أحد أكبر وأشهر موقع من مواقع العمل الحر هو Upwork، زي ما إحنا عارفين إنه يُعتبر مكان بيجمع عدد كبير من الفريلانسرز والعملاء عشان يلاقوا بعض بشكل أسرع وبإحترافية أكتر ويقدروا يوظفوا بعض ويشتغلوا على مشاريع سوا، وزي ما الموقع بيجمع فريلانسرز وعملاء مميزين، ف Upwork برضو وللأسف بيضم بعض المحتالين والنصابين.
دول عبارة عن شركات أو أشخاص بينصبوا على بعض الفريلانسرز بشكل معين يؤدي إلى إنهم ياخدوا منك تاسك أو مشروع جاهز من غير مايدفعوا فيه جنيه، أو زي بعض الأشخاص اللي بتعرض فرص عمل مزيفة بهدف جمع المال وخلاص.
عمليات النصب موجودة على الموقع ب 3 أشكال:
- إن العميل يطلب منك ديبوزت أو فلوس مبدئية ويضمنلك بيها إنه هيختارك انت لما يعلن عن المشروع بتاعه على المنصة.
- إن العميل يطلب منك شغل تجريبي من غير فلوس بحجة إنه عايز يشوف مستواك أو يشوف جزء من شغلك، وبعد ما تقدمله المشروع ياخده ويختفي تماماً، وأديك قدمتله المشروع وهو مدفعش فيه جنيه.
- إن العميل يجر رجلك في إنه عايز يتعامل معاك برا منصة Upwork عشان يحولك فلوسك احسن والموقع مياخدش نسبة منه، بس الحقيقة الشغل برا الموقع دا بيعرضك لعملية نصب لأن طول ما انت موجود جوا الموقع فبشكل أول بآخر الموقع هيضمنلك حقك.
لو لاحظت أي عملية من العمليات اللي فوق ديه تقدر تبلغ عنها فوراً وتعمل ريبورت لإدارة الموقع وهما بيبعتولك يسألوا عن كل التفاصيل اللي تعرفها وبيتم التحقيق في ده ولو الموضوع فعلاً صحيح بياخدوا الإجراءات المناسبة وبيتم حل المشكلة.
طب إزاى تتجنب عمليات النصب ديه ومتقعش فيها من البداية؟
1- افهم دور الموقع الحقيقي في شغلك كفريلانسر
دور Upwork بينك وبين العميل ببساطة هو إنه بيلعب دور الوسيط مش أكتر، بيوفر عليك تعب ومشقة وإرهاق الجري ورا العملاء والبحث المستمر على مشاريع جديدة.
طب بما إن Upwork أحد أكبر وأشهر المواقع إزاي يكون عليه نصابين والموقع ميمنعش ده أو يحميني منه؟
ببساطة عمليات النصب ديه بتتم بشكل غير معروف وبطرق كتير مش سهل أبداً الموقع يمنعها تماماً بس الموقع مشكور في إنه بيحاول ينهيها ويراجع أي أكونت أو أي فرصة إتعمل عليها ريبورت، معنى كده إن الموقع آمن بنسبة كبيرة ومش معنى إن عليه عمليات نصب إن الموقع بالكامل نصاب.
طب أدام الموقع آمن أنا اطمنله وأعمل حسابي إن لو وقعت في أي فخ الموقع هيجيبلي حقي؟
الحقيقة إنه لا، انت مينفعش تطمن للموقع أوي كده لإن زي ما قولنا عمليات النصب هي عمليات فردية بالكامل والموقع غير مسئول عنها إطلاقاً ولو اتنصب عليك الموقع مش هيرجعلك فلوسك أو حاجه، هو هيكتفي بإنه يقفل أكونت الشخص ده.
ولحد هنا نكون وصلنا لنقطة مهمة جداً، هي إنك لازم تقرأ شروط وتعليمات الموقع -اللي بالمناسبة فيها باند بيقول إن الموقع غير مسئول عن أي تعاملات مش صحيحة هتحصل بينك وبين أي عميل- وتعرف انت حاطط نفسك في بيئة شكلها عامل ازاي وايه حقوقك وايه واجباتك وتحدد على أساسها قراراتك وتعرف إنت واجب عليك ايه وتاخد احتياطاتك من إيه.
2- متتواصلش مع العملاء خارج الموقع
هتلاحظ بعد فترة من الشغل إن شريحة من العملاء بيطلبوا الإيميل الخاص بيك أو وسائل للتواصل معاك خارج الموقع بحيث تشتغلوا عليها سوا ويكون التعامل بينكم أسهل وتوفروا النسبة المادية اللي الموقع بياخدها منك ومن العميل.
أحياناً ممكن العميل يكون أمين فعلا ويعمل ده وتبقى ديه نيته الوحيدة، وممكن بنسبة أكبر يكون العميل ده نصاب وبيعمل كده عشان يستلم منك المشروع من غير ما يسلملك الفلوس، وممكن فعلاً في الأول يسلملك فلوس المشاريع لحد ما تثق فيه بعدها يختفي تماما ويضحك عليك ومتاخدش فلوسك منه.
عشان كده أسلم حل دايما هو تعاملك وتواصلك مع العميل داخل الموقع عشان يبقي في إثباتات والموقع يقدر يجيبلك حقك في أي مشكلة ممكن تحصل، وبالمناسبة الموقع لو عرف بأي شكل من الأشكال إنك تبادلت مع العميل وسائل تواصل خاصة بيك هيقفلك الأكونت بتاعك ويقفل أكونت العميل.
3- متشتغلش من غير ما تاخد فلوس
الشغل على Upwork نظامه مختلف بحيث إن الفلوس بتتبعتلك على فترات مش آخر المشروع عشان تتجنب الشغل على مشروع والعميل يكنسله في الآخر.
لما بتيجي تشتغل على أي مشروع، المشروع بيتقسم على كذا مرحلة وبتسلم العميل كل مرحلة لوحدها وتاخد عليها الفيدباك والتعديلات والفلوس كمان لو العميل موافق على الشغل ده، النقطة هنا هي إنك متشتغلش على نقطة أو تدخل في مرحلة جديدة غير لما تضمن إن العميل وافق على المرحلة القديمة وحولك فلوسها زي ما انتوا متفقين على الرقم عشان بعض العملاء ممكن تلعب في الجزء بتاع تسليم الفلوس بشكل أو بآخر وتكتشف بعد ما تخلص المشروع إن الفلوس مش هتجيلك.
4- ابحث عن العميل
قبل ما تشتغل مع العميل خليك ذكي وادخل شوف مين ده، هل هو شخص قدم فرص كتير على الموقع؟ هل الريت بتاعه حلو؟ هل الفيدباك اللي مكتوب على البروفايل بتاعه كويس؟ هل بينزّل فرص حقيقية وأقدر أثق فيه؟ لو إجابتك على كل الأسئلة ديه اه فإبدأ اتعامل مع العميل ده وانت مستريح.
5- متقبلش فلوس من أي منصة خارج الموقع
أحد أكبر مميزات Upwork هي الأمان المادي اللي بيقدمها للفريلانسرز بحيث انك تقدر تتابع الفلوس من أول ما تتبعتلك من العميل لحد ما تروح على حسابك البنكي من غير أي مشاكل، لو قابلت عميل عايزك تاخد فلوسك بأي طريقة غير إنه يبعتهالك على الموقع فديه بنسبة كبيرة عملية نصب، إما عشان ميحولكش الفلوس أو عشان يخترق حسابك بأي شكل من الأشكال عن طريق إنه يبعتلك لينكات او فايل فيه فايرس أو أيا يكن.
الخلاصة
الخبرة اللي هتاخدها من التعامل على مواقع العمل الحر هي خبرة مميزة جداً وهتساعدك تطور من نفسك وتركز مع مجالك أكتر من تركيزك على جذب عملاء ومشاريع لإن دا اللي الموقع بيقدمهولك، بس عمليات النصب والإحتيال ممكن تقلل فرحتك بالخبرة اللي بتكتسبها خصوصاً لو مريت بيها قبل كده، عشان كده إعتمدنا نكتب المقال ده ونعرفك دايما إن الوقاية خير من العلاج.
