موقع خمسات هو واحد من أهم وأريح مواقع العمل الحر ليك كفريلانسر عربي وبالذات لو مبتدأ، ونظراً إن اللغة السائدة في الموقع هي اللغة العربية ده بيساعدك تركز على مجالك أكتر ومتحسش بأي تشتت لو مهارات التواصل باللغة الإنجليزية عندك مش أقوى حاجة.
كمان خمسات بيديك صلاحيات تساعدك تبدأ حياتك المهنية كفريلانسر مهما كان سنك ومؤهلاتك وخبراتك، بس عشان تقدر تبيع خدماتك فيه بشكل احترافي أكتر ده بيتطلب بعض الخبرة و النصائح اللي ممكن تنقلك نقلة تانية خالص.
ودول أهم النصايح اللي محتاج تعرفها عشان تبيع خدماتك على موقع خمسات:
1- ادرس خدمات الفريلانسرز اللي في نفس مجالك
دايما خطوة الإستكشاف هى اهم خطوة عشان ديه اللي بتساعدك تاخد أفكار وتفهم الشغل بيمشي ازاي وتتعرف على البيئة المحيطة بيك بشكل أكبر، كل اللي هتحتاج تعمله إنك تدرس خدمات الفريلانسرز اللي في نفس مجالك، وخصوصاً الخدمات اللي بتتصنف كأكثر مبيعًا عشان تاخد الخبرة من المكان الصح، بعد كده هتقرأ تعليقات العملاء على الخدمة ديه وتعرف هما شايفين إيه اللي بيميز الخدمة عشان تقدر بعد كده تقدم خدمة بنفس جودة وكفاءة الخدمة اللي بتدرسها ويمكن بجودة أعلى.
2- ابعد عن أسباب رفض الموقع لخدمتك
أول ما بتجهّز خدمتك للنشر الموقع بياخد وقت تقريباً من 3 ل 24 ساعة عشان يقبل الخدمة بتاعتك أو لا، وده بيرجع لسياسة الموقع والبنود والشروط اللي الموقع محددها وبيرفض على أساسها الخدمات زي:
- إن الخدمة معلوماتها ناقصة زي تحديد السعر أو تحديد عدد الكلمات لو انت كاتب محتوى أو مترجم
- إنك تطلب من العميل يشتري الخدمة أكتر من مرة لو هو محتاج ضعف الخدمة مثلاً زي إنه طالب فيديو 10 ثواني والخدمة بتقدم 5 ثواني بس، والأصح إن العميل يختار خدمة واحدة بس يكتب فيها التطويرات والزيادات اللي بيطلبها
- الخدمات اللي بتحتوي على كلمات مبالغة زي “أفضل خدمة”، “عرض حصري”، “لفترة محدودة”
- الخدمات اللي مش بتضم نماذج من شغلك أو مثال للخدمة اللي بتقدمها
- إن الخدمة يكون فيها وسائل تواصل ليك زي رقمك، لإن التواصل الوحيد المسموح بيه بين الفريلانسر والعميل بيتم من خلال الموقع
- إنك تضيف صورة أو فيديو للخدمة بجودة قليلة
- إنك تكتب نَص في صورة الخدمة
- المبالغة في استخدام الرموز والمسافات في عنوان الخدمة
3- اهتم بالكلمات المفتاحية
الكلمات المفتاحية هي كلمات بيطلبها الموقع منك لتسهيل عمليات البحث للعميل بحيث إن لو كاتب كلمة زي “محتوى” الموقع بيرشحك للعميل لما يبحث عن الكلمة ديه بمؤشرات البحث.
والطريقة الصحيحة عشان تختار الكلمات المفتاحية ليك صح وبشكل احترافي بتتم في 3 خطوات:
- تشوف الفريلانسرز اللي في مجالك كاتبين ايه في الكلمات المفتاحية الخاصة بيهم فتاخد أفكار وأمثلة
- حط نفسك مكان العميل وشوف انت لو بتدور على الخدمة ديه إيه الكلمات اللي هتكتبها في محرك البحث
- تبدأ تكتب الكلمات الخاصة بيك مع علامة “,” بين كل كلمة مفتاحية والتانية
4- أنشر خدماتك في الأماكن المناسبة على السوشيال ميديا
نظراً إن خمسات هو موقع عربي والأهم على مستوى الشرق الأوسط، فالتعامل مع العملاء و الفريلانسرز ممكن يتم بكذا شكل غير التعامل المباشر اللي بيتم على الموقع.
بما إن العرب بيتميزوا بالإجتماعية الشديدة هتلاقي دايما جروبات وصفحات ومحادثات فيها المجتمع الخاص بموقع خمسات سواء فريلانسرز أو عملاء، وبيتم نشر فرص كتير جداً على الجروبات ديه وتقدر من خلالها تلقط أي عميل وتكون فرصة لشغل انت مكنتش عامل حسابه.
كمان إهتمامك بإنك تكتب على السوشيال ميديا إنك فريلانسر على خمسات ممكن يبقي فرصة إن عميل يشوف البروفايل بتاعك ويدخل يكلمك بشكل شخصي.
الخلاصة
بكده تكون عرفت أهم أربع طرق يساعدوك تبيع خدمات أكتر على موقع خمسات، وطبعاً مش هننسي إن كل النصايح ديه هى سُبل مساعدة ليك عشان تبان اكتر وتبيع شغل أكتر وتتحول من مبتدأ لمتوسط أو من متوسط لمحترف، بس العِبرة في النهاية بتكون في تطويرك من نفسك ومن مهاراتك لإن كل النصايح ديه مش هتكون مفيدة غير لو نتيجة شغلك مرضية للعملاء.
