“اعرف حاجة عن كل حاجة وكل حاجة عن حاجة”

مثل مشهور جداً بيقولك إن عشان تبقى شخص مميز لازم تعرف نبذة بسيطة عن كل المجالات وكل الأبواب اللي حواليك، وتعرف كل تفصيلة كبيرة وصغيرة عن مجال بعينه وتركز فيه أوي. 

ليه أصلاً أعرف كل حاجة عن مجال واحد بس؟ طب ما أقسم مجهودي دا في كذا مجال وأبقى شاطر في كذا حاجة وقدامي فرص أكتر!

الحقيقة ديه وجهة نظر غير صحيحة بالمرة لان انت كده شتت نفسك، انت كده مقدرتش توصل لنتيجة مبهرة في شيء معين يخليك محترف فيه ولا شيلت إيدك من المجال تماماً وسيبته لأصحابه.

اختيارك لمجال معين تحترف فيه مش شرط يبقى إختيار بين مجالات مختلفة انت شاطر فيها كلها زي التصميم والكتابة والتصوير، بالعكس معنى إنك بتحترف حاجه هو إنك بتحترف تفصيلة أو خدمة مش بتحترف مجال كامل مثال على ده مجال الكتابة، مجال الكتابة بيحتوي على خدمات كتير زي ال Copywriting أو الـ Content Writing أو الترجمة وما إلى ذلك، تقدر تتخصص جوا مجال الكتابة في مجال ال Copywriting مثلاً ودا اللي بتقدم فيه كتابات للعميل الهدف منها التسويق للمحتوى اللي العميل بيقدمه سواء كان خدمة أو مُنتج، وتقدر تتخصص جوا مجال ال copywriting في كتابة وتسويق ل websites بس وتبعد تماماً عن السوشيال ميديا مثلاً أو العكس، ودا المعنى الحقيقي لإحترافك لشغلك وتقديمك لخدمة محددة بس بتقدمها بشكل مميز ويخطف عين العميل.

تميُزك في مجال معين ليه أثار إيجابية كتير جداً عليك وعلى شغلك وهيساعدك كفريلانسر توصل لحتة تانية خالص، هيكون السبب في دخولك باب الاحتراف في المجال اللي بتشتغل فيه، هيساعدك تجيب مشاريع أكتر، هتقدر تقدم جودة شغل مميزة فدَخلك هيزيد بشكل واضح، هتتعامل مع العملاء الصح اللي بيقدّروا شغلك بسبب جودته ويرشحوك لعملاء تانين.

عشان تحدد مكانك في مجال معين هتحتاج تسأل نفسك الأسئلة ديه وتجاوب عليهم بكل صراحة مع نفسك في ورقة وقلم.

1- ايه اكتر شغل بستمتع بيه وبحب اعمله؟

منطقياً دا اول سؤال لازم تسأله لنفسك، قبل ما تعرف احتياجات السوق وقبل ما تعرف الأسعار وقبل ما تاخد أي قرار، عشان ببساطة إستحالة تقبل تشتغل في حاجة انت مش بتحبها أو مش مناسبة لشخصيتك مهما كانت مهمة أو مطلوبة في السوق.

فأول سؤال هيكون إيه الحاجة اللي بحب أعملها ومستعد أشتغل فيها طول حياتي بعد كده، إجابة السؤال ده هتكون قايمة هتكتبها بكذا حاجه انت بتحب تعملهم وبتعرف تشتغلهم ورتبهم حسب ترتيب حبك و استمتاعك بيهم.

2- إيه أهم المجالات المطلوبة في السوق؟

عشان تختار مجال معين تشتغل فيه فترة طويلة لازم تضمن إن السوق محتاج المجال ده في المستقبل، وإن الشغل فيه بيكبر بشكل واضح مش بيقل أو بيختفي نتيجة للتطور التكنولوجي اللي احنا عايشين فيه والتقدم الكبير لتطبيقات الذكاء الصناعي.

3- إيه المجال اللي أقدر أوصل للعملاء بتوعه أكتر؟

نتيجة لشغلك المميز في مجال محدد فأنت عندك عدد كويس من العملاء في المجال ده، عملاء بيرتاحوا معاك وبيرتاحوا لشغلك وبيحبوا يتعاملوا معاك فده بيخلي عندك علاقات تقدر تساعدك توسع دايرة شغلك، كمان نتيجة لإحترافيك في المجال ده هتلاقي إنك قادر تسوق لنفسك فيه سواء على السوشيال ميديا في الجروبات المتخصصة اللي بتجمع العملاء اللي في المجال ده أو بأي طريقة تاني، وبكده يكون المجال اللي العملاء بتوعه أكتر ويقدروا يوصلوك لمشاريع وفرص أكبر تقدر تعتبره المجال اللي انت مميز فيه وتقدر تكمل فيه.

4- العملاء بيطلبوا مني إيه أكتر خدمة؟

الفيدباك اللي بتاخده من العملاء أحد أهم العوامل اللي بتحدد على أساسها المجال والخدمة اللي ناوي تحترفها، العميل لما بيشتغل معاك ويلاقيك شاطر في حاجه ومميز فيها بشكل واضح مش هيتعب نفسه ويدور على أشخاص تاني في المجال ده لمشاريعه المستقبلية وهيرشحك كمان لعملاء تانين نتيجة لتجربته معاك والتعامل المريح بينكم، والعكس صحيح لو العميل حس في مشروع انتوا شغالين فيه سوا إنك مش شاطر في المجال ده أو دماغك مش وِجهتها ناحيته ولقى ناس أحسن منك في السوق هيسيبك ويشوف ناس تاني، وهنا يجي دور العملاء في توضيح المجال المناسب ليك أكتر، هتلاقيهم بيطلبوا منك مشاريع كتير في المجال ده وبيجيلك عملاء تانين يطلبوا منك مشاريع أكتر فيه وهتبدأ تتعرِف أكتر في سوق العمل بمهارتك المميزة في تقديم الشغل الخاص بالمجال وهنا هتتأكد أكتر إن ده المجال المناسب ليك، لإن الناس حواليك قدروا يشوفوك مميز فيه. 

5- ايه أكتر شغل بيدفعلي كويس؟

طبعاً مش معنى إنك بتحب مجال فانت هتقدر تشتغل فيه وخلاص، دا غير صحيح لإن الموضوع مش هواية بنمارسها لا دا شغل بيعتمد على عوامل تاني أكبر من حبك ليه، ومن هنا نوصل لأحد أهم الأسئلة اللي المفروض تسألها لنفسك وهو المجالات اللي أنا كتبتها وبستمتع وأنا بعملها ديه كل واحد بيديني فلوس أد إيه وإيه أكتر مجال فيهم فلوسه كويسة. 

من خلال دَخلك اللي بتاخده من كل مجال ومن كل خدمة بتقدمها تقدر تعرف ببساطة وقتك بتستثمره بشكل أفضل فين ولو مكانش المجال ده هو أول مجال انت بتحبه وبتستمتع بيه فلازم تبص على تاني وتالت مجال لإن لو فلوسهم أكتر فهما هيكونوا الأولوية. 

الخلاصة

الخمس أسئلة دول لو جاوبتهم وحددت قرار على أساسهم هيساعدوك تتحول من فريلانسر عادي لفريلانسر متميز ومش هتبقي مُشتت أو مش عارف تعمل ايه، وبالمناسبة متستعجلش على الخطوة ديه لإن عشان توصلها لازم تتأكد إنك أخدت كفايتك من المرحلة اللي قبلها عشان تقدر تقدم فيها شغل مميز وتحس إنك مرتاح. 

وخليك متأكد إن مفيش حاجه اسمها اختيار مكان أو مجال غلط، مهما كان المكان اللي انت فيه هتبذل فيه مجهود وهتتعلم وهتاخد عائد مادي للشغل اللي اشتغلته، بس اللي بيفرق إن في شغل بيبقى نتيجته معاك احسن من شغل تاني أو أريح ليك نفسيا وماديا، وعشان كده تقدر دايما تجرب نفسك وتغير خطتك في أي وقت.