الخبرة اللي بتكتسبها من العمل على مواقع العمل الحر من أهم الأسباب اللي بتساعدك تتفوق وتكْبر أكتر كفريلانسر عشان بتعرّضك لأسلوب شغل مختلف ولجنسيات عملاء مختلفين، ومع كُتر مواقع العمل الحر هتلاقي نفسك مُشتت ومش عارف إيه المناسب ليك.
.
خليني أديك نصيحة كشخص إشتغل سنين على منصة Upwork وتم اختياره ك top rated فريلانسر على الموقع، إن Upwork أحد أهم وأمتع المواقع اللي ممكن تشتغل عليها، عشان كده هشرحلك إزاي تبدأ شغل على Upwork وإيه بداية طريقك عشان تجيب أول عميل.
.
.
1- خلي البروفايل بتاعك يتقبل
.
قبل ما تعمل أكونت على Upwork هتحتاج الأول تقدم طلب إنهم يقبلوك على الموقع وده بيتم على أساس المعلومات الموجودة على البروفايل بتاعك اللي بتقدم طلب بيه، و البروفايل بتاعك بيتكون من بياناتك ومعلوماتك الشخصية بس هتهتم بتفاصيلها بشكل معين يخلي الموقع يقبلك على طول.
.
ديه نبذة عن التفاصيل اللي محتاج تعملها وتاخد بالك منها عشان تتقبل علي طول:
.
- هتقدم بإيميل خاص بالشغل مش بإيميلك الشخصي لإن ديه نقطة مهمة بالنسبة للموقع وبتقيس مدى جديتك في دخول سوق العمل الحر
- ركز على إنك تكتب إسمك صح من غير أرقام عشان يتوافق مع إسمك اللي في بطاقتك واللي هيطلبوها منك في خطوة مستقبلية
- وانت بتختار مهاراتك إختار أقصى عدد من المهارات اللي ممكن تقدمها للعميل وكل المهارات الفرعية اللي ليها صلة بمجالك، لإن ده هيعلي نسبة قبولك.
- لما يسأل على مستواك في المهارة اللي اختارتها دايما اتجه ل intermediate أو expert عشان تتجنب تقليل نفسك قدام الموقع أو ياخدوا إنطباع إنك ضعيف في المجال فيرفُضوك
- تملى كل البيانات المطلوبة منك بنفسك وبشكل دقيق وبكل صراحة عشان تخلي الأكونت بتاعك مكتمل وواصل ل 100%
- في إختيار السعر حدد سعر معقول ومتختارش أقل رقم عشان العملاء مينفروش منك أو يحسوا إنك بتقدم خدمة قليلة
- قدم بورتفوليو محترم وفيه مش أقل من 3 مشاريع مميزين ليك ومنظمين
- لو واخد كورسات أو شهادات مميزة حطها في الأجزاء المخصصة ليها عشان دا هيزود نسبة قبولك
وتقدر تعرف ازاي تخلي البروفايل بتاعك يتقبل من خلال الفيديو ده
.
.
2- اكتب ال About بتاعك
.
الوصف بتاعك من أهم الحاجات اللي لازم تاخد بالك منها على البروفايل لإن ديه أول حاجه عين العميل بتروحلها، عشان كده لازم تكون دقيق وانت بتكتب الوصف، ويكون بيضم كل الحاجات اللي عايز العميل يعرفها عنك، وتكتبه بشكل محترف كانك بتبيع نفسك للعميل وبتقنعه أد إيه هو محتاجك وإنك مميز في اللي بتقدمه من غير ما تمدح في نفسك بشكل مباشر، ولازم انت تكتب الوصف بنفسك وتعدله مرة واتنين وتلاتة لحد ما توصل للشكل اللي يعجبك واللي انت شايفه professional كفاية، وطبعا متنساش تحطه في الآخر على جرامرلي لتجنب أي أخطاء لغوية أو إملائية.
.
.
3- ظبط البورتفوليو بتاعك
.
البورتفوليو هو أهم جزء في البروفايل بتاعك لإنه الجزء اللي بيبين للعميل إيه خبراتك وانت بتقدر تعمل إيه وشطارتك واصلة لفين، ومش هتحتاج في البورتفوليو أكتر من 6 مشاريع، بس هتحتاج تحطهم بكل تفاصيلهم.
.
.
4- اتكلم عن خبراتك السابقة
.
لو عندك خبرة قديمة في المجال اللي بتشتغل فيه زي إنك اشتغلت في مكان تاني قبل كده تقدر تضيف ده فى البروفايل بتاعك بحيث تكون نقطة قوية ليك كفريلانسر وتبين إن خبرتك في المجال كبيرة، وهتفرِق مع العميل جدا لما يلاقيك خبرة في المجال وعندك خبرات سابقة.
.
5- ضيف فيديو تعريفي بيك
.
بسبب إن الشغل على Upwork بيتم أونلاين، والعميل عمره ما هيعرف يشوفك أو يعملك إنترڤيو، Upwork قررت تحل المشكلة ديه وتضيف خانة تقدر تعمل فيها فيديو تعريفي عن نفسك وعن شغلك وخبرتك، وده جزء بيفرق جداً مع العميل في إختيارك قبل الشغل وفي نجاحك وقبول البروبوزال بتاعك اللي بتقدمه قبل الشغل.
.
الفيديو مش هيكون طويل تقريبا من 30 ل 60 ثانية وهدفه كله إنك متكونش شخص مجهول للعميل وتعلي نسبة قبوله ليك.
.
هتقول إيه في الفيديو؟
.
الفيديو هتعرّف فيه نفسك بشكل سريع وهتعرّف العميل إنت بتقدم إيه وإيه هي خدماتك اللي بتعرضها، وهتتكلم عن خبرتك في المجال وبقالك اد ايه بتشتغل فيه عشان كل ما المدة زادت كل ما خبرتك زادت، والتون اللي هتتكلم بيها هتبقى حسب نوع العميل اللي انت بتستهدفه.
.
الخلاصة
.
وبكده تكون خلصت مرحلة التقديم على Upwork وخلصت البروفايل بتاعك من جميع الجهات،المرحلة الجايه بتكون كتابة بروبوزال قوي عشان تبدأ فعليا تقدم على شغل والعميل يدخل يكلمك وتبدأ أول مشروع ليك، وهتلاقي مقال كامل عن إزاي تكتب بروبوزال قوي يعلى نسبة قبولك هنا، وبالتوفيق إن شاء الله.
