بتقولك العميل وظف كام في المية من عدد الوظائف اللي نزلها بالفعل، ونصيحة ليك متقبلش عميل نسبة قبوله أقل من 50% عشان متضيعش وقتك و فلوسك عالفاضي، وفي المثال هنا العميل ده نسبة قبوله 100% يعني عميل جامد ومش بيهزر اما بينزل حاجه بيبقى محتاج حد يساعده فعلا.
• هتاخد بصة على تقييم العميل، والعميل هنا واخد 4 نجوم و 99 من مية يعني تقريبا خمسة فده كده شخص ممتاز والشغل معاه مريح مش بيتعب الناس ومحدش اشتكي منه
• بعد كده هتاخد بالك من الفلوس اللي صرفها في الموقع، مكتوب هنا إن العميل ده صرف 52 ألف دولار وده رقم رائع، ونسبة الساعة بتاعته تقريبا 6 دولار ومن هنا تعرف فعلا العميل متعود على سعر ايه والوظيفة اللي بتقدم عليها دا كده سعره المألوف ولا لا. 

في بعض العملاء مش بيوضحوا نسبة ساعتهم كام وعشان كده بنرجع للجزء ده ونشوف نسبة الساعة بتاعتهم عشان نقدر نقرر نرفض ولا نقبل، أو نقرر هل في فرصة نتناقش معاه في السعر ولا لا، وخد بالك إن ميكونش هو نسبة ساعته بـ 5 دولار وأنا بقوله عايز 30 دولار. 

• بعد تحس إن الوظيفة مناسبة ليك والعميل تمام بترجع تقرأ الوظيفة بتركيز اكتر وتهتم بكل حرف عشان تعرف تقدم عليها، ومتنساش تحطها في قائمة الـ Favourite زي ما اتفقنا.

تالت جزء : التقديم الفعلي على الوظيفة

في المرحلة ديه هنكون خلصنا العملية اللي فاتت ديه كلها على كذا الوظيفة، وجمعنها حوالي  4 وظائف عشان نقدر نقدم عليهم برواقة وبتركيز. 

هنروح نجيب الوظائف ديه من قائمة Find Work اللي فوق على الشمال، بعد كده تختار Saved Jobs هتلاقيهم هناك، ومن هنا هتبدأ أهم مرحلة، مرحلة التقديم. 

هنطبق الخطوات ديه بالترتيب :

• هنفتح الوظيفة ونقرأها تاني بهدوء ونعلم على الأجزاء المهمة لينا و للعميل عشان هنستخدمها في الكتابة دلوقتي، وخد بالك إن اهتمامك بوظيفة العميل وبالكلام اللي هو كاتبه واستخدامك ليه صح هيوضح للعميل إنك مميز
• هندخل على الفيدباك اللي الفريلانسرز كاتبينه للعميل ده ونحاول نعرف اسمه، هتلاقيهم كاتبين اسمه في الفيدباك، ولما تستخدمه في البروبوزال العميل هيتشد ليك لإنك ذاكر اسمه وهيحس بالاهتمام وبتميز البروبوزال بتاعك لإنك بتخاطب شخصه مش شايفه ATM وخلاص، فهيبقى مهتم يقرأ البروبوزال كله. 

في المثال ده العميل اسمه چاستن، ومات ده الفريلانسر اللي اشتغل معاه على الوظيفة السابقة، وتقدر تفرق بينهم عن طريق إنك تعرف إن التقييم اللي الفريلانسر بيسيبه للعميل بيبقى ظاهر جنب النجوم الكبيرة ديه، لكن تقيم العميل للفريلانسر بيبقى ظاهر جنب جملة To freelancer. 

• هتدوس على Apply now وهتمشي معايا بالترتيب ده :

1- الـ Proposal Settings :

أول أوبشن بتختاره فيها هو هل إنت عايز تقدم في الوظيفة ديه كفريلانسر ولا كعضو من مجموعة محددة، وطبعا انت هتختار كفريلانسر.

تاني أوبشن هيسألك انت عايز تقدم على الوظيفة ديه من أنهي بروفايل، فاكر أما اتكلمنا فوق إن ممكن يكون عندك كذا بروفايل بكذا مهارة تحت نفس الاكونت؟

هنا بقي ده الوقت اللي بنختار فيه البروفايل اللي فيه المهارة المناسبة للوظيفة ديه وفي المثال ده انا هختار بروفايل الـ Social Media Marketing .

آخر حاجة هتعملها في الجزء ده إنك تنزل تحت خالص هتلاقي تفاصيل الوظيفة كلها في جزء الـ Job details فانت هتبدأ تتأكد منها كلها.

2- الـ Terms

هنا هتلاقي الموقع بيفكرك بشروط العميل والبادجت، فمثلا هنا العميل حاطط البادجت بتاعته 6 دولار في الساعة تقدر تعرض عليه مبلغ أعلى او أقل بس خد بالك لو زودت وارد جدا العميل ميقبلش، ووارد إن العميل يعجب بيك وبشغلك ويوافق على الأوفر بتاعك، وفي المثال ده إحنا هنعرض على العميل 10 دولار في الساعة. 

3- الـ Cover Letter 

ده بقي البروبوزال بتاعك اللي بتكتبه للعميل وتعرض فيه شغلك والعميل بيشوف من خلاله هو مهتم بيك ولا لا، فخليني أقولك شوية نصايح عشان تكتب بروبوزال قوي، ولو عايز معلومات مفصلة أكتر ونصائح أكتر تقدر تشوف مقال إزاي تكتب بروبوزال إحترافي اللي هيمشي معاك خطوة بخطوة في كتابة البروبوزال. 

• ابدأ البروبوزال بإسم العميل يعني هنا هتبدأ بـ Dear Justin وزي ما قولنا ديه حركه بتلفت انتباه العميل جدا
• هترجع للكلام المهم اللي هو كاتبه في الوظيفة اللي هتستخدمه عشان تقدر تبدأ بداية مميزة، في المثال ده مثلا العميل كاتب تلات حاجات مهمة :

• الأولى هي “Receive AI-generated Video from long-Form content” يعني عايز حد بيفهم في إنه يصنع محتوى عن طريق الذكاء الاصطناعي، فياسلام لو استخدمت الجزء ده عشان توضحله مهاراتك في تصنيع محتوى باستخدام الذكاء الاصطناعي 
• التانية هي “align with the brand’s voice” يعني عايز حد يتابع بنفس طريقة البراند بتاعه، فياسلام لو ربطتها بالجملة اللي فوق وقولتله إنك هتقدر تصنع محتوى يعبر عن البراند بتاعه باستخدام بالذكاء الاصطناعي 
• التالتة هي “Manually Post daily” يعني عايز حد بينشر محتوي كل يوم، فخليك ذكي وقولهاله بطريقة تشده، بدل ما تقول “انا هنشر محتوي كل يوم” وتبان جملة بديهية جدا قوله “أنا عارف إنك من أمريكا فأنا هحرص إن الحاجات اللي هتنزل على القناة كل يوم تكون مظبوطة مع توقيت بلدك”

بالنسبة للوظيفة اللي قدامي ديه دول أهم حاجات موجودين فيها ولازم ابدأ بيهم بشكل مميز مش كليشيه واحاول ابين قوتي فيهم

بس عارف البداية مهمة ليه؟ 

عشان العميل مش بيشوف غير أول سطرين بس فلازم يكونوا أقوياء كفاية إنهم يشدوه يدخل يكمل باقي البروبوزال، فركز أوي على أول سطرين ومتبدأش ابداً بـ “انا احمد السباعي طبيب بشري اعمل في مجال إدارة اليوتيوب منذ 2019” عشان العميل مش هيكمل قراءة.

بعد الـ cover letter هتلاقي جزء اسمه To Apply 

ده الجزء اللي العميل بيحط فيه شروطه اللي لازم تكون موجودة في البروبوزال بتاعك، في المثال ده العميل طالب أمثلة سابقة لأعمالك فحاول تحط أقوى 3 أعمال، وممكن تضيف أكتر بس متزودش عن 5.

وفي الآخر هتلاقي العميل حاطط أمثلة للشغل اللي هو طالبه، ولو انت ذكي بقي ادرسهم كويس واستخدمهم في البروبوزال بتاعك وانت بتكلم العميل، وقوله إنك شوفت الشغل ده ولاحظت إنه فيه كذا وكذا وانت هتقدمله كذا وكذا.

البروبوزال القوي هو اللي بيتكتب لصالح العميل، وبيتم التوضيح فيه كل المشاكل اللي بتواجه العميل وازاي هتقدر تحلهاله، واللي بتوضح فيه إنك مهتم ومتعاطف مع العميل وعايز تساعده فعلا، وفي النص بتقول نبذة بسيطة جدا عن نفسك عشان تخلي العميل يثق فيك مش عشان تفرد عضلاتك.

كده أنا اديتك خبرتي اللي حصدتها في 8 سنين عن ازاي تقدم على وظيفة على منصة Upwork وعرفتك النصائح المهمة اللي انت محتاجها كمبتدىء عشان تاخد خطوات أسرع، ووضحتلك خطوة بخطوة إزاي تختار الوظائف المناسبة ليك، وازاي تكتب Proposal وتقدمه بطريقة احترافية ومميزة، اتمنى أكون ساعدتك فعلا وقدمتلك بعض الحلول لبعض المشاكل اللي بتمر بيها.

ونصيحة أخيرة من فريلانسر مُصنف كتوب ريتد على منصة ابوورك، الفريلانس محتاج تصبر وتديله وقته فمتتعبش نفسك في التفكير الكتير والتشكيك في قدراتك انت لسه في اول خطوة، ودايما اول خطوة هي الأصعب وأنا بحاول اسهلهالك.