في بداية حياتك المهنية كفريلانسر هتلاقي نفسك بتبذل مجهود كبير عشان تقدر تبدأ في مجال العمل الحر، والمجهود ده بيتجزأ في كذا حاجة زي استقرارك في المجال اللي هتشتغل فيه والتخصص اللي هتتخصصه داخل المجال ده وإنك تبدأ تعمل بورتفوليو وتقدم بروبوزال وتبني علاقات قوية مع العملاء عشان تقدر تشتغل معاهم، واحدة من أهم الخطوات ديه هي إنك تحدد سعرك وتعرف السعر المناسب اللي تقدر تعرضه مقابل خدمتك.

على أد ما الخطوة ديه تبدو بدائية وسهل نتعامل معاها لو سألنا في السوق حوالينا أكتر، على أد ما هي مهمة وتقدر تكون السبب في إن دَخلك من مشروع يزيد أضعاف لو قدرت تحدد أسعارك صح.

العوامل اللي بتأثر على تحديد اسعارك

1- دراسة السوق 

أهم شيء تعمله في البداية هو إنك تعمل سيرش محترم تدرس بيه الأسعار الموجودة في سوق العمل الحر وتعرف الأسعار الخاصة بالمجال والتخصص اللي بتقدمهم وتوصل لمتوسط سعر الخدمة ديه عشان المتوسط ده هيبقى أول عامل يساعدك تحط سعر مناسب لنفسك

2- تحديد مستوى خبرتك 

قبل تحديد اسعارك، شيء أساسي إنك تعرف مستوى خبرتك في المجال اللي بتشتغل فيه وهل انت مبتدئ ولا متوسط ولا محترف وده بيتحدد على أساس شغلك السابق وعلى أساس رأي العملاء السابقين في شغلك وعلى أساس عدد سنين خبرتك في المجال ده، وطبعاً مش شرط عشان انت مبتدئ في شغل العمل الحر تكون لسه مبتدئ في مجالك.

الطرق الأساسية لتحديد اسعارك 

1- بالساعة

دا أشهر نظام تسعير وأحسن نظام للمبتدئين لإن سهل جداً تحسبه ومُنظم وتقدر تتحكم فيه براحتك، وده نظام تقدر تحسبه ببساطة عن طريق تتبع المدة اللي اشتغلت فيها على المشروع ده والعميل بيدفعلك بعدد الساعات اللي اشتغلتها فيه، ودا بيكون نظام دقيق لإن الموقع هو اللي بيحسبلك الوقت حَسب خوارزميات محددة تضمنلك حقك وحق العميل. 

النظام ده ليه عيوب في بعض المجالات اللي بتتطلب تفكير وإبداع ووقت أكبر في الوصول للفكرة أكتر من تطبيقها، فباتباع نظام التسعير بالساعة الفريلانسر في المجال ده هيتم تسعير خدمته بنسبة أقل بكتير من النسبة اللي يستحقها. 

2- باليوم

ده نظام تسعير باليوم، بدل ما الموقع يتابع تقدم شغلك كل دقيقة وكل ساعة زي النظام السابق، انت بتحدد سعر اليوم الكامل بالنسبالك وتبلغه للعميل وحسب عدد الأيام اللي المشروع ده هياخدها منك بتقدر تحسب إجمالي دَخلك من المشروع.

مميزات النظام ده بيظهر في التعامل مع المشاريع الصغيرة اللي هتاخد منك عدد أيام قليلة والعميل هيوافق فيها على سعر يومك، بس عيوبه بتظهر لو الخدمة اللي بتقدمها تستحق فلوس أكتر بسبب إن المجهود والوقت اللي قدمتهولها في اليوم أكبر من الوقت والمجهود اللي بتقدمهم في الأيام العادية والمشاريع التانية.

3- بالكلمة 

ده نظام أسهل وأحسن كتير للمبتدئين وبيعتمد أكتر على المجالات اللي شغلها كله بيظهر في الكتابة زي الترجمة و الـ Content Writing وبيتم حسابة السعر بالكلمة، وده نظام مش بنستخدمه مع المجالات اللي مفيهاش كلام زي الفيديوهات أو المجالات اللي مبتعتمدش على الكتابات كإعتماد كُلي ومجهودها بيظهر في حاجات تانية زي كتابة بوستات السوشيال ميديا لإنها بتعتمد على التسويق وأنشطة تاني أكتر من عدد الكلمات اللي بتتكتب في البوست

4- بالمشروع

ده نظام انت بتحدده بنفسك حسب الليست اللي فيها اسعارك للمشاريع المشابهة والليست ديه بتحددها على أساس الوقت والمجهود اللي هتقضيه في المشروع، وبعدها بتبلغ العميل بالسعر وبتعرض عليه شغلك في مشروع مشابه لمشروعه وقدمته بنفس السعر اللي بتعرضه على العميل.

وده نظام متقدم شوية بتبدأ تتعامل بيه مع الخبرة اللي هتكتسبها مع الوقت ولما تقدم مشاريع كتيرة وتقدر تحدد كل مشروع مجهوده ووقته بيتقدموا بفلوس أد إيه، وعيب النظام ده بيظهر لو توقعت من البداية مجهود ووقت محددين لمشروع معين ومع الوقت وانت شغال فيه اكتشفت تفصيلة هتحتاج منك شغل أو وقت أكبر فتكتشف إنك لو كنت عامل حسابك عليها من البداية كان سعر المشروع زاد. 

5- بالعميل

وده نظام بيعتمد على وجود عملاء مستمرين معاك وبتحدد معاهم باكدچ فيها عدد معين من المشاريع أو عدد معين من الساعات اللي بتشتغلوها سوا وبتتحاسب عليها أول كل شهر وبتُعتبر باكدچ شهرية. 

مميزات النظام ده إنه آمن مادياً وبيخليك متوقع إن كل شهر هيجيلك مبلغ معين من العميل ده انت ضامنه، وعيوبه بتظهر في إن العميل يفتكر انك متاحله طول الوقت ويتوقع منك تنفذله حاجات كتير جداً بهدف إنه يستفاد أكبر استفادة من فلوسه. 

6- بالسعر اللي العميل هيطلبه

وده نظام بيحتاج فريلانسرز متقدمين في مجالهم وفي خبرتهم داخل مواقع العمل الحر، واللي بيحصل فيه هو إن العميل بيقدم المشروع اللي هو طالبه وبيعرض السعر اللي هيقدر يدفعه، وعلى أساس السعر ده الفريلانسر بيقوله هو هيقدر يقدمله نتيجة عاملة إزاي وينتظر منه مشروع شكله ايه. 

أفضل ممارسات توصل بيها للتسعيرة المظبوطة

1.  ابدأ بالسعر اللي انت شايفه مناسب لخبرتك ومناسب مع متوسط أسعار السوق

2. متشتغلش ببلاش أو بسعر قليل بحجة إنك بتبني بورتفوليو لإن العميل لما يشوفلك سعر قليل أوي أو تعرض عليه إنك تشتغل ببلاش هيقلق ويشك في جودة شغلك وفي قدراتك، أو هتقع مع عملاء مش مقدرين نوعية الشغل اللي بتقدمها. 

3. حط حدود بينك وبين العملاء وخليك ثابت على سعرك، لو العميل مش مناسب معاه السعر ده يقدر يعتذر عن المشروع لكن مينفعش انت تقلل سعرك بعد ما العميل يضغطك ويحاول يفاصل معاك لإن ده لو دل على شيء فبيدل على إن بيتم استغلالك

4. اعرف قيمتك وخليك واثق في الأسعار اللي بتقولها ووضح إن عندك ثقة في قدراتك وفي مدى جودة خدمتك

5. لو لقيت نفسك حاطط سعر عالي ومش بيجيلك شغل ابدأ خطة تخفيض سعرك بمقدار 10% من السعر الأصلي كل إسبوعين لحد ما توصل للسعر المناسب اللي بيوفرلك شغل ومناسب لمتوسط سعر السوق

6. مع الوقت تقدر تقلل سعرك أو تزوده تدريجياً وده بيعتمد على مدى تطورك مع الوقت ومدى تمسك العملاء بيك على الموقع ولو حسيت في أي وقت إن التقليل أو الزيادة دول عملوا مشكلة ما تقدر ترجع للسعر الأصلي بكل سهولة

الخلاصة

الفريلانسر أسعاره مش ثابتة والأسعار بتختلف من شخص للتاني ولو دلت على شيء فبتدل على واقع خبرته في المجال اللي بيشتغل فيه وجودة شغله، ولو انت لسه مبتدئ فمتشيلش هم الأسعار خالص لإن ده مش المفروض يكون همك دلوقتي حاول على اد ما تقدر تبذل مجهود في جوانب البروفايل التانية زي البورتفوليو والبروبوزال وهما دول اللي هيوصلوك للفلوس بشكل سلس ويريحك.