لو قررت في يوم من الأيام تشتغل في شركة، ايه أول خطوة هتاخدها عشان تضمن إن اختيارك للشركة دي مناسب؟

اكيد إنك تتعرف على الشركة، وتعرف تفاصيلها بالكامل، وتعرف هل مناسباك ولا لا، وهل نظامها بيتماشى مع ستايل حياتك ولا هتضطر تقدم تنازلات عشان تشتغل فيها.

ده بالظبط اللي هتحتاج تعمله قبل ما تشتغل على موقع من مواقع العمل الحر، وهو دراسة الفرق بين مواقع العمل الحر المختلفة عشان تقدر تحدد مين فيهم المناسب ليك سواء كنت مبتدئ أو محترف في مجالك.

وأنا كتبتلك المقال ده، عشان اعملك مقارنة سريعة بين مواقع العمل الحر وأعرفك الفروقات الموجودة بينهم  من حيث شدة المنافسة والأسعار ونوع العملاء على كل موقع، وانت بنفسك تحدد مين فيهم أنسب ليك، والمقارنة دي هتكون بين أشهر المواقع الموجودة في سوق العمل الحر حالياً زي (خمسات، مستقل، Fiverr، Upwork، Freelancer، Peopleperhour).

بس قبل ما نبدأ خليني أوضحلك انت ليه محتاج تختار موقع واحد بس وتحترف فيه، لإنك ببساطة لو وزعت مجهودك على جميع المواقع مش هتقدر تبقى جامد فيهم كلهم، وده هيخليك دايماً بتبذل مجهود جبار في إنك تلاقي وظائف وتقنع العميل بيك، لإن من أرقامك القليلة على الموقع الحالي العميل مش شايف قدامه أي إثبات على شطارتك، لكن لو تميزت في موقع واحد بس الموقع ده هيبدأ يرقيك ويرشحك لوظائف كبيرة فلوسها أعلى، وهتقدر تكون مصدر ثقة للعميل اللي شايف البروفايل بتاعك متألق بتقييمات مميزة، وعدد ساعات عمل كبيرة، وعدد وظائف أكبر وهكذا.

فالنجاح في موقع واحد فوايده أكبر بكتير من التشتت في كل المواقع!

رغم العدد الكبير لمواقع العمل الحر والاختلافات الموجودة بينهم، لكن مواقع العمل الحر كلها بتقع تحت قسمين رئيسين نسبةً لطريقة الشغل عليهم: 

1- الـ GIG Market Places

ده أول نوع من أنواع مواقع العمل الحر، واللي بيعتمد كلياً على الفريلانسر، لإن في النوع ده الموقع بيكون عبارة عن خدمات مصغرة الفريلانسر هو اللي بيعرضها والعميل بياخد لفة في الخدمات دي ويعمل مقارناته ويكلم الفريلانسر اللي هو عايز يشتغل معاه بنفسه.

الخدمة المصغرة اللي الفريلانسر بينزلها بتكون عبارة عن مهارة الفريلانسر بيقدمها للعميل زي (إنشاء لوجو احترافي- كتابة مقال متوافق مع السيو- تصميم فيديو أنيميشن – … وهكذا)، الفريلانسر بيعرض خدمته وبيضيف التفاصيل اللي العميل محتاجها زي (عدد كلمات المقال –  مدة الفيديو – …) وبيوضح للعميل الخدمة دي سعرها ايه، ومجرد ما الفريلانسر بيعمل الخدمة فهو بيرميها في البحر ويستنى العميل يبقى يكلمه.

هنا يجي دور العميل اللي بيعمل سيرش بالخدمة اللي هو عايز يشتريها، ويقارن خدمات الفريلانسرز المختلفة، ويقارن أسعارهم، ويقارن البورتفوليو الخاص بكل واحد فيهم، لحد ما يرتاح لشخص بعينه ويدخل يشترى منه الخدمة ويتواصل معاه عشان يبدأوا الوظيفة سوا.

من مميزات النوع ده من المواقع إن المنافسة عليها قليلة، وأسهل إنك تلاقي عليها وظيفة وتعمل لنفسك اسم داخل الموقع، وده لإنها مُصممة عشان العميل هو اللي يروحلك مش انت اللي تدور عليه، ولأي فريلانسر مبتدئ على مواقع العمل الحر الـ GIG Market Places بداية حلوة ليك وهتعلمك كتير جداً.

بس عيوب النوع ده من المواقع إنها مش مواقع تبنى فيها مستقبل ليك لو انت ناوي تكمل حياتك كفريلانسر، لإن من اسم خدامتها إنها “خدمات مُصغرة” يعني حاجات العميل هيطلبها منك مرة وخلاص، وبتكون حاجات بسيطة أو متوسطة، نادراً لما بيكون فيها شغل على مشاريع بمبالغ كبيرة، فلو الفريلانس مجرد مرحلة في حياتك لمدة كام سنة وتسيبها فالمواقع دي مناسبة ليك تماماً، لكن لو ناوي تكمل فيه فتقدر تستخدم المواقع دي كمجرد بداية لحياتك المهنية.

ومن أمثلة المواقع دي موقع خمسات، وهو موقع عربي 100% فلو عندك مشاكل مع اللغة حالياً تقدر تبدأ بيه وده طريقك لبيع خدمات أكتر على خمسات، مثال تاني للـ GIG Market Places هو موقع Fiverr ولكنه موقع إسرائيلي فاحنا مقاطعينه ومنصحكش تشتغل عليه.

2- الـ Remote Job Market Places 

ده تاني نوع من أنواع مواقع العمل الحر، واللي بيعتمد كلياً على العملاء، لإن في النوع ده الموقع بيكون عبارة عن مساحة للعملاء بينشروا فيها المشاريع اللي محتاجين فيها لفريلانسرز في مهارات معينة عشان يشتغلوا معاهم عليها، والفريلانسرز بيشوفوا الفرص دي ويبدأوا يقدموا عليها ويعرضوا مهاراتهم للعميل ويوضحوا هما ليه هما مناسبين للمشروع ده والعميل بيختار منهم. 

الفريلانسرز في النوع ده من المواقع بيكون بينهم منافسة عالية جداً، فبيبدأوا يبيعوا مهاراتهم للعميل ويتناقشوا معاه في الأسعار وفي تفاصيل المشروع، وكل واحد بيقول للعميل هو هيقدر يقدمله ايه عشان يختاره هو، والعميل بيبدأ يفلتر الفريلانسرز ويختار منهم المناسب ليه.

من مميزات النوع ده من المواقع إن ليها مستقبل باهر وتقدر تكبر عليها وتعتبرها مكان لدخلك الأساسي لإن فلوسها حلوة و أسعارها من المتوسط فأعلى.

لكن عيوبها إن منافستها شديدة جداً جداً، وفي البداية هتاخد وقت كبير شوية عشان تقدر تفهم خباياها وتركاتها وتعرف ازاي تتعامل عليها وازاي تجيب عملاء كتير.

ومن أمثلة المواقع دي موقع Upwork، وده الموقع الأساسي بتاعي وأنا مُصنف فيه كـ Top Rated Plus وبقدم عنه محتوى كتير نظراً لخبرتي فيه، فلو حابب تبدأ فيه انصحك بقراءة المقال ده طریقة إنشاء حساب احترافي على موقع Upwork، وأمثلة تانية للنوع ده من المواقع هو موقع Freelancer المشابه جداً لموقع أبوورك، وموقع Peopleperhour اللي منافسته أقل من موقع فريلانسر وموقع أبوورك.

بعد ما عرفت التصنيفين الأساسيين لمواقع العمل الحر المختلفة، وبعد ما عرفت انت عايز تشتغل في أنهي نوع فيهم، دلوقتي انت محتاج تعرف الفرق بينهم كلهم ومميزاتهم وعيوبهم عشان تقدر تختار الموقع اللي يناسبك.

1- رسوم التقديم على الوظائف

بعض المواقع التقديم فيها على وظائف مجاني تماماً، وتقدر تقدم على أي وظيفة بدون ما تدفع فلوس زي موقع خمسات وموقع مستقل، لكن المواقع الكبيرة التقديم فيها على وظائف بفلوس غير مباشرة عشان تخليك تفكر مرة واتنين وتلاتة قبل ما تقدم على وظيفة مش مناسباك.

طب يعني ايه التقديم بفلوس غير مباشرة؟

على سبيل المثال موقع أبوورك، أبوورك بيخليك تشتري حاجة اسمها Connects وتقدر تشتريها ببعض الدولارات، ودي العملة اللي الموقع بيتعامل بيها دايماً، وبيبقى عندك زي محفظة كده فيها الكونكتات بتاعتك، ولما تيجي تقدم على وظيفة هيقولك إن تقديم الوظيفة دي ب 4 كونكتات، ولو عايز تقدم على الوظيفة وتبعت البروبوزال بتاعك للعميل فعلاً فلازم تدفع الـ 4 كونكتات دول الأول، وعلى حسب الوظيفة اللي بتقدم عليها بيختلف عدد الكونكتات.

وموقع Freelancer مثلاً بيقدم بعض المزايا القوية جداً ولكن عشان تستفيد بيها لازم تدفع فلوس الميزة دي للموقع، زي مثلاً إنك تدفع فلوس عشان تستفيد بخدمة ظهور البروبوزال في بداية الوظيفة عشان يجذب انتباه العميل.

عامل رسوم التقديم للوظائف ده عامل بيعجز بعض الناس في إنها تدخل المواقع التنافسية الكبيرة زي ابوورك وفريلانسر، فالشغل على المواقع دي بيكون أسهل شوية لشخص قديم في الموقع وقادر يستثمر في نفسه أكتر ويدفع للموقع، (دا طبعا بعد ما بقى عنده القدرة على تحسين شكل الأكونت بتاعه وقادر يكتب بروبوزال قوي).

فلو انت لسه في البداية فانصحك بالمواقع اللي معندهاش رسوم للتقديم على وظائفها زي خمسات ومستقل. 

2- عمولة الموقع

مواقع العمل الحر هي مجرد وسيط بينك وبين العميل، وعشان تقدملك كل الخدامات دي وتجيبلك الوظيفة والعميل لحد عندك بتاخد نسبة ثابتة منك على كل وظيفة بتشتغلها، والنسبة دي بتتراوح بين 5% لـ 20% من سعر الوظيفة اللي انت اشتغلت فيها مع العميل.

فعندك مثلا موقع مستقل بياخد 15%، وموقع أبوورك بياخد 10%، وموقع خمسات بياخد 20%، وموقع فريلانسر بياخد 5%.

وبفكرك إن عمولة الموقع عامل مش مهم أوي يخليك تقرر انت هتشتغل على أنهي موقع عشان تنقي الأقل وكده، أهتم بالأسباب التانية أكتر وخلي ده آخر سبب يخليك تختار موقع عن التاني. 

هو الفريلانس مهارة؟

أكيد الفريلانس مهارة، انت متولدتش بتعرف تجيب عميل، ولا بتعرف تكتب بروبوزال احترافي، ولا بتعرف تهندل العميل، كل دي حاجات انت محتاج تذاكرها.

عشان تنجح في مجال العمل الحر فعلاً فانت محتاج مهارتك اللي بتقدمها للعميل ومهارة الفريلانس، والاتنين لايقلوا أهمية عن بعض، وأنا بقولك ده عشان اعرفك انك محتاج تذاكر فريلانس!

محتاج تتعلم بعض تركات الموقع اللي انت هتختاره، وتتعلم ازاي تتميز في المنافسة على وظيفة وسط عشرات الفريلانسرز، وتتعلم حِيل تخليك أقوى.

وعشان توصل لكده هقولك 3 مقترحات عشان تحسن من مهارتك في الفريلانس:

1- تابع فريلانسرز أقوياء

الفريلانسرز الأقوياء قبل ما يبقوا أقوياء مروا بعدد مرات فشل لا حصر لها، فانصحك تتابعهم وتسمع نصائحهم وتتجنب عثراتهم عشان توصل أسرع، وأنا بدوري في المقال ده هقولك على أفضل شخصين تتابعهم عشان توصل لمعلومات قوية فعلاً، وهما 2 فريلانسرز كل واحد فيهم كسب أكثر من 2 مليون دولار على موقع العمل الحر اللي هو شغال عليه.

• Matt Starky 

ده أتقل وأقوي فريلانسر على موقع Freelancer، وعنده قناة على اليوتيوب فيها نصائح من دهب، وتقدر توصل للينك القناة من هنا

• Evan Fisher

ده من أشهر الفريلانسرز على موقع Upwork، وقناة اليوتيوب الخاصة بيه فيها معلومات قيمة جداً، وتقدر توصل للينك القناة من هنا

2- تابع مدونة Upwork

أبوورك عندها مدونة كبيرة فيها مقالات كتير جداً، تقدر تتابعها عشان تحترف مهارة الفريلانس، وتعرف أكتر ازاي تنظم حياتك كفريلانسر، وازاى تبقى توب ريتد على الموقع.

المدونة دي مش بس عليها مقالات، بل فيها منتدى لعملاء أبوورك اللي بيتكلموا فيه عن خبراتهم مع الفريلانسرز، وبيقدموا استشارات ونصائح لبعض في طرق تقييم الفريلانسرز اللي اشتغلوا معاهم على الوظائف، وبيتناقشوا ازاي يختاروا فريلانسر أفضل المرة الجاية، وايه الصفات اللي محتاجين يتجنبوها وقت اختيارهم للفريلانسرز،وهكذا.

لو تابعت المدونة دي هتعرف تفهم دماغ العميل بتفكر ازاي، هتقدر تحدد هو مستني منك ايه عشان يقبلك فتعمله، ومش عايز يشوف منك ايه فتتجنبه.

3- اهتم بنصائح الفريلانسرز العرب

وأنا بقولك هنا العرب بالتحديد لإنهم أقرب الناس لموقعك الحالي ومروا بأغلب مشاكلك في يوم من الأيام، ولإن المنافسة مع الأجانب مش سهلة فالنصائح منهم هتكون أوقع ليك -ولكن ده ميمنعش أهمية متابعة الأجانب في الرحلة دي-.

والعرب قليل منهم اللي بيبقى عنده قناة يوتيوب بيشارك فيها معلوماته ونصايحه، فلو لقيتهم امسك فيهم، ولكن الأغلب بيكون موجود في جروبات الفيسبوك وبيكون ليهم أكتر من كومينتي مُشجع جداً بيشاركوا فيه نصائح كتير هتعلمك كتير، فدور على الجروبات دي وخليك جزء منها هتفرق معاك كتير.

ومتنساش طبعا تتابع مقالات موقعنا الجميل فريلانزاوية عشان فيه معلومات حلوة برضو ^^

أنا بدأت شغل في بداية حياتي على 4 مواقع مختلفة في نفس الوقت والفترة دي خلتني مشتت جداً ومش قادر أنجح في مكان واحد، لكن لما قررت اشتغل على موقع أبوورك بس قدرت في وقت أقل إني أحقق فيه إنجازات أكتر، ووصلت لبادج التوب ريتد بلص على الموقع وبقيت الفريلانسر رقم 1 في مجال إدارة قنوات اليوتيوب على الموقع.

كل اللي عايز اوصلهولك هو إن مواقع العمل الحر هي شركتك اللي انت هتكبر وتبني اسمك فيها، فاختارها بعناية ومتستهونش بتفاصيلها أو بإنك تبذل مجهود فيها عشان تبلور نفسك جوا الموقع.