بدايتك على موقع أبوورك فرصة ليك عشان تبدأ حياتك المهنية في المكان الصح، لإن أبوورك موقع مُصنف كواحد من أفضل مواقع العمل الحر في العالم. 

بس لو مش عارف ازاي تاخد خطوة البداية على الموقع ومحتاج حد يرشدك في طريقك على الموقع فالمقال ده هيساعدك. بدايةً من أول ما تختار الوظيفة اللي هتقدم عليها، لحد ما تتقبل في الوظيفة وتاخد التقييم بتاعك من العميل.

لكن لو لسه معندكش أكونت وبتدور على حاجة ترشدك في خطوات انشاء اكونت جديد على الموقع، فالمقال ده هيساعدك “طریقة إنشاء حساب احترافي على موقع Upwork” في إنك تعمل اكونت، بعد كده ارجع تاني للمقال ده عشان تبدأ تقدم على أول وظيفة ليك.

عشان تدور على وظيفة على أبوورك هتبحث في جزء الـ Search اللي في أعلى الموقع. وهتدور على الوظيفة بالكلمات المفتاحية اللي ليها علاقة بمجالك ومهاراتك، وهتدور كمان بالكلمات اللي العميل بيستخدمها في البروبوزال بتاعه وهو بيدور على فريلانسر. وفي الوقت ده هتحتاج مهارة التنجيم عشان تتوقع العميل ممكن يكتب ايه يكون ليه علاقة بمهارتك ومجالك، عشان ميفوتكش فرص ووظائف ممكن تبقى مناسبة ليك بس انت مدورتش بالكلمات المناسبة.

على سبيل المثال لو انت بتشتغل Front-End Developer فانت محتاج تتوقع إن أي عميل معندوش عِلم بالمجال ده هيكتب البروبوزال بتاعه بكلمات زي “Web Developer” أو “Web Designer”. عشان كده في الوقت ده انت محتاج تتوقع الكلمات اللي ممكن تفيدك في الشغل فعلاً وتستخدمها في البحث.

وفي المرحلة دي تقدر تستخدم فلتر أبوورك علشان تستهدف الوظائف المناسبة ليك صح. وفي فلتر الموقع على الشمال هتلاقي الآتي: 

• فلتر الـ Category: وده الجزء اللي بتختار منه مجال شغلك لو انت متأكد مية في المية إن مهاراتك في المجال ده. لكن لو مهارتك ملمسة مع كذا كاتيجوري في بعض فخلي الفلتر ده فاضي.
• فلتر الـ Experience Level: وده جزء بتختار فيه مستواك أو مستوى الوظائف اللي مستعد تشتغل عليها. ولكن للأسف الفلتر ده ممكن يحط بعض الوظائف اللي تنفع للمبتدئين مع وظائف المحترفين لإن العميل هو اللي بيقرر اختيار الفلتر ده، فكده الوظيفة راحت عليك بدون سبب. فنصيحتي ليك سيب الفلتر ده فاضي عشان توصل لكل الوظائف وتختار انت منهم.
• فلتر الـ Job Type: وده فلتر بتحدد منه انت عايز وظائف بتتحاسب بالساعة ولا بالمشروع وسعر كل واحد فيهم كام. وبما إننا لسه بنقول يا هادى وعايزين نوصل لأي وظيفة فاحنا هنسيب الفلتر ده فاضي عشان يوصلنا كل أنواع الوظائف.
• فلتر الـ Client History: وده الفلتر اللي بتختار منه انت عايز تتعامل مع عميل وظف بالفعل كام شخص قبل كده في شغلانات سابقة ليه. وطبعا كل ما العدد زاد كل ما عرفت إن العميل ده بقاله مدة أطول على أبوورك فهو شخص دافع فلوس كتير وتقدر تثق فيه.
• فلتر الـ Client Location: وده الفلتر اللي بتختار منه جنسية العميل اللي انت عايز تشتغل معاه. أو تبعد عن جنسية بعض العملاء اللي انت مش عايز تشتغل معاهم. وعلى سبيل المثال انا مش بحب الشغل مع الهنود لإنهم بيتعبوني في الشغل بيحصل مشاكل كتير فبحاول أتجنبهم من البداية.
• فلتر الـ Client Time Zones: وده فلتر مش ضروري أوي لأن ساعة العميل في بلده مش هتفرق معاك. لكن في حركة بسيطة بعملها مع الفلتر ده، وهي إني بصحى وأقدم على الوظائف الفجر. الوقت ده بيكون تقريبًا نص اليوم في بلاد زي أمريكا وكندا، وأغلب الفريلانسرز في الوطن العربي بيبقوا نايمين، فمفيش حد كتير بيقدم على الوظائف، والمنافسة بتكون أقل. ده الوقت اللي بقدر استفيد فيه من الفلتر ده.
• فلتر الـ Number of Proposals: وده فلتر بيساعدك تختار الوظائف حسب عدد الفريلانسرز اللي مقدمين عليها. ومهمتك دايماً إنك تحاول تقدم على الوظائف اللي قدم عليها عدد أقل من الناس وتبعد عن الوظائف اللي قدم عليها عدد كبير لإن منافستها أكبر.
• فلتر الـ Project length: وده الفلتر اللي بتحدد منه انت مستعد تشتغل على مشروع مدته اد ايه. والفلتر ده هيفرق معاك لو انت طالب لإنه هيساعدك تحدد مدة مشروع مناسبة ليك بعيداً عن أوقات امتحاناتك.
• فلتر الـ Hours Per Week: وده الفلتر اللي بتحدد منه انت متاح وقت اد ايه كل أسبوع للشغل. عشان متزنقش نفسك في مدة كبيرة انت مش هتقدر عليها. بس لو انت قادر ومتفرغ فسيب الفلتر ده فاضي ودور على الوظائف من غيره.
• فلتر الـ Job Duration: ده فلتر بيساعدك تبدأ شغل مع العميل كفريلانسر في البداية بالقطعة مثلا، وفيما بعد يقدر العميل يقرر لو هو عايزك تشتغل معاه بعدد ساعات معينة وبشكل ثابت لفترة معينة وهكذا. والأفضلك في البداية انك تتجاهله لإنك بتدور على أي وظيفة ودي تفصيله مش هتفرق معاك اوي.

بس غير الفلتر اللي موجود على الشمال وفيه كل الفلاتر اللي بتختار منها دي، فهتلاقي فلتر تاني في بداية الوظائف فوق على اليمين، الفلتر ده بيساعدك ترتب الوظائف المعروضة قدامك بـ 3 أشكال:

• فلتر الترتيب حسب الأحدث (Sort by Newest): الفلتر ده بيساعدك في ترتيب الوظائف حسب الأحدث والأقرب في النزول. ونصيحة مهمة ليك متقدمش على وظائف قديمة لإن العميل بيكون شاف بروبوزالز كتير جداً وبدأ يختار فريلانسر بالفعل، فأي حد هيقدم جديد مش هيفرق معاه.
• فلتر الترتيب حسب الأنسب ليك (Sort by Relevance): الفلتر ده تقدر تستخدمه وهيساعدك تلاقي وظائف مناسبة لمهاراتك وخبراتك اللي انت كاتبهم على البروفايل بتاعك لإنه بيحاول يماتش متطلبات العميل مع مهاراتك. ونظراً إن العميل ممكن ينزل وظيفة مناسبة ليك جداً لكنه مش محدد بعض الحاجات اللي الفلتر قادر يركبها عليك فانت ممكن تضيع بعض الفرص المناسبة ليك جدا بسببه، فالافضل متعتمدش عليه في البحث.
• فلتر الترتيب حسب مدفوعات العميل (Sort by Client Spent): الفلتر ده بيساعدك ترتب الوظائف عن طريق كمية الفلوس اللي العميل صرفها على الموقع. وكل ما العميل يصرف أكتر كل ما هيظهر في البداية، وده هيسهل عليك كتير. لإنه هيظهِرلك أتقل العملاء اللي بتنزل وظائف ليها علاقة بمجالك. ولكن عيب الفلتر ده الوحيد هو إن الوظائف ممكن تكون قديمة أو جديدة، يعني ممكن تلاقي وظيفة من يومين ووظيفة من شهر، وده هيخليك تاخد وقت عشان تحدد إيه الوظيفة اللي مستاهل تقدم عليها وإيه الوظيفة اللي لا.

قدم عن طريق الـ Connects

عيب أبوورك القاتل هو فكرة الكونكتات. والكونكتات دي هي عُملة موقع أبوورك وبيتم استخدامها في التعامل مع العملاء والتقديم على الوظائف. وليها استخدامات تانية زي إنك تدفع للموقع مقابل خدمة إنه يسوقلك أكتر كفريلانسر على الموقع مثلا.

أول ما تعمل الاكونت بتاعك، أبوورك بتديك 50 كونكت مجانية تقدر تستخدمهم في البداية. وبعد كده هتديك 10 كونكتات مجانية كل شهر. وانت تقدر تشتري كونكتات بنفسك في أي وقت، وسعر الكونكت الواحد 0.15$.

ولما تيجي تقدم على الوظائف هتلاقي التقديم نفسه عشان بس تبعت البروبوزال للعميل بعدد معين من الكونكتات. في وظائف التقديم فيها بـ 4 كونكتات، وفي بـ 8 كونكتات، وفي بـ 16 كونكت كمان. علشان كده انت محتاج تختار الوظيفة اللي هتقدم عليها بعناية شديدة قبل ما تقدم بالفعل، لإن في النهاية التقديم على أبوورك بفلوس، ولكن فلوس غير مباشرة.

البروبوزال بتاعك هو عرض العمل اللي بتقدمه للعميل عشان تقنعه يختارك انت للوظيفة دي. ونظراً لشراسة المنافسة على الموقع فالبروبوزال ده أكتر شيء انت محتاج تهتم بيه لو عايز فعلاً تجذب العميل ليك. لإنه الشرارة اللي هتقيد نار بعد كده، والبداية اللي هتخلي العميل يدخل البروفايل بتاعك ويشوف معرض أعمالك وخبراتك، بعدها يقرر هو عايز يكلمك عن تفاصيل الوظيفة ولا لا.

في البروبوزال بتاعك بتكتب للعميل إن عندك الحل لكل مشاكله، وإنه لو اشتغل معاك مش هيعاني من المشكلة اللي بتواجهه دي تاني (وخد بالك إن ده فعلاً اللي المفروض تكتبه، مش بتكتبله اد ايه انت شاطر في مهاراتك ومفيش منك اتنين). فأهم جزء هتوضحه في البروبوزال هو فهمك لمشكلة العميل وقدرتك على حلها، بعدها في سطر سريع هتوضحله مؤهلاتك وليه انت مناسب للوظيفة دي.

البروبوزال بتاعك على أبوورك بيتقسم لجزئين:

• جزء الـ Terms اللي بتشارك فيه مع العميل متطلباتك خلال المشروع ده، سواء متطلباتك المادية، أو كمية الوقت اللي هتقدر تديه للمشروع.
• جزء الـ Cover Letter وده الجزء اللي بنكتب فيه عرض العمل للعميل، وأول حاجة العميل بيشوفها في البروبوزال بتاعك.

ولو عايز تعرف أهم النصائح اللي تساعدك تكتب بروبوزال قوي يشد العملاء ليك ويساعدك تتقبل في أكبر عدد من الوظائف اللي بتقدم عليها فالمقال ده هيساعدك “اسم المقال”

الانترفيو على أبوورك مش مرحلة أساسية عشان يتم قبولك في الوظيفة. أغلب العملاء بيقبلوا فريلانسرز للوظائف بالفعل من غير إنترفيو. فلو جاوبت على اسئلة العميل كلها في البروبوزال بتاعك بشكل واضح، وضفت كل التفاصيل اللي انت هتقدمهاله فغالباً العميل مش هيطلب منك إنترفيو وهيبدأ شغل معاك فوراً. وفي أغلب الأوقات لو العميل لسه عنده أسئلة بيتواصل معاك برايفت وبيعرف كل الإجابات اللي محتاجها عن طريق الشات ويوظف بعدها الفريلانسر من غير إنترفيو!

ورغم كده بعض العملاء بترتاح أكتر لفكرة الإنترفيو. وبيحبوا بعد ما يُعجبوا بالبروبوزال بتاعك إنهم يدخلوا معاك انترفيو عشان يتناقشوا معاك في أفكارك، ومُقترحاتك، و ازاي هتنفذ الوظيفة دي على أكمل وجه. وفي كلا الحالتين انت لازم تكون جاهز!

ودي بعض النصائح المهمة اللي انت محتاج تطبقها عشان العميل ينبهر بيك:

• خليك احترافي لأقصى درجة مُمكنة واظهر احترافيتك للعميل. عن طريق إنك تلبس فورمال، وتبقى جاهز في الوقت اللي اتفقتوا عليه، وهكذا. 
• ذاكر وظيفة العميل كويس جداً قبل ما تدخل الإنترفيو وخليك جاهز تسأل اسئلة قوية هتساعدك في الوظيفة.
• اتعرف على العميل أكتر وذاكر البراند بتاعه، واعرض عليه أفكار ومقترحات هتساعده فعلا علشان يحس انك مهتم.

ونظراً إن الوصول لمعلومات عن العميل أو عن البراند بتاعه مهمة مش سهلة، فجرب تقلب في وظايفه السابقة وفي الفيدباك بتاعه اللي موجود على الاكونت الخاص بيه عشان توصل للمعلومات دي. 

في المرحلة دي، انت بالفعل عملت أكونت على الموقع، ونهيت أغلب المعلومات اللي محتاج تكملها في البروفايل بتاعك، ودورت وقدمت على الوظائف المناسبة ليك، واتقبلت بالفعل في أول وظيفة. بس بعد القبول، وظيفتك الأولى هيكون شكلها ايه؟ وهيحصل فيها ايه؟

هتستخدم شات أبوورك للتواصل مع العميل
تقدر تتواصل مع العملاء دايماً عن طريق الشات الخاص بموقع أبوورك وتتابع عليه الشغل بالكامل، وتقدر تشارك عليه الماسجات، المكالمات الصوتية والفيديو، الصور، التسجيلات،وغيرها. من لحظة ظهور عميل محتمل، أبوورك بيخصصلك شات مع العميل ده تتواصل معاه فيه.

وخليك مهتم دايماً إن في مرحلة ما قبل العقد المفتوح يكون التواصل بينك وبين العميل داخل موقع أبوورك، علشان لو حصل عكس كده ابوورك قادرة تقفلك الأكونت بتاعك لان ده ضد سياستها. وبالفعل التواصل على أبوورك بيساعدك تحافظ على أمانك وبيقلل من خطر إنك تتعرض للنصب أو أي تصرفات ضارة تانية.

أبوورك هتفتح عقد بينك وبين العميل

على موقع أبوورك، الشروط اللي بتحددها في البروبوزال بتاعك من البداية وانت بتبعت الـ Cover Letter  بتتحول لعَرض من العميل. العرض ده بيكون اقتراح رسمي بينك وبين العميل، ودي بتكون آخر خطوة بعد كل الشد والجذب اللي كان بينك وبين العميل علشان يوظفك. يعني بعد الانترفيو وبعد الرسايل الغير الرسمية اللي كانت بينكم.

العرض ده بيأكد على تفاصيل الشغل نفسه. زي طريقة الشغل، شروط الدفع، التسليمات، والجدول الزمني. وبمجرد ما انت بتقبل العرض، بيتحول لعقد مفتوح ملزم بينك وبين العميل. ووجود عقد عمل مفتوح شيء في مصلحتك، لإنك تقدر ترجع لكل بنوده وشروطه خلال فترة الشغل لو حصل أي خلاف بينك وبين العميل.

ابسط العميل 

فكرة إنك مريت بكل المراحل اللي فاتت والعميل قبلك في الوظيفة فلا شك إنك جامد في مجالك!

بس الشطارة المهنية دي مش معناها إنك هتبقى شاطر في هندلة العميل. دي مهارة تانية خالص انت محتاج تتعلمها وتبذل مجهود في تقديمها بأحسن شكل. لإنك محتاج تدي العميل فرصة يحس إنه اختار شخص رائع للوظيفة وحلال فيه كل جنيه هو دفعه.

ودي فرصتك علشان تعرف ازاي تعيّش العميل الفرصة دي وتتواصل معاه صح، واقدر اساعدك بشوية النصايح دي:

• حدد للعميل توقعاته: قبل ما تبدأ شغلك مع العميل وضحله انت هتقدمله ايه، وقوله هو المفروض يستنى منك ايه، واستلم منه مثال للنتيجة اللي هو عايز يوصلها في النهاية. علشان وقت التسليم ميتفاجئش بنتيجة مختلفة تماماً عن اللي هو كان متوقعها.
• وضح للعميل عملية المتابعة: قبل بداية الوظيفة حدد مع العميل عملية المتابعة هتتم ازاي وكل اد ايه. علشان هو يبقى مطمن انك فعلاً شغال على المشروع بتاعه وبيتابع معاك أول بأول. وعشان انت تعدل معاه على طول لإن ده أسهل من إنك تعدل في النهاية. 
• اعمل خطة طواريء: أغلب الوظائف مش بتتم بالسهولة والسلاسة اللي بتتوقعها، دايماً هتلاقي نفسك بتواجه مشاكل في الوظيفة نفسها أو مع العميل. فقبل ما توصل للمرحلة دي اهتم إنك تحط خطة طوارئ بكل السيناريوهات اللي ممكن تحصل وازاي ممكن تحلها.

اطلب من العميل فيدباك

خلصت وظيفتك الأولى على أبوورك مع العميل؟ ألف مبروك يا صديقي، ده وقت الفيدباك!

الفيدباك اللي العميل هيكتبه عنك سواء سلبي أو إيجابي مهم جداً، لإنه هيساعدك تطور من نفسك وتحسن المشاكل اللي العميل واجهها معاك فعلاً.

وخليك عارف إن سُمعتك على موقع أبوورك أو أي موقع من مواقع العمل الحر مقترنة بتقييماتك، لأسباب كتير:

• بتساعد العملاء اللي عايزين يشتغلوا معاك ياخدوا فكرة عنك
• دليل حقيقي من ناس تانية إنك فعلاً عندك المهارات والخبرات اللي بتقول عليها
• تأكيد إنك فريلانسر محترف وموثوق فيه للشغل

ولو مش عارف تطلب الفيدباك من العميل، أنا عندي طريقة بسيطة ممكن تساعدك. بعد ما تخلص المشروع، ابعتله رسالة مضمونها إن الفيدباك ده مهم ليك شخصياً، وقوله إنك مستنيه يكتبلك فيدباك لأنك بتحب تراجع التقييمات دي وتفتكر شغلك معاه، وكمان بتحب بين كل فترة والتانية تكلمه وتسأله لو تقدر تساعده في أي حاجة تانية في المستقبل.

بالطريقة دي، العميل هيحس إنك شخص محترم وهيبقى متحمس إنه يكتبلك فيدباك حلو. عشان كده، متتكسفش تطلب من العميل تقييمك وجرب الطريقة دي.

وظيفتك الأولى مش هتمشى بالحرف زي ما انت مجهزلها بالورقة والقلم، بل هتمر بمشاكل كتير جداً بدايةً من إنك تعرف تدور صح على الوظيفة اصلاً، لحد ما تسلّم العميل الشغل ويحولك الفلوس اللي بتحلم بيها من أول يوم ليك على أبوورك.

بس كل اللي عايز اقولهولك هو إنك تحاول مرة واتنين وتلاتة، وشوف إيه الاخطاء اللي عندك وحاول تصلحها، وشوف الناس التانية بتعمل ايه واتعلم منهم. بس أهم شيء هو إنك تحاول لمدة لا تقل عن 3 شهور قبل ما تقرر إنك مش حابب تكمل، وبالتوفيق ليك يا صديقي ^^