عارف المسجات اللي بتيجي من العميل 3 الفجر؟ أو التعديلات المبالغ فيها بدون سبب؟ أو الإعتراض على أسعارك بشكل واضح؟ أو العشوائية في توضيح المطلوب منك والطلبات الكتير في وسط المشروع؟
.
لو مريت بمرحلة من دول، أو ملاحظ استمرارية المواقف ديه معاك فانت كده بتتعامل مع عميل مُرهق ومش احترافي وهيتعبك في الشغل.
.
عملية جذب أي عميل ليك هي عملية مرهقة وبتاخد وقت كتير جداً، عشان كده مهما كان العميل مُتعب فإنك تحافظ عليه وعلى الشغل اللي بينكم أحسن كتير ليك من انك تسيبه وتدور على عميل جديد غيره، بس مهما كان الشغل مع العميل ده مهم وفلوسه حلوة والمشاريع بتفيدك فصحتك وسلامك النفسي أهم بكتير من كل ده، عشان كده جاي أقولك على 8 نصائح تقدر تطبقهم ويساعدوك في التعامل مع العميل المرهق ده وتحوله كمان لعميل مريح وبتحب تشتغل معاه.
.
.
1- ضرورة وجود عقد وإثباتات
.
إنك تبدأ شغلك مع العميل بعقد ده شيء مهم جداً، بجانب إثباته لإحترافيتك فهو بيحل مشكلتين مع العملاء:
.
- تطَمن العميل اللي عنده مشكلة في إنه يثق فيك وخايف دايما إنك تضحك عليه بأي شكل -ولو ده اول تعامل بينكم فحقه طبعاً- ولو حليت ده فانت كده خليته يحس براحة معاك وميرخمش عليك بأي اسئلة مش مُريحة ليك.
- تثبت كل الكلام اللي بينك وبين العميل وحقوقك وواجباتك وتواريخ الإستلام والتسليم وكل تفصيلة العميل طالبها في المشروع ولو تم التخلف عن أي تفصيلة من التفاصيل أو المواعيد ديه هيحصل كذا، بكده انت أثبت للعميل إن في إثبات لكلامكم وميقدرش يلومك على أي تفصيلة هو موضحاش من البداية.
.
.
2- حط توقعات للعميل
.
قبل بداية شغلك مع أي عميل وقبل ما تكتب العقد حتى فانت محتاج تبقى واضح معاه ومُلزم تفهمه كل تفاصيل شغلك، وتعرفه يتوقع منك إيه وميتوقعش منك إيه، والخدمات اللي بتقدمها والخدمات اللي مش بتقدمها، اتكلم في الأسعار وطرق الدفع وتفاصيل المشروع وأوقات التسليم والاستلام وعدد التعديلات المتاحة والشكل النهائي اللي هيطلع وكل تفصيلة كبيرة وصغيرة.
.
.ديه الطريقة اللي هتعرّف فيها العميل انت مين وشغلك بيمشي ازاي، لو هو مش متقبل ده بأي شكل يقدر ينسحب من البداية، بس وقت الجد وأما تبدأ المشروع العميل مش هيكون ليه حق يكلمك نص كلمة على أي حاجه ممكن تسبب مشكلة، لإنك ببساطة كنت صريح معاه من البداية وده هيقفل باب كبير جداً من المشاكل بينك وبين العميل المُرهق.
.
.
3- حط حدود بينك وبين العميل
.
زي ما العميل بيرفض تفاصيل في المشروع، وبيختار الحاجات اللي تناسبه في التعامل معاك، انت كمان حقك تطلب اللي بيريحك بشكل احترافي، حدد دايما المواعيد المناسبة معاك في أي شغل، رد عليه بشكل محترف ولذيذ مش بجدية أوي أو بطريقة ودية أوي، بينله إنك بتلتزم بمواعيد التسليمات وبتقدم الشغل المطلوب على أكمل وجه، الحدود ديه هتريحك وهتكسب بيها ثقة العميل بشكل أو بآخر وهتخليه يفكر مرتين قبل ما يزعجك بحاجات مش مناسبة ليك عشان هيكون عارف أد ايه انت منظم وبتسلم الشغل بالشكل اللي يريحه.
.
.
4- تواصل مع العميل بذكاء
.
اعرف شخصية العميل وشوف ايه اللي بيريحه، هل هيريحه انك تبعتله جزء من المشروع كل ما تخلصه؟ هل إنك تبعتله انت خلصت أد إيه كل فترة ويتابع معاك تقدم المشروع؟ هل بيفضّل تعمل ميتنج كل فترة تتناقشوا في التعديلات أول بأول؟ هل بيرتاح تتواصل معاه فورمال على إيميل ولا على الواتس آب مثلاً هل لما بتبعت تسأله على تفاصيل في المشروع كل فترة بيتطمن أكتر؟
.
جزء من تواصلك مع العميل بيعتمد على ذكائك، أما تسبق العميل بخطوة وتكون بتريحه دايمًا هتلاقيك بتريح نفسك من غير ما تاخد بالك، لإنه هيبطل يقلق ويبطل يتواصل معاك بشكل مستمر وبأسئلة مش مفيدة في أوقات مش مناسبة.
.
.
5- راجع نفسك
.
العميل المرهق مش شرط يكون مُرهق عشان هو بيتعامل بشكل مضايقك او بيتدخل في شغلك وخلاص، ما يمكن انت شايفه وحش عشان نبهك لحاجات فيك انت رافض تتقبلها، زي إنك مش ملتزم بمواعيدك وهو مستعجل على الشغل فبيبعتلك في أوقات غير مناسبة، أو زي إنك مش بترد عليه فهو بيزن عليك كتير، أو زي إنه بيطلب تعديلات لحاجات انت محتاج تطور نفسك فيها أو حاجات انت مكروتها، او زي إنه عنده وجهة نظر في المجال بتاعك وبيقترح حاجات تتعمل بشكل معين وانت شايف إنه بيتدخل في شغلك، كل ديه أمثلة لأشكال العميل اللي يبان إنه غير إحترافي بس الحقيقة هي إن الغير إحترافيه جاية من عندك انت، فقبل ما تحكم على العميل اعرف المشكلة فين الأول ومين سببها.
.
.
6- خد منه فيدباك بعد كل خطوة
.
أما تشتغل مع عميل مُرهق ويكون عميل مستمر معاك، جرب مرة تبعتله المشروع متقطع، كل ما تخلص جزء فيه تبعته وتاخد الفيدباك وتشوف رد فعله على كل جزء لوحده وتلاحظ هو مشكلته دايما بتكون مع إيه وإيه الحاجة اللي بيعدلها معاك على طول، فهمت دماغه؟ المشروع الجديد قدمله المشروع كامل بالشكل اللي هيبسطه على طول ومبروك عليك إنهاء معاناتك مع عميل عشان قدرت تفهمه صح.
.
.
7- خد من العميل ديبوزت
.
الديبوزت في عالم العمل الحر بيكون 50% من فلوس المشروع وبتتسلم ليك بشكل مبدئي قبل بداية المشروع لضمان جدية المشروع وعدم إلغاء العميل للمشروع بعد ما تبدأ شغل فيه، وعشان العقد بيقول ان لو العميل لغى المشروع بعد ما بعت الديبوزت ف 25% من فلوس المشروع مش هترجعله تاني، وده باند يخليك تسبق العميل بخطوة وميحصلش اي مشاكل مادية بينك وبينه وتضمن إن العميل بيفكر بجدية في احتياجه للمشروع وهيلتزم بكل بنود العقد زي ما انت هتلتزم بيها بالظبط ومحدش يمسك حد من إيده اللي بتوجعه.
.
.
8- استعد تمشي
.
طب لو طبقنا كل النصايح ديه والعميل لسه مُتعب؟ لازم تعرف إن في نقطة رفيعة فاصلة بين إنك تستحمل ضغط الشغل وإنك ترهق نفسك نفسيًا وعصبيًا عشان الشغل، النقطة الأولي بتساعدك تتطور وتحسن من نفسك وشغلك وتاخد خبرة كبيرة حتى لو انت مضايق، النقطة التانية ممكن تخليك تفكر من تاني في هل قرار دخول عالم العمل الحر ده صح ليا؟ لإنها بتحسسك بصعوبة تعاملك مع الناس وأد إيه انت مش شاطر كفاية في اللي بتقدمه، ومهما حصل إحنا مش عايزين نوصل للنقطه ديه.
.
واعرف إنك عشان تسيب عميل لازم تبقي ذكي وتنسحب بهدوء وبشكل ميبوظش الفيدباك بتاعك ولا يقلل تقييمك، بل تكون كسبته كشخص ويقدر يرشحك لناس تانية.
.
الخلاصة
.
ملاحظة مشاكل العميل معاك وتحديد طريقة التواصل بينكم هما أول شكلين من أشكال تحويل العميل المُرهق لأفضل عميل بتحب شغله، مش صعب أبداً تسايس العميل وتفهم دماغه وتفكيره وتاخده تحت دراعك، والفريلانسر الشاطر بس هو اللي يعرف يفهم دماغ العميل ويريحه، عشان كده تطويرك لمهاراتك الشخصية ومهارات التواصل ذو أهمية كبيرة زي تطويرك لمهاراتك في مجال شغلك.
