زي ما بتهتم بشغلك وبتسعى تطور نفسك وبتبذل فيه أقصى مجهود، لازم تهتم بحياتك الشخصية وبصحتك النفسية عشان شغلك ميأثرش بالسلب عليك، وخصوصاً مع الإستمرارية في الشغل من البيت وقلة تعاملك مع الشارع والناس والعالم المحيط بيك.
.
إيجابيات إهتمامك بالتوازن بين شغلك وبين حياتك الشخصية بتتمثل في نقط كتير اهمهم هو تقليل الضغط والاكتئاب اللي ممكن تتعرضله، زيادة إنتاجيتك وتفكيرك الإبداعي، و إحساسك بالأمان والاستقرار.
.
طب تحافظ على صحتك النفسية ازاي؟
.
.
– ابني علاقات كتير
.
شغلك كفريلانسر بيعتمد على وجودك في البيت معظم الوقت من غير مدير أو زملاء في الشغل أو حتى مواصلات تقابل فيها ناس وده ممكن يسببلك بعض الوحدة الغير محببة واللي انت مجبر عليها ومجبر تتقبلها بسبب إختيارك لأسلوب حياتك المختلف كفريلانسر، عشان كده الحل الوحيد هو انك تبني علاقات أكتر وتتعرف على ناس جديدة في حياتك سواء لأسباب مهنية أو شخصية أو صداقات سطحية، وكمان تحافظ على علاقاتك السابقة وتكون على تواصل مع معظم الناس اللي تعرفها في حياتك.
.
.
– اعمل جدول أول اليوم لخطتك خلال اليوم
.
دا هيخلق روتين هيساعدك تخلي حياتك منظمة ومريحة أكتر وهيقلل الضغط عليك، وده بيبدأ من إنك تحدد لنفسك ساعات شغل محددة كأنك موظف لأن ده هيساعدك في زيادة إنتاجيتك في الشغل وهيحسسك بالراحه وقت ما عدد الساعات ديه تخلص وتقضي باقي اليوم ليك انت وتمارس فيه أنشطك اللي بتحبها أو تقابل ناس قريبة منك ومتحسش إن الشغل مخليك مضغوط طول ال 24 ساعة.
.
.
– قلل الوقت اللي بتقضيه على السوشيال ميديا
.
لإن السوشيال ميديا هي أكبر مضيعة للوقت، وهتحس بعد يوم طويل مرهق قدام الموبايل إنك مأنجزتش شيء بسبب كمية الوقت اللي ضاع وانت مش واخد بالك، فبالتالي صحتك النفسية هتتأثر وتحس إن اليوم ضاع منك، وأفضل بديل للوقت اللي كنت بتضيعه علي السوشيال ميديا هو تطوير مهاراتك في مجال عملك، واللي بعد فترة ملحوظة هتلاحظ انه كان أفضل قرار اخدته.
.
.
-عيش حياة صحية
.
الحياة الصحية مهمة جدا ليك كفريلانسر، بجانب إنها أكبر عامل ممكن يحسن صحتك النفسية والجسدية خلال شغلك، بس لأن شغل الفريلانسر لا يتطلب أي حركة أو بذل المجهود الجسدي اللي جسمك محتاجه، فهتحتاج تحافظ على جسمك بشكل صحي عن طريق ممارسة تمارين يومية في البيت وتاكل اكل الصحي بيتكون من عناصر مفيدة تساعدك طول اليوم.
.
.
– حط حدود صحية للمحافظة على راحتك النفسية
.
رغم إنه مش هيبقى مريح ليك تعمل كده في الأول وهتخاف ترفض عميل مرهق نفسيا، بس عادي تقول لا لعميل هيتعبك اوى فى الشغل في فترة إنت مش هتقدر فيها على دا، وعادي تقول لا لشغل هيجي على صحتك النفسية ونتايجه السلبية أكبر من نتايجه الإيجابية ليك كفريلانسر.
.
.
الخلاصة
.
حياتك كفريلانسر بتكون مرهقة بشكل أو بآخر لأسباب كتير جدا، بس من أول خطوة بتاخدها في الطريق ده لازم تتعود تحط صحتك النفسية كأول أولوية في كل شيء، مينفعش تحقق نجاح في حياتك المهنية على حساب حياتك الشخصية كده انت لسه مش ناجح، النجاح الحقيقي هو إنك تحس إنك مرتاح نفسيا وجسديا ومستقر وبتحب ستايل حياتك زي ما هي.
