مجال العمل الحر من الحاجات المهمة اللي ناس كتير بتختلف عليها، جزء بيبقي شايف إنه شكل الحياة المهنية اللي بيتمنوها، وجزء بيبقي شايف إنه بيشكل ضغط كبير عليهم وغير آمن مادياً.
.
والحقيقة إن مفيش إجابة صحيحة، لإن الإجابة هترجع ليك إنت كشخص وانت اللي تحدد دا مناسب معاك ولا لا وهل مميزاته أكبر من عيوبه ولا العكس.
.
طب ايه المميزات والعيوب اللي بنحدد على أساسها؟
.
.
مميزات العمل الحر:
.
1- بتشتغل لحساب نفسك
.
النقطة ديه بتشكل ميزة وعيب في نفس الوقت، ميزتها إنها هتخليك حر قادر تحدد أولوياتك وإلتزامتك وطريقة شغلك وأوقات شغلك وكل حاجه بالمعني الحرفي، بإختصار انت مدير نفسك.
.
وعيبها يكمُن في احتياجها للإرادة نظراً إن خلاص مفيش مدير فوقيك ومفيش تارجت مطلوب منك أخر الشهر، فإنت مينفعش تسيب الشغل وقت ما يجيلك مزاج أو إنك تحط ديما حياتك الشخصية أولوية.
.
2- بيوفرلك فرص عمل أكتر
.
نظراً لإنك مش مرتبط بعدد محدد من المشاريع أو عدد من البروبوزالز اللي ممكن تقدمهم للعميل، فانت ممكن تشتغل على عدد كبير جدا من المشاريع طول الشهر وتحقق عائد مادي أكبر بكتير من اللي انت كنت بتاخده كموظف بسبب زيادة فرص العمل.
.
3- الشغل بيكون من المكان الي تحبه
.
مش هتبقي مجبر إنك تشتغل في مكان واحد دايمًا زي مقر الشركة، بالعكس انت تقدر تشتغل من المكان اللي يريحك واللي حاسس إنه ممكن يزود إنتاجيتك، وتقدر كمان لو مسافر تاخد اللابتوب أو معدات شغلك وتشتغل وانت هناك عكس الشغل كموظف اللي بيحتاج أجازات وتصاريح عشان تقدر تسافر كام يوم.
.
4- ليك الحرية في اختيار مواعيد الشغل
.
مع اختلاف شخصياتنا بتختلف الأوقات اللي بنكون فيها مركزين والأوقات اللي بنكون فيها أكثر إنتاجية، عشان كده كفريلانسر ديه ميزة هتساعدك تطلع أحسن شغل عندك بإختيارك للأوقات المناسبة ليك كشخص، كمان مع توسع دايرة العملاء اللي بتتعامل معاهم من جميع أنحاء العالم، تقدر تحدد مواعيدك حسب مواعيد دولة العملاء اللي بتشتغل معاهم عشان ترد عليهم أسرع وتريحهم في الشغل وتاخد تقييمات أعلى.
.
5- أفضل مجال شغل للطلبة
.
بسبب إن العمل الحر مش شغل بدوام كامل ولا بيطلب منك مجهود 8 ساعات يومياً معظم الطلبة بتتجه ليه عشان يقدروا يواكبوا بين حياتهم الدراسية وحياتهم المهنية وبحلول فترة تخرجهم هيكونوا بالفعل عندهم سنين خبرة في المجال اللي بيشتغلوا فيه وبيكونوا عدوا أشواط كبيرة.
.
6- توسيع دايرة معرفتك
.
لإنك ببساطة هتتعامل مع عملاء من جنسيات مختلفة وثقافات مختلفة وشخصيات مختلفة وده هيساعدك تزود دايرة معارفك وتتعرف على ناس أكتر كمان هيساعدك في تحسين مهارات كتير زي مهارات الإقناع ومهارات التواصل.
.
7- ليك الحرية في اختيار الفرص اللي هتشتغل عليها
.
نظراً لإنك مش مجبر تشتغل على أي مشروع أو مع أي عميل، فإنت ببساطة تقدر ترفض أي مشروع انت حاسس إنه مش مناسب ليك، أو رافض سعره، أو حاسس إن وقته مش مناسب.
.
8- عندك قدرة على التطور بشكل مستمر
.
مجال العمل الحر بيديك الوقت والقدرة إنك تعلي مستواك وتطور وتحسن قدراتك وتزود خبرتك، وده طبعاً بيرجع ليك ولكمية المجهود اللي بتحطه في الشغل، وكل ما تبذل مجهود أكبر كل ما دخلك هيكبر.
.
9- الدخل اللي بتاخده بيبقي أكبر من دخلك كموظف في شركة
.
طبعا ده بيرجع لخبرتك وتخصصك والوقت اللي بتحطه في لشغل، بس الشخص اللي بياخد الشغل على محمل الجد وبيديه من وقته ومجهوده وبيتطور فيه بشكل مستمر، فبيكون دخله أكبر بكتير من دخله في وظيفة ثابتة، وده بيرجع لعوامل كتير اهمهم إن صافي الربح بيكون ليك انت مش بيروح للشركة ومواردها والضرائب الأول قبل ما يجيلك على هيئة مرتب.
.
.
عيوب العمل الحر:
.
1- عدم انتظام تدفق العمل
.
في أوقات بيكون متاحلك فيها تشتغل على أكتر من مشروع ومع أكتر من عميل في نفس الفترة وأوقات تانية ممكن تقعد مدة طويلة جدا بتوصل لشهور من غير أي شغل، وده مبيبقاش تقصير منك بل بيكون اعتمادا على احتياجات سوق العمل في الفترة دي.
.
2- دخلك مش مستقر
.
نتيجة للنقطة السابقة فللأسف دخلك الشهري ممكن يزيد جدا في أوقات ويقل جدا في أوقات تانية، عكس العمل في وظيفة ثابتة بتكون نايم مطمن إن ليك مرتب ثابت آخر كل شهر سواء كان الشغل في الشركة كتير أو قليل.
.
3- مشاكل في التنظيم المالي
.
وده ببساطة لإنك كفريلانسر مش بيكون ليك معاش أو تأمينات صحية وإجتماعية أو حتى أجازات مدفوعة زي الشغل في شركة مثلا، فانت بتكون مجبر تنظم فلوسك ودخلك إنه يستقبل أي مفاجآت أو ظروف غير محسوبة.
.
4- تعدد المسئوليات
.
شغلك كفريلانسر بيبقي معتمد عليك كلياً، بمعني إنك انت المسئول عن تنظيم المحتوي الخاص بيك والشغل الي العميل بيطلبه والمتابعة مع العملاء والتسويق لنفسك وما إلى ذلك، وده طبعا بيتطلب شغل ومجهود كبير جدا لان مينفعش تقصر في أي جزء من الأجزاء ديه عشان توصل لنتيجة مرضية ليك.
.
5- الانعزال التام
.
الفريلانسر بطبعه ملوش تيم بيشتغل فيه، ولا ليه مقر شركة بينزل يخلص شغله منه، ولا ليه أي تعامل مع أي شخص غير العملاء اللي بيطلبوا منه شغل، وديه بيئة عمل هتسببلك الوحدة الغير مرغوب فيها وهتيجي على حياتك الإجتماعية، بس تقدر تتخطاها وتهتم ببناء علاقات لإن الاهتمام بحياتك الشخصية لا يقل أهمية عن الاهتمام بحياتك المهنية.
.
6- مواعيد العمل
.
بما إن شغلك مش في شركة بتربطك بمواعيد شغل معينة، فالعملاء دايمًا بيتواصلوا معاك في أي وقت وبيتوقعوا دايما رد منك في أي وقت من اليوم ولو ده محصلش فممكن يبقى سبب في تقييم مش كويس ليك.
.
7- إختلاف التوقيت
.
بسبب شغلك على مواقع بتدعم مشاريع عملاء على مستوى الشرق الأوسط أو على مستوى العالم، ده بيسبب أحيانًا مشاكل في اختلاف فرق التوقيت بينك وبين العميل.
.
8- مش بتبقي مرتبط بساعات شغل ثابتة
.
فكرة إنك انت اللي بتحدد المواعيد اللي هتشتغل فيها والأيام والمكان وتستني أما يجيلك مزاج عشان تخلص اللي وراك ديه بتسبب مشاكل كبيرة جدا، لإن عدم الإحساس بالمسئولية والشغل بمزاجك بدون الإلتزام بمواعيد وشفتات ده هيقلل من إنتاجيتك ويخليك بتشتغل على هواك وطبعا ده عمره ما هيساعدك توصل لنتيجة، لازم تحارب الإحساس ده وتحط لنفسك مواعيد محددة للشغل يوماً وتلتزم بيها.
.
9- المجال محتاج صبر
.
عشان تبدأ تشتغل وتاخد فلوس ترضيك وتحس إن ده خلاص بقى مجالك فانت محتاج تبني personal brand قوية عشان تقدر تاخد أول خطوة، وده بياخد وقت طويل جدا بيوصل لشهور ويمكن سنين، وعشان كده بيتطلب منك مجهود كبير وصبر عشان توصل لهدفك ده في الأخر.
.
الخلاصة
.
في النهاية، مجال العمل الحر زيه زي أي مجال ليه مميزات وعيوب، وعلي حسب الفرق بين كل شخص والتاني الناس بتشوف مميزاته أكتر من عيوبه أو العكس، بس اللي لازم تتأكد منه إن اتخاذ القرار بيتطلب بعض الجرأة وشوية تنازلات وأيا يكن القرار اللي هتاخده لازم تكون راضي عنه كليا.
