عملية إختيار العميل للفريلانسر اللي هيشتغل على المشروع الخاص بيه مش سهلة نهائي، لإن حسب إحصائيات Upwork كل مشروع بيقدم عليه من 5 ل 50 شخص فهل طبيعي إن العميل يكلم كل الأشخاص ديه أو يشوف شغلهم كلهم وبعدها يقرر؟
.
الحقيقة إنه لا، العميل بيشوف البروبوزال المتقدم ليه الأول ولو شده بيدخل يشوف شغل الفريلانسر ويبدأ يتواصل معاه.
معنى كده إن ممكن شخص يكون شاطر جداً بس طريقة تقديمه للبروبوزال الخاص بيه متكونش أحسن حاجة فيخسر الشغل ده.
.
عشان كده خليني أعرفك على الخطوات اللي هتساعدك تكتب بروبوزال قوي
.
.
1- اقرأ وصف المشروع بِدقة
.
السبب ورا قراءة الوصف بشكل دقيق هو عشان تتأكد إن المواصفات والمهارات اللي العميل طالبها متوافقة مع مهاراتك كفريلانسر، كمان إنك تقرأ المطلوب بشكل صحيح هيبين للعميل إنك مهتم بمشروعه فعلا ودرست كل كلمة هو قايلها وخطوة تقديمك للمشروع كانت مدروسة مش خطوة عشوائية، وعشان تقدر تحدد إيه اللي العميل طالبه بالظبط وتبين في البروبوزال إن عندك المهارات المطلوبة وهتقدر تحلله المشكلة اللي بتواجهه.
.
.
2- خطوة الترحيب
.
إبدأ البروبوزال بتاعك بترحيب بروفيشنال للعميل وياريت لو بإسمه، تقدر تدخل بروفايل العميل وتشوف الفيدباك اللي الفريلانسرز كتبهوله نتيجة لشغل سابق بينهم، أول ما العميل هيشوف إسمه هياخد البروبوزال بشكل شخصي وهيشوف إنك مهتم بيه كشخص مش كشغل و خلاص لدرجة إنك قلّبت في بروفايله كتير وعرفت توصل لمعلومات تخصه مش واضحة لأي حد فهيحس بالتميز وإنك كاتب الكلام ده ليه بشكل شخصي.
.
.
3- توضيح أسباب المشكلة
.
هتبدأ تتكلم مع العميل عن الشغل اللي هو طالبه وأسباب المشكلة اللي بتقابله، وتشرحله بالتفصيل هو ليه بيواجه المشكلة ديه وهتبين إنك متعاطف معاه، والعميل بيحب جداً إن الشخص اللي قدامه يتعامل معاه على إنه فاهم المشكلة ومقدر أد إيه هي محتاجة مساعدة لحلها، ولحد النقطة ديه مبروك إنت شديت انتباه العميل و تعاطفت معاه وقدّرت احتياجه لحل.
.
.
4- اقتراحات لحل المشكلة
.
هتبدأ تقول للعميل اقتراحاتك لحل المشكلة وتعرفه إنكم لما تشتغلوا سوا هتحلوا ده عن طريق كذا وكذا وتديله الحبل اللي هو بيدور عليه ويبدأ يحس إن فعلا ديه الحلول اللي هو عايزها تتنفذ وإن إنت فاهم المشكلة وفاهم تحلها إزاي وتعرض عليه النتايج اللي هيوصلها لو اشتغل معاك فعلا وقرر يستفاد من الحلول اللي قدمتهاله، كمان هتعرض عليه خططك المستقبلية للمشروع وإيه الترتيب اللي هتمشوا عليه، وهنا بيبان للعميل مدى شطارتك في مجالك وإنك هتقدمله حلول مفيدة فعلا وإن لو اشتغلتوا سوا هيحقق النتيجة اللي هو بيتمناها، وده كله بتعرّف فيه العميل إنك الشخص المناسب للمشروع من غير ما تقول ده مباشرةً.
.
.
5- تعريف عن نفسك
.
بعد ما شديت انتباه العميل ليك تبدأ مرحلة تعريف نفسك بالتفصيل وإنت بتشتغل إيه وإيه الخبرة اللي عندك وتبينله إن كل المهارات اللي هو طالبها في وصف المشروع فعلا متطابقة معاك كشخص وتعرض عليه البورتفوليو بتاعك اللي بيضم أهم وأحسن مشاريع ليك عشان العميل يقدر يشوف نبذة عن شغلك، وكمان هتقوله خدماتك اللي بتعرضها عليه بالتفصيل بس سيب أجزاء مبهمة ليك إنت، هقولك عليها في الخطوة رقم 7 .
.
.
6- إسأل على تفاصيل أكتر
.
زي ما قدرت توصّل للعميل إحساس إنك مهتم بيه لما قرأت وصف المشروع بشكل دقيق وإنك عرضتله مشكلته وأسبابها، تقدر توصّله ده بشكل تاني إنك تسأله عن تفاصيل أكتر للشغل وعن معلومات إنت بتحتاجها كفريلانسر قبل ما تبدأ أي مشروع ولازم تكون الأسئلة ديه مهمة وإنت محتاجها فعلا، والأسئلة اللي بتسألها للعميل بتكون ميزة تاني تبين للعميل إنك فعلا مؤهل للفرصة ديه وإن عندك الإمكانيات المطلوبة.
.
.
7- انهي ب CTA
.
آخر خطوة هتنهي بيها البروبوزال هي سؤال أو كومنت مهم يبقي ربطة وصل بينك وبين العميل تخليه يرجع يكلمك تانى في أقرب وقت ويرد على الأسئلة اللي سألتها أو يسأل على تفاصيل أكتر عن خدماتك، وهنا هيجي دور المعلومات الناقصة اللي سبناها في خطوة رقم 5، واللي كان الهدف منها إنك تخلي العميل يدخل يسألك عليها فيدور حوار بينكوا و تبدأوا شغل على المشروع.
.
الخلاصة
.
لحد هنا دول أهم 7 خطوات هتساعدك تكتب بروبوزال قوي يخلي العميل يختارك إنت دونًا عن باقي الناس، وديه الخطوات اللي حولت نسبة قبول مشاريعي بشكل شخصي من 8% ل 31% مع إني نفس الشخص بنفس المهارات ونفس البورتفوليو وتقدر تعرف اكتر عن خطوات البروبوزال المثالي ومثال عليه من هنا
