عشان العمل الحر هو منظومة كاملة بتقوم بيها لوحدك، فتسهيل المهام على نفسك ورمي الحِمل على مواقع وأدوات تساعدك في شغلك الجانبي مهم جداً، خصوصاً إن المهام اللي المواقع ديه مسئولة عنها بيقوم بيها ناس مُخصصة في الشركات، عشان كده مساعدة الأدوات ديه ليك مش رفاهية بل أهمية لإنجاز أكبر كم من الشغل بأعلى جودة بدون الشعور بأي تشتت.
الأدوات والمواقع اللي هتستخدمها أهميتها تكمُن في زيادة دقة وكفاءة المهمة اللي بتطلبها منها وتسهيل الشغل المطلوب منك وكمان توفير وقت ومجهود كتير تقدر تستغله في التطوير من نفسك أو الإهتمام بحياتك الشخصية.
ودول أهم 5 أدوات لمساعدتك في أهم 5 مهام هتحتاجها كفريلانسر:
1- أداة لمراقبة الوقت “Rescue Time”
ده عبارة عن أبلكيشن بيساعدك تحدد انت قضيت أد ايه من وقتك على كل أبلكيشن وبتنجز شغلك المهم في أد ايه والحاجات المش مهمة بتاخد منك وقت اد ايه، وكمان بيعرفك بتقضي وقت أد إيه في عادات روتين يومك زي الكتابة والنوم أو الإسكرول على السوشيال ميديا، وبعدها يجمع ده بعد فترة معينة ويعرفك إيه أكتر الأوقات اللي بتكوُن فيها منتج وايه انسب وقت تشتغل فيه على تاسكاتك الكبيرة.
طب إزاي تستعمل الأبلكيشن وتعرف أحسن وقت أنت مُنتج فيه؟
- هتحتاج تنزّل الأبلكيشن
- هتفتح الأبلكيشن وتسيبه كام يوم يشتغل ويبدأ يجمع داتا ويشوف انت بتقضي وقتك إزاي
- هتعرف أفضل ساعات إنتاجيتك عن طريق إختيار productivity من قائمة report وبعدها تختار الإسبوع اللي اشتغلت فيه وبعدها تختار time of day
- ال peaks الزرقا بتحدد أكتر ساعات انت مُنتج فيها والرمادي ديه أوقات حِيادية والأحمر ديه أوقات انت مش مُنتج فيها، دلوقتي انت عرفت أوقاتك وتقدر تحدد ساعات شغلك على أساس الأوقات ديه
2- أداة لتنظيم المهام اليومية “Trello”
ده عبارة عن أبلكيشن بيساعدك تنظم تاسكاتك ومهامك اليومية وبتقدر تضيف عليه كل تفاصيل التاسك ويوم التسليم بتاعه والتقدم اللي عملته في التاسك ده وكمان تحط تعليقات في الأماكن اللي تحبها، وميزة الابلكيشن ده إن ممكن يتربط بأي أبلكيشن تاني أي عميل بيستخدمه فتقدر ت connect مع تاسكات العميل أو تاسكات التيم وتابعوا الشغل سوا.
طب إزاي تستعمل الأبلكيشن؟
- الأبلكيشن بيتقسم ل 3 أجزاء، To do, Doing, Done هتبدأ تحط كل التاسكات والشغل اللي وراك على الأبلكيشن في كل جزء من الأجزاء ديه وتضيف كل التفاصيل الموجودة عن كل مشروع سواء مواعيده أو كومنتات أو الفئة اللي بينتمي ليها، وترتب المشاريع حسب أولويتها بالنسبالك
- هتبدأ تعمل دعوة للأشخاص أو العملاء اللي بيشتغلوا معاك على المشاريع ديه -لو احتاجت طبعا- وتسلم المهام بالمواعيد اللي هتتسلم فيه
3- أداة لإدارة البريد الإلكتروني “Mailbird”,”Spark”
هنا Spark للـ IOS و Mailbird للأندرويد، وده عبارة عن أبلكيشن بيساعدك تبعت وتستقبل الإيميلات وتنظمها وترتبها بشكل منظم وتظبط كاليندر للمواعيد المهمة اللي محتاجها في الإيميلات وكمان بيسهل عليك التنقل بين الإيميل الشخصي وإيميل الشغل.
طب إزاي تستعمل الأبلكيشن؟
الأبلكيشن سهل في تعامله جداً ويشبه بنسبة كبيرة التعامل مع الچيميل بس فيه مزايا أكتر، فكل اللي عليك تعمله هو انك تحمل الأبلكيشن وتسجل دخول الإيميل بتاعك.
4- أداة لإدارة حياتك المالية “مصاريف”
ده أبلكيشن بيساعدك تنظم أُمورك المالية، بتدخل عليه دخلك في الشهر وتضيف فواتيرك عليه وكل يوم بيبعتلك ماسج بليل تضيف عليه كل مصاريفك خلال اليوم، وبكدة تقدر آخر كل شهر تعرف إنت صرفت كل جنيه فإيه ومحتاج تاخد بالك من إيه الشهر الجاي ومش بتحس إن الفلوس بتخلص منك وانت مش عارف هى بتروح فين، وكمان تقدر تضيف عليه أقساطك الشهرية ولو بتحوش لهدف معين التحويشة وصلت كام.
طب إزاي تستعمل الأبلكيشن؟
كل اللي عليك تعمله إنك تنزل الأبلكيشن عندك على الموبايل وتبدأ تضيف مرتبك الشهري وفواتيرك ومدخراتك ومصاريفك، والابلكيشن بيتابع معاك وبيرتب كل الفلوس بشكل منظم.
5-أداة لإدارة المشاريع “Notion”
دا أبلكيشن بيديك الحرية والمساحة الكاملة إنك تطلع أفكارك وكلامك وخططك وحساباتك وشخبطتك وكل حاجه بتحصل في دماغك عشان يسجلها بشكل محترف، وبيساعدك على ده بأدوات مميزة وليست لمتابعة تاسكاتك وتتبع شغلك وكمان bookmark وكل المميزات اللي بتخليك تحس إنها مساحة عمل آمنة تمامًا تقدر تشتغل عليها بشكل مباشر وتشارك شغلك مع ناس تانية.
طب إزاي تستعمل الأبلكيشن؟
- هتحمل الأبلكيشن على الجهاز الخاص بيك
- أول ما تفتح الأبلكيشن هتلاقي مساحة العمل اللي تقدر تشتغل عليها واللي بتتكون من صفحات كتير
- وهتلاقي بار عندك على الشمال في جزء إسمه Acme Inc. وده المسئول إنه ينقلك بين الصفحات ويرجعك للصفحة الرئيسية لو احتاجت
- في جزء في البار اسمه import وده بيسمحلك تنزل أي حاجة موجودة عندك على الجهاز جوا الأبلكيشن، وجزء اسمه trash ده بيمسح الحاجة اللي نزلتها لو انت مش محتاجها
- الأبلكيشن بيتكون من أدوات سهلة الإستخدام بتساعدك في مهام صغيرة وبتسمحلك تعمل جداول وتنظم صفح كتير وتشتغل على مواقع مُصغرة ومهام أكتر هتحتاج تستخدمها كفريلانسر
الخلاصة
وبكده تكون عرفت وفهمت أهم خمس أدوات لأهم خمس مهام هتحتاج مساعدة فيهم كفريلانسر، طبعا الأدوات ديه متعددة ولكل مهمة من دول في أكتر من أداة بس من واقع خبرتي ديه أفضل الأدوات اللي هتساعدك فعلا ومش هتخليك مُشتت وهتطلّع معاك أحسن نتيجة وهتحس انك مش بتضيع وقتك مع المهام الصغيرة ديه، كل اللي عليك تسيب الأبلكيشنز ديه تخلصهالك وانت تشتغل وبس.
