أول ما بتنزّل أي أبلكيشن وتلاقي الصفحة الخاصة بالشروط والأحكام تلقائياً بتعديها وتفضل تدوس Next وتوافق على كل الشروط من غير ما تقرأها، وده عادي عشان الأبلكيشن اللي بتنزله مش بيكون بالأهمية الكبيرة اللي تخليك تنتبه لشروطه بشكل كبير، بس هل نقدر نعمل ده مع مواقع العمل الحر أما نعمل عليها أكونت ونبدأ شغل؟

الحقيقة إنه لا انت مينفعش تعمل ده خالص لإن ده مكان شغل جدي والشروط والأحكام فيه بتضمن حقوقك وحقوق العميل ونظراً للتعامل الكبير مع الفلوس والماديات فإدارة الموقع بتكون صارمة أوي في قراراتها، لدرجة إنك لو عملت مشكلة كبيرة إدارة الموقع تقدر تمسحلك الأكونت بتاعك بالكامل من غير أي إنذار. 

طب إيه الأسباب اللي ممكن تقفلك الاكونت وإزاي تتجنبها؟

1- بياناتك الشخصية

أساس شغلك كفريلانسر هو المصداقية يعني تكون انت فعلاً الشخص اللي بيشتغل وبيقدم الشغل بالجودة اللي بتوعد بيها العميل، زي ما العميل هيكون صادق معاك ويكتب تفاصيل عنه ويتعامل معاك بكل مصداقية في الماديات.

مصداقيتك كفريلانسر بيظهر في بياناتك الشخصية وإنك تثبِت فعلاً إنك الشخص المذكور ده فكل اللي عليك تعمله هو إنك تكتب اسمك الحقيقي وتحط صورتك الشخصية وتكتب عنوانك الصحيح، ولو حصل وذكرت أي معلومة مش حقيقية في بياناتك ديه فبعد المراجعات المتتالية من الموقع إدارة الموقع هتكشف ده وهتقدر بكل بساطة تقفلك الأكونت بتاعك بحجة عرض معلومات غير صحيحة. 

2- الفيدباك المزيف

وده عبارة عن فيدباك مزيف عميل أو صديق ليك بيقدمهولك بالتعاون معاك بعد ما ينشر فرصة مزيفة وانت تعمل نفسك بتقدم عليها وتسلم تاسك مزيف وبعدها يكتبلك فيدباك كبير يشكرك فيه على الشغل المميز اللي قدمتهوله، وبكده هيبقى عندك فيدباك كويس على البروفايل بتاعك يظهِر للعملاء إنك شخص مميز وإن العملاء السابقين كانوا مبسوطين بشغلك وهكذا.

على الرغم إن الحركة ديه تكاد تكون حقيقية وتقدر تعدى منها عدد كبير من المرات بس مع المراجعات المتتالية من الموقع للأكونت بتاعك ولأدائك ولشغلك السابق هيقدر في مرة يكتشف الحركة ديه ويقفلك الأكونت بتاعك وكده هتبقى خاطرت بشغلك السابق كله حتى لو كان فيه مشاريع حقيقية ولو حبيت تبدأ تاني في الموقع هتبدأ من الصفر.

3- التعامل خارج موقع العمل الحر 

بعض العملاء هيكلموك في فترة من الفترات على انهم يتعاملوا معاك خارج موقع العمل الحر بهدف الابتعاد عن عمولة الموقع اللي بياخدها منك ومنه ويقنعك إنه هيضمنلك حقك وإنه عايز مصلحتك، ولو فكرت فيها بمنطقية هتلاقي إن معاه حق لإن دا هيخلي نسبة فلوسك أعلى وتواصلك مع العميل أريح. 

بس الحقيقة إنه لا، نسبة العملاء اللي بيكون هدفهم فعلاً هو الهروب من عمولة الموقع وبس بتكون قليلة جداً، لكن المعظم أما بيعرض عليك ده بيبقى بهدف النصب عليك ويقدر ياخد المشروع بتاعه منك على منصة خارجية ويختفي من غير ما يدفعلك، أو يخليك تثق فيه وبعد فترة يبدأ يرخم في دفع الفلوس لحد ما ياخد مشاريع كاملة منك ومتاخدش فلوسها.

الموقع لو عرف بأي شكل إنك شاركت معلومات تواصل خاصة بيك على أي منصة خارجية عشان تتواصل مع العميل برا الموقع هيقفلك الأكونت بتاعك وهيقفل أكونت العميل، لإن الموقع بيقدملك خدمة و بيسهلك فكرة الوصول للعميل ولمشروع مناسب وقصاد ده بينتظر نسبته المادية فالتعاملات الخارجية ديه بتضره، ونصيحة ليك كفريلانسر الموقع هو أكتر مكان آمن ليك لإنه بيضمنلك حقوقك وبيضمن للعميل حقوقه ومحدش يقدر ينصب على التاني بأي شكل.

4- لو عندك أكتر من أكونت على الموقع 

لو فاكر إن كُتر الأكونتات ليك على الموقع هتعلي نسبة قبولك في المشاريع اللي بتقدم عليها ونسبة اختيار العملاء ليك تبقى غلطان، لإنك هتبقى مشتت ومش مركز مع واحد فيهم تقدر تحط فيه كل مجهودك وتظهِره بأحسن شكل، وكمان لو ده حصل فالموقع هيقفلك الأكونتين بتوعك لإن ده ضد سياسة الموقع وده هيجبرلك تبدأ تعمل اكونت من اول وجديد. 

5- وجود أكتر من فيدباك سيء

طبيعي جداً يحصلك مشكلة مع أي عميل ويديك فيدباك وحش سواء كان العميل مرخم معاك أو انت قصرت في المشروع مع العميل، لكن غير طبيعي بالمرة إن أغلب الفيدباك بتاعك يكون فيدباك سيء وتجربة العملاء معاك كلهم مش كويسة لإن ده لو بيقول حاجة فبيقول إنك شخص غير محترف ومش بتقدر العملاء وجودة شغلك ومشاريعك وحشة أو تعاملاتك مع العملاء مش ألطف حاجه.

ونظراً إن الموقع بيبقى همه إن الفريلانسرز الموجودين عليه تكون كفائتهم عالية فممكن مع كثرة الفيدباك الوحش اللي بيأكد للموقع إنك فريلانسر مش مؤهل الموقع يقفلك الأكونت بتاعك، وعشان تتجنب المشكلة ديه والفيدباك السيء حط لنفسك قاعدة إنك متقبلش أي مشروع إنت حاسس إنه مش مناسب ليك أو لوقتك أو لمستوى خبرتك عشان أول ما تقبله وتشتغل عليه فمفيش نقطة رجوع والنتيجة اللي هتقدمها هتظهر على الأكونت بتاعك وهتكون سبب في انك تكبر أكتر وتتحسن أو إنك تقل درجات والموقع يشوفك غير مؤهل للشغل فيه. 

الخلاصة

عشان تشتغل كفريلانسر وتحافظ على الأكونت بتاعك فكل المطلوب منك هو إنك تكون شخص صادق وأمين مع نفسك قبل ما تكون صادق مع الموقع والعملاء، وتقدم الشغل بمجهودك الحقيقي بدون اللجوء لأي استنصاح يضرك ويضر حياتك المهنية، وعشان تقدر تكمل في مجال العمل الحر زود على مبادئك إنك تكون شخص أمين ومتقبلش أي شغل أو أي عميل هيرفض المبدأ ده.