- أهمية الــ Profile Overview علي مواقع العمل الحر:
- الــ Hook: أهم جزء فى تعريفك عن نفسك
- الجزء الثاني فى كتابة ال Overview:
- الجزء الثالث فى كتابة ال Overview:
- ليه كتبت أني برفض أشتغل مع بعض العملا؟
- أزاي تقدر تعلّي من فرص ظهورك فى مراكز أعلي؟
- أزاي تبروز مهاراتك قصاد العميل:
- أزاي تختم ال Overview بــ Call to action:
أهمية الــ Profile Overview علي مواقع العمل الحر:
كتابة الـ overview عنّك علي موقع Upwork من أقوي الأسباب اللي ممكن تجعل العميل يختارك للعمل معه علي مشروعه, وممكن تكون سبب (للأسف) أنها تخليه يهرب منّك. وأحيانا (وده المعظم) بتبقي علي الحياد, فهي مش قوية تقنعه, ولا ضعيفة تخليه يمشي. بس بما أن أغلب الفريلانسرز علي مواقع العمل الحر بيعملوا ده, فلو قدرت تتميز وسطهم, هتبقي أقوي بكتير عن أي حد, وبإذن الله هتقدر أنت اللي تقنع العميل بيك دونا عن غيرك.
وده هيبقي هدفنا فى المقال ده, أنك تقدر توصّل للعميل أنك أحسن حد موجود فى المجال ده ليه هو, وتقدر تشده ليك وتخليه يفكّر فيك أنك حد محتمل جدا أنك تشتغل معاه. وده اللي أنا عملته فى الأكونت بتاعي علي موقع Upwork. فأنا الحمد لله قدرت أكون Top-Rated plus علي Upwork, ووصلت لأني أكون أعلي Youtube channel Manager في مصر, ومن أفضل ٣ فى الوطن العربي بفضل من الله. وجاي أوريك أيه اللي أنا كاتبه عن نفسي, وهفسّر كل حاجة كتبتها كنت كاتبها كده ليه, فتقدر أنت كمان أنك تاخد ده كفكرة ليك عن أيه اللي أنت محتاجه تكتبه عن نفسك, يمكن أقدر أساعدك.
الكلام اللي أنا كاتبه عن نفسي هنا قدرت أصيغه بعد ما شفت أفضل ١٥ حد فى مجالي بيكتبوا أيه عن نفسهم, وكنت بحاول أشوف أكتر الحاجات اللي شدتني عندهم, عشان أبدأ أصيغها أنا بطريقتي بطريقة أفضل تناسب الأكونت بتاعي أنا علي الموقع.
وحاول تفتكر دايما أنك المطلوب منك تاخد اللي أنا كاتبه كإلهام ليك لو عجبك حاول تصيغه بطريقتك بطريقة تانية تناسبك وتناسب مجالك أنت, وضيف جزئك الشخصي, لأنك لو بدأت بفقط محاكاة كل حاجة بالتفصيل بدون لمستك أنت, فالعميل هياخد باله من ده علطول أول ما يكلمك, وهيلاحظ أن ده مش كتابتك عن نفسك, ده غير أن Upwork ممكن ترخم عليك لو لاحظت أن سارق الكلام بالظبط, فأنا بعمله كمساعدة تشوف ممكن تستفيد منه بأيه. ويلا نبدأ علي بركة الله.
الــ Hook: أهم جزء فى تعريفك عن نفسك
ودي وظيفتها أنك تشد العميل عشان يكمل قراية, وده اللي أنا كاتبه عن نفسي.
لو لاحظت هتلاقي أن أول 250 حرف عندي خلصوا عند الصورة دي, وده من موقع Wordcounter.com واللي بيعد لينا عدد الحروف المكتوبة, والمفترض أن دول عدد الحروف اللي بعدهم بيبدأ يظهر نقطتين بالشكل ده “..” جنب كلامك, واللي هيبقي لازم علي العميل وقتها أنه يدوس علي بروفايلك عشان يقدر يقرأ باقي الكلام اللي أنت كاتبه عن نفسك. فأنا كنت حريص أني أقدر أقنعه بيا وأشده بقوتي في أول حاجة عشان يبقي عاوز يقرأ أكتر عني. وأفتكر أن العميل لو مقتنعش بيك من البداية, هيكمل قراية فى الباقي وهيسيبك أنت.
أول حاجة هتلاقيني كاتبها فى ال Overview عن نفسي الآتي:
أخدت واحدة من ال Feedbacks اللي العميل سابهالي علي أكونتي, وبدأت بيها بعد ما أختصرتها, عشان أبرز فيها أهم حاجتين عاوز العميل يلاحظهم, وكمان عملتهم Bold عشان أقدر أخلي العميل يلقطهم علطول أول ما يقرأهم
1- Sebaey Is Fantastic
2- Grow my Channel
وقدرت أعملهم Bold علي الرغم من أن Upwork مش بتتيح ده, وده لما رحت لموقع أسمه Unicode text converter, وحطيت الجملة اللي عاوز أعملها Bold, وبعدها نسختها عشان أرجع أحطها تاني عندي بدون أي مشاكل. وحاول دايما تخليها بسيطة بدون لعب فى شكلها كتير, عشان العميل يقدر يقرأها عادي.
وهنا ممكن يجيلنا سؤال, لو أنت معندكش تقييمات علي الموقع خالص, ولسه فى البداية, ممكن تعمل أيه؟
وقتها يا صديقي فأنا هفضّل أنك تبدأ الـ Hook بأنك تشارك العميل أيه أكتر مشكلة بتواجهه فى المجال اللي أنت بتشتغل بيه, وتعرفه أنك فاهم المشكلة دي, وهتساعده فيها, بحيث لما يقرأها يقول: “أيه ده؟ هو عارف حل مشكلتي دي فعلا؟ يعني هيقدر يساعدني؟ خلاص أكلمه ونشوف”
فأنا فى البداية بالفعل كنت بكتب حاجة شبيهة للآتي, وكنت بتعجب العملا جدا, وكنت بقول حاجة فيما معناها:”لو أنت عندك قناة يوتيوب, وبعد ما بتتعب فى التفكير فى السكريبتات وتصوير الفيديوهات ورفعها وفى الآخر مش بتلاقي النتيجة اللي أنت كنت منتظرها, فأنا هنا عشان أقدر أحللك المشكلة دي, لأني صانع محتوي زيك, ومريت بنفس اللي أنت بتمر بيه, وعارف حل مشكلتك”
فكنت هنا بقدر أوري العميل أني مريت بتجاربه, وعندي حل ليها, فكان بيحب أنه يكلمني. فحاول أنت كمان تصيغ ده عندك فى مجالك بطريقتك أنت
ودي صورة للتوضيح عندي لما بحثت عن نفسي, ولقيت أن باقي الجملة كمان ظاهرة “الحمد لله ^ ^ “ وده كان كده أنا مستخدم 278 حرف, فخليك فى الأمان وحاول تكون ما بين 250 – 278 عشان كل اللي عاوز توصله فى البداية يظهر علطول.
الجزء الثاني فى كتابة ال Overview:
نرجع نكمّل هنا لتاني جزء, وهنا كان جزء أستعراض مهاراتي ومحاولة أني أشد العميل أكتر فى المزايا اللي تفرقني دونا عن غيري (حتي لو أشتركت فيها مع غيري, فكنت بحاول أبروزها بطريقة مختلفة) وبدأت أستعرض أني مش حد هاوي, وأني ليا بالفعل تاريخ علي الموقع بكوني Top-Rated Plus (صدقني هي مش الإضافة الأقوي, فمتقلقش لو أنت كنت لسه بتبدأ), وبدأت أعرفه أنه سواءا قناتك لسه بتبدأ وعاوز حد يبدأها صح, أو بالفعل ناجحة وعاوز حد يكمل عليها, فأنا أشتغلت علي الاتنين.
وده من معرفتي بمجالي, فعارف أن العملا هتجيلي فى مرحلتين, سواء لسه هيبدأوا, وعاوزين حد يدير كل حاجة ليهم صح من الأول. أو بالفعل بدأوا بس النتايج فى النص مش أحسن حاجة, فعاوزين حد يتابع معاهم ويحسّن ده. فلازم أنت كمان لو هتستعرض مهارتك ومعرفتك, تكون لامم بأيه اللي هيتطلب منك, وتقدر تعرف العميل أنك بالفعل فاهم فيه وهتقدر تنفذه, وده يفضّل يبقي علطول فى المرحلة التانية زي هنا من كتابة ال Overview عنّك.
الجزء الثالث فى كتابة ال Overview:
الجزء التالت كان جزء مهم أني أستعرض أني مختلف عن باقي الفريلانسرز فى حاجة معينة, وده كان جزء أنا أستلهمته الحقيقة من أقوي منافس ليا فى المجال علي Upwork (وإن كان الحقيقة أنا مش بحب أعتبرهم منافسين, لأن كل واحد فينا ليه رزقه وتوفيق ربنا ليه, بس علي أعتبار السائد يعني ^^). بس هو كان بيبيّن أنه مختلف وأنه مش بس فريلانسر علي الموقع, ده كمان بيعلّم غيره المجال بتاعه, وليه أكتر من كورس بيشرح فيهم المجال للناس, وأشترك معاه عدد كبير من الناس اللي أتعلموا منه. فهنا هو قدر يثبيت نفسه أنه فى مكان تاني مختلف عن الباقي.
وعشان كده قررت أني أنا كمان أبروز المهارة دي عندي, وأني بالفعل عندي السوشيال ميديا اللي بشرح فيها لغيري المجال اللي أنا بشتغله وبساعد الناس بده, والحقيقة أن دي نصيحة مهمة لأي حد بيقرأ المقال ده, لو عندك مهارة معينة أنت متقنها أو حتي بتتعلمها, فحاول تعلّمها لغيرك, وأشرحها, وأنشر شرحك وعلمك ده, لأن بكونها زكاة علم وهتبقي صدقة جارية ليك بعد الممات (بإذن الله), بس كمان هي هتبقي واحدة من أهم الحاجات اللي هتقنع بيها العميل بيك لما يشوفها. لأنك وقتها هتوصّله أنك متقن مجالك لدرجة أن غيرك بيستفيج منك.
وملحوظة علي السريع, أنا أستفدت من السوشيال ميديا جدا في إقناع العملا بيا لما كانوا بيكلموني وبيلاقوني بالفعل مش مجرد حد بيعرض مهاراته, ده أنا بشرحها وليا اللي بيتابعني فيها كمان. فحاول تعمل ده لأنها هتفرق معاك جدا بإذن الله. وده كان السبب لما قفلت ربح اليوتيوب, وأتكلمت أنه مكسبي بيبقي فى مكان تاني, وده لما بقنع العميل بيا أكتر من غيري بسبب أني بشرح اللي بعمله.
ليه كتبت أني برفض أشتغل مع بعض العملا؟
الجزء ده كان أعلي الناس ومنهم Evan Fisher (واللي بعتبره من أفضل الناس فى العالم فى مجال الفريلانس, وكسب أكتر من $2.5M من موقع Upwork) فهو وغيره كانوا بيقولوا دايما أنهم مش هيقدروا يساعدوا كل الناس, وعشان يقدروا يساعدوك فلازم تكون عندك قواعد أساسية تبع المجال اللي بيشتغلوا فيه.
وده كان بيدي أنطباع للعملا أن الناس دي مش هي اللي محتاجاك, وإنما أنت كــ Client اللي محتاجهم, وهتخسر كتير لو مشتغلتش معاهم. وهما أنتقائيين, فمش أي عميل هيساعدوه, ولازم توصل للــ Standards بتاعتهم عشان تبقوا سوا مع بعض.
وهنا حبيت أني أقول أكتر الحاجات اللي بلاقي العملا فى المجال اللي بشتغل فيه بيبقوا فاهمينها غلط ومستنييها تحصل, ولما متحصلش (ومش هتحصل إلا نادرا) بيجيبوا اللوم عليك, مع أنهم هما اللي مش فاهمين. فحبيت من البداية أني أقول لو كنت فاهم أن ده هيحصل, فأحنا مش هنعرف نشتغل مع بعض. لأن المجال مختلف عن فكرك (الخاطئ) ده.
وده اللي أنا كاتبه عندي, واللي ممكن تقتبس منه حاجات تصيغها علي مجالك أنت بإذن الله.
أزاي تقدر تعلّي من فرص ظهورك فى مراكز أعلي؟
الجزء القادم الحقيقة هو كان غرضه أستعمال أكبر قدر من ال Keywords المختلفة اللي أنا عارف أن العملا بيستعملوها لما يبحثوا علي حاجة تبع مهاراتي, وعشان أوصل ليهم كلهم كاملين, وأضمن أني مختار معظم الحاجات, فكنت عملت بحث علي أكتر من 30 وظيفة من أتقل العملا فى الموقع اللي طالبين حاجات تبع المجال عندي, وكنت بقرأ عرض العمل تبعهم كامل, وكل لما ألاقي Keyword جديدة أنا ممكن أستعملها, بروح واخدها عندي علي جنب عشان أحتفظ بيها, وأبقي أفكّر فى النهاية فى طريقة أصيغها بيهم بحيث ميبقوش كــ Spam ويبقي الكلام كله متناسق وبيكمل بعض, لأن لو Upwork لاحظت أنك بتكتب فقط لغرض تكرار ال Keywords فأنت هتبقي فى مشكلة حقيقية منهم, لأن ده مخالف لقواعدهم.
فبالمثل, أعمل أنت كمان ده فى نفس مهاراتك
أزاي تبروز مهاراتك قصاد العميل:
الجزء ما قبل الأخير, كنت بدي العميل فرصة أخيرة لأنه يقتنع بيا, وحاولت أقوله أنه العملا اللي أشتغلوا معايا سابقا كتبوا عني حاجات كويسة جدا, فلو كان عندك بعض التقييمات اللي تقدر تظهرها, هتبقي حاجة عظيمة, لو مكنش, فممكن تقول أن الناس اللي بتشتغل معاك بتحب فيك كذا وكذا.
أزاي تختم ال Overview بــ Call to action:
في النهاية مفيش أفضل من أنك تختم كلامك بــ Call To Action وتديله فرصة تانية أنه يفكّر فيك جديا عشان يشتغل معاك, وكمان تقوله يعمل ده أزاي
وده الـ Full overview عندي لو محتاج تقرأه كامل علي بعض:
أتمني أن المقال يكون مفيد ليك, حقيقي أخد مني وقت عشان أقدر أصيغه بأفضل طريقة ممكن تساعدك, فبالتوفيق ليك يا صديقي, وأفتكر أنك مش لوحدك, وكلنا هنا بنساعد بعض.
