شغلك كفريلانسر بطبعه بيخلي عندك مسئولية أكبر لإنك مدير نفسك فبيجبرك تقسم وقتك ومجهودك على كذا جزء بدايةً من مجهودك في المجال اللي بتشتغل فيه نفسه نهايةً بالمجهود اللي بتبذله في تسويقك لنفسك وفي التعامل مع العملاء.

وسط العملية ديه وداخل كل جزء من الأجزاء ديه وارد جداً تغلط ويبقى في مشاكل كتير جزء منها بيتحل وجزء لا، وده لا يعتمد على كونك مبتدئ أو محترف لإن الأخطاء ديه شائعة جداً عند معظم الناس، وبداية طريقك عشان متقعش في المشاكل والأخطاء ديه بيكون إنك تعرفها كويس وتحاول تتجنبها ولو مقدرتش تتجنبها تعرف إزاي تحلها وتتعامل معاها صح بشكل ميأثرش عليك كفريلانسر ولا على شغلك مع العملاء. 

في المقال ده هكلمك عن أشهر 10 أخطاء ممكن تقع فيهم وإزاي تتجنبهم

1- متسيبش شغلك كموظف مرة واحدة

الماديات شيء مهم جداً في حياتك وعشان نكون واضحين شغل العمل الحر بيحتاج وقت عشان تقدر تعتمد فلوسه كدَخل خاص بيك وتعتمد عليه كُلياً من غير الحاجة لمصدر دخل تاني، عشان كده يُفضل تنسحب من شغلك بشكل تدريجي يتناسب طردياً مع مقدار تقدمك في مجال العمل الحر. 

والوقت المناسب اللي تنسحب فيه من شغلك كموظف بشكل تام بيكون وقت ما تحس إنك قادر تعيش بالدَخل اللي مجال العمل الحر بيدخلهولك كل شهر مع وجود مُدخرات تكفي حاجتك لمدة 6 شهور قدام لو حصل أي ظرف مفاجئ، وقتها تقدر تعتبر نفسك آمن مادياً.

2- مفيش هدف واضح 

مجال العمل الحر مش سهل وبسيط زي ما مواقع التواصل الإجتماعي بتظهره، بل بيحتاج مجهود وصبر وتعب كبير عشان توصل لنقطة معينة ترضى فيها عن نفسك وعن مستواك، في نص الطريق ده هتقابل مصاعب ومشاكل هتخليك تفكر تسيب المجال ده ولو معندكش هدف واضح قدامك ثابت وبتسعاله، مع أول مشكلة هتسيب الشغل وهتقرر إنك مش هتكمل.

فتحديدك لهدفك هو الأساس اللي تقدر تبني عليه كل حاجه بعد كده وهو اللي هيساعدك تختار الشغل المناسب لمبادئك وأفكارك، والهدف ده لازم يكون واضح ومحدد مش هدف عام زي إنك عايز فلوس أكتر أو عايز اسم بس أو شايف المجال مُريح ليك وخلاص، لا انت لازم تكون صريح مع نفسك وتحدد الهدف ده بكل حزم وجدية. 

3- مفيش عقد واضح بينك وبين العميل 

العقد هو أساس الشغل بينك وبين العميل والاتفاق عليه لازم يكون أول خطوة بتتم بينكم لإنه هيوضح كل حاجه العميل طالبها وكل حاجه انت موافق عليها، والعقد بيتكتب فيه كل التفاصيل الخاصة بالشغل ده زي الفلوس والديبوزت وعدد التعديلات ومواعيد التسليم والاستلام وعدد الأيام اللي هتاخدها في العمل على المشروع ده، وكمان بيكون فيه كل تفاصيل المشروع نفسه والعميل بيكتب هو طالب إيه بالظبط أو يعرض نموذج للشيء اللي هو طالبه وما إلى ذلك. 

العقد مهم ليك كفريلانسر، لإنه بيريحك أكتر في الشغل وبيضمن حقوقك وحقوق العميل وكمان بيظهِر احترافيتك في الشغل لإن العميل هيثق فيك أكتر لما يلاقي نفسه بيمضي على عقد بيضمن حقوقه. 

4- مش عارف تحدد سعر ساعتك

عشان تحدد سعر ساعتك بشكل احترافي كل اللي عليك تعمله هو إنك تقرأ مقال دليلك لتسعير خدمتك كفريلانسر وهتقدر وقتها تحدد أسعارك بشكل احترافي وتعرف الأسعار المشابهة في السوق وأمتي تزود اسعارك لما تطور من نفسك.

5- مش عارف قوانين موقع العمل الحر 

أما بتحمل اي ابلكيشن أو بتفتح أي موقع كل اللي بتعمله هو انك بتدوس Next على الشاشة اللي بتظهرلك من غير ما تقرأها واللي بتحتوي على الشروط والأحكام الخاصة بالموقع ده واللي بتعرفّك فيها قوانينها وطريقة تعاملك معاها. 

المختلف معاك المرادي إن ده موقع شغل مش أبلكيشن بتحمله وخلاص، يعني لو روحت شركة عمرك ما هتعمل كده معاها قبل ما تشتغل بل هتقرأ قوانينها وشروطها بالفعل، عشان كده لازم تهتم بصفحة الشروط والأحكام وتهتم بكل كلمة فيها عشان تتجنب أي مشكلة ممكن تحصلك في الموقع ممكن توصل لإنها تقفلك الأكونت بتاعك بالكامل. 

6- العميل دايما على حق

العميل أما بيطلب حاجة بيبقى منتظرها تحصل زي ما هي ودماغه بتكون مصوراله شكل المشروع بطريقة معينة وبيكون منتظره زي ما هو وكل المطلوب منك تعمله إنك تقدمله المطلوب منك بس الا لو انت شايف ان عندك وجهة نظر تانية نظراً لخبرتك في المجال فتقدر تعرضها عليه الأول قبل ما تنفذها ولازم يوافق عليها الأول قبل ما تتنفذ. 

خليك متيقن دايما إن مش كل المشاريع اللي هتشتغل عليها هتكون راضي عنها بنسبة 100% لا في عملاء بيحبوا المشاريع تظهر بالشكل اللي هما شايفينه صح عشان كده مش شرط كل المشاريع اللي بتشتغلها تبقى بتعرض احترافيتك بشكل صحيح وتقدر تحطها في البورتفوليو بتاعك عشان العميل ممكن يعيق ده، ولو شايف لأي سبب إنك مش موافق على شكل المشروع اللي العميل عايزه تقدر ترفضه بكل بساطة وتشتغل في المشاريع اللي تريحك. 

7- مبترفضش أي خدمة قدامك 

في وقت من الأوقات هتوصل لفترة فيها ضغط شغل كبير جداً وتلاقي إن بدل ما كنت بتشتغل على مشروعين في الأسبوع فمطلوب منك 6 ومن فرحتك طبعاً مش هترفضهم وهتشوف إنها فرصة عشان تاخد فلوس أكتر وتحسّن من نفسك ومش هيحصل حاجة لو ضغطت نفسك شوية الإسبوع ده واشتغلت عليهم.

الحقيقة إن فترة زي ديه بتحتاج حسابات دقيقة جداً من قبلها عشان تعرف هل انت فعلاً شخص تقدر تستغل الفرصة ديه بشكل صحيح وتعلي نفسك بيها وتغتنمها؟ ولا انت شخص بتحب النظام أكتر ومش بتعرف تشتغل على أكتر من مشروعين عشان تطلع فيهم أحسن آداء عندك؟

صراحتك مع نفسك في إجابة الأسئلة ديه هتساعدك توصل لهدفك بالشكل اللي يريحك، لو قررت غلط ممكن تلاقي نفسك بتكروت مشاريع ومبتسلمش مشاريع تانية ومش بتلحق تخلص مشاريع تالتة وحاجات كده، ولو ده حصل هتلاقي معدل تسليم المشاريع الخاص بيك قل جداً وبدل ما كانت خدمتك بتظهر في أول صفحة فهتبدأ تظهر في صفح أقل وكل اللي بنيته هيتهد في لحظة. 

8- مبتستثمرش في نفسك

تطويرك لنفسك هو الضمان الوحيد ورا وجودك كمنافس وسط سوق العمل الحر اللي بيضم ملايين من الفريلانسرز، لإن لو معندكش نية تستثمر وقتك في التطوير وتستثمر فلوسك في الكورسات والكتب اللي هتكبرك فانت ممكن تختفي تماماً كفريلانسر بعد فترة بسبب المنافسة الشرسة في سوق العمل الحر. 

تأكد دايما إن كل حاجة هتعرفها وهتتعلمها هتكون تفصيلة مميزة فيك تقدر تفصلك عن غيرك من الفريلانسرز وتخلي العميل يلاحظ ده فيك، في ناس بتقعد شهور تدرس حاجات خارج مجالهم بس هما شايفين إن لو اتعلموها هتفرق في شغلهم وفي شكل المشاريع اللي بيقدموها وده الشخص اللي العميل بيدوّر عليه. 

9- التشتت داخل مواقع العمل الحر المختلفة 

أفضل حل ليك عشان تنجح كفريلانسر داخل مواقع العمل الحر هو إنك تختار موقع واحد بس وتدرسه وتبذل فيه كل مجهودك عشان توصل فيه لنتيجة أكبر وأسرع لكن لو شتت نفسك في كذا موقع مجهودك هيتقسم على كل المواقع ديه ومش هتقدر توصل للاحتراف في مكان محدد.

عشان تختار الموقع المناسب ليك والمناسب لخبرتك ومستواك تقدر تقرأ مقال الفرق بين مواقع العمل الحر المختلفة عشان تعرف أكتر عن مواقع العمل الحر وتقدر تفرق بينهم. 

10- السماح للشغل إنه يسيطر على حياتك

عمر الشغل في حياتنا ما كان كل حاجه، حتى وانت موظف في شركة فدايما بيكون ليك مواعيد محددة بتشتغلها وباقي اليوم بتاعك، عشان توازن بين شغلك وبين حياتك لازم تحط مواعيد محددة للشغل ولتطويرك من نفسك وتبذل أقصي مجهودك فيهم بس وقت الراحة اعمل الحاجات اللي تبسطك وتريحك، وديه الطريقة الوحيدة اللي هتضمنلك المحافظة على تقدمك في مجال الشغل والحفاظ على صحتك النفسية 

الخلاصة

العمل الحر مجال كبير جداً وبيديك الحرية تشتغل فيه بالشكل اللي تحبه في الأوقات اللي تحبها وبالشكل اللي يناسبك، الأخطاء اللي بتقع فيها ما هي إلا خطوة من الخطوات اللي بتمر بيها في طريقك، عشان كده وارد جداً تغلط وتتعثر في طريقك بس بشرط واحد وهو إنك تستغل الخطأ وتتعلم منه.