جزء من شغلك كفريلانسر بيعتمد بنسبة كبيرة على تعاملك مع كل أشكال وأنواع شخصيات العملاء اللي ممكن تخطر على بالك، بدايةً من العميل اللي بيقضي أيام مختفي مش بيرد، ختاماً بالعميل اللي بيطلب خدمات انت موضح بشكل صريح إنك مش بتقدمها في البروبوزال بتاعك.

طب امتي اعرف العميل ده هيرهقني فعلا ولا لا؟

هوضحلك أشهر الأمثلة للصفات الموجودة في العملاء اللي بنعتبر بيها إن العميل ده مرهق ولو واجهتها مع أي عميل تاني هتحتاج تاخد خطوة سريعة تظبط بيها علاقتك مع العميل ده عشان متخسرهوش. 

1- العميل بتاع “أنا مش متأكد أوي أنا محتاج إيه”

دا عميل متردد دايما وتردده بيخليه يقولك متطلباته في المشروع ويرجع بعدها بفترة صغيرة يطلب تعدلها وبيخليك مُشتت في شغلك ومش قادر تقدمله أفضل شيء نتيجة لتردده وتعديلاته الكتير.

ازاي تتعامل معاه؟

العقد هو أسلم حل، إنكم تقعدوا سوا في ميتنج تتفقوا على تفاصيل المشروع بالكامل وتعَرفه إنك بترفض التعديلات الكبيرة اللي ممكن تغير شكل المشروع بالكامل.

2- العميل بتاع “أنا متأكد إن دا ضمن المشروع”

ودا العميل اللي بيطلب منك تعديلات وخدمات انت مش بتوفرها خالص أو بتوفرها بس هي خارج السعر اللي اتفقتوا عليه، وبيكون مصمم إن دا ضمن تكاليف المشروع ويتناقش بحماس أوي إن إزاي ده خارج 

السعر.

ازاي تتعامل معاه؟

وضح للعميل قبل الشغل كل اللي بتقدمه واللي مش بتقدمه ضمن السعر اللي اتفقتوا عليه أو حسب حاجة المشروع بتاعه، واعرض عليه تقدمله خدمات أكتر بأسعار إضافية.

3- العميل بتاع “أنا عايز المشروع ده يخلص إمبارح”

دا عميل دايما مستعجل وفاكر إنه لما يستعجلك فأنت هتخلص الشغل أسرع وتسيب اللي وراك كله وتخلصله شغله، ومبيحترمش أبسط حقوقك اللي بتتمثل في احتياجك لمساحة شخصية تفكر فيها لأفضل طريقة تقدم بيها المشروع وتطلّع أفكار وتنفذ المشروع بالفعل.

ازاي تتعامل معاه؟

وضحله احتياجك للوقت وعرفه المدة اللي تقدر تخلص فيه المشروع، وفهمه إن الوقت عامل مهم لكل الفريلانسرز وأي مشروع عشان يطلع في أحسن صورة بيحتاج وقته إلا لو حد قادر يحطه أولوية ويشتغل عليه في أسرع وقت بفلوس أكتر.

4- العميل بتاع “كل حاجه جت بسرعة”

دا العميل اللي بيحوّل كل حاجه بيقولهالك أو بيبعتهالك لحالة طوارئ ويحسسك انك مُطالب تديله كل وقتك وتفضاله هو بس وتستنى تعديلاته ومسجاته عشان ترد عليها في أسرع وقت وتنفذله اللي بيطلبه.

ازاي تتعامل معاه؟

حط بينكم جدول لكل توقيتات التسليم والاستلام وأي ميتنج بيتم بينكم وبينله انك فعلاً بتلتزم بالمواعيد ديه وإنك مُلزم من عملاء تانين مش متاحله او متفرغله هو بس. 

5- العميل بتاع “لا مفيش معاد تسليم براحتك، …. صباح الخير أنا محتاج استلم المشروع بكرة الصبح”

دا عميل مش منظم وبيحسسك دايما إنه براحتك وإن كل حاجه تمام لإنه سايبها على الله بس الحقيقة بتكون إن هو معندوش بلان وأول ما يتزنق بيبدأ يوتر الناس اللي حواليه كلهم ويتوقع ردودهم في أسرع وقت.

ازاي تتعامل معاه؟

اتفق معاه أول المشروع على وقت التسليم وخليه يأكد عليك إنه موافق عليه حتى لو هو سايبك براحتك وبيقولك إن لو عايز وقت أكتر فتمام، بحيث لو جالك في أي وقت وقرر يزنقك ويقولك إنه عايز الحاجه حالاً وضحله انكم متفقين على مواعيد وانت ملتزم بيها ومش هتقدر تقدم أكتر من كده.

6- العميل بتاع “والله مش فارقة اعمل اللي انت عايزه”

دا عميل بيبقي مسلم نفسه وميعرفش أي حاجه في اي حاجه ومش بيكون قادر يوضحلك أي تفاصيل انت محتاجها أو قادر يساعدك توصلّوا المشروع للشكل الصح او الشكل اللي هو محتاجه، لإنه ببساطة مش طالب حاجة معينة، هو عايز مشروع وخلاص.

ازاي تتعامل معاه؟

حاول تاخد منه معلومات على أد ما تقدر عن شكل المشروع اللي هو طالبه وحاول تقدمله اللي هو طلبه، بعدها استغل المساحة اللي العميل مديهالك وحاول تبدع في المشروع على أد ما تقدر واعتبر نفسك بتقدم عمل جديد للبورتفوليو بتاعك.

7- العميل بتاع “أصل أنا بحب أهتم بالمشروع أوي”

دا عميل ممكن يخنقك أحياناً لإنه بيطلب حاجات محددة جداً بتفاصيل محددة ومش بيديك الفرصة تحط أفكارك أو تبدع وتحط وجهة نظرك أو تبين شطارتك، لا هو بيستعملك كأداة تخلصله اللي فدماغه وخلاص.

ازاي تتعامل معاه؟

اسمع منه كل حاجه واتناقش معاه في كل نقطة ووضحله وجهة نظرك وبينله انك فاهم في شغلك ويقدر يثق فيك وإنك قادر تطبقله المشروع بالشكل المريح ليك وليه، ومتخافش تقوله إن في حاجه هو طالبها مش هينفع تطبق في المشروع وعرفه أسبابها.

8- العميل بتاع “والله أنا مش عارف أنا عايز إيه، بس هو أكيد مش اللي انت سلمته”

دا عميل مشتت نفسه وبيشتتك معاك عشان مش بيبقى قادر يحدد المشروع اللي محتاجه شكله عامل إزاي بس بيتوقع منك بدون مبرر إنك تكون عارف. 

ازاي تتعامل معاه؟

دا عميل ممكن تبعد عنه للحفاظ على سلامك النفسي ولتجنب تعب الأعصاب اللي هيكون سبب فيه، بس لو حابب وقادر تتعامل معاه أطلب منه أمثلة لمشاريع هو حابب شكلها وشايفها مناسبة وعايز نتيجة مشابهة، كده تبقى فهمت دماغه وتحاول على أد ما تقدر تقدمله اللي هو طالبه.

9- العميل بتاع “في حد قال هيعملهالي أرخص من كده “

دا عميل حياته كلها بتدور حوالين فكرة الفصال ومحاولة دفع أقل مبلغ ممكن مقابل أعلى كوالتي شايفها وبيحس بإنجاز رهيب لما ياخد منك الخدمة بسعر أقل من المطلوب. 

ازاي تتعامل معاه؟

قبل ما تبدأ شغل مع العميل امضي عقد بينك وبينه بيوضح حقوقك المالية، ومتبدأش المشروع غير لما العميل يبعتلك 50% من سعر المشروع كديبوزت وميحصلش تحت أي ظرف مناقشة لتقليل سعر المشروع بعد ما سلمته.

10- العميل بتاع “بعتلك تعديل 3 الفجر عدلته؟”

دا عميل معندوش أي احترام لخصوصيات الناس، وبيعتبر إن شغلك كفريلانسر وعدم وجود مواعيد محددة ليك في الشغل فأنت شغال 24 ساعة وواجب عليك ترد في ساعتها.

ازاي تتعامل معاه؟

عرف العميل جدولك وتوقيتاتك اللي بتكون متاح فيها واتعود تقوله لا على الحاجات اللي هتيجي على صحتك النفسية وهتاخد من ساعات راحتك.

11- العميل بتاع “مش عاجبني اللوجو هنا ومن غير ليه”

دا العميل الي عينه بتشوف حاجات صغيرة جداً في المشروع ممكن تتعدل عادي بس بيكبرها وبيحس إن المشروع كله وحش نتيجة للحاجه ديه ومبيثنيش على أي شغل غير اما يكون راضي عليه 100%، وفي الأغلب العميل ده مبيعرفش التعديل المطلوب عشان يظبط الحاجه اللي مضايقاه.

ازاي تتعامل معاه؟

إسأله وحاول تستشف منه هو حابب يعدل دا إزاي ولو هو مش عارف هتقترح عليه حلول من وجهة نظرك وتعرض عليه التعديلات وتخليه يقرر هل دا مناسب معاه ولا لا، ولو لسه مُشتت وميعرفش فراجع نفسك وحط في اعتبارك إنك ممكن تسيب العميل ده.

12- العميل بتاع “إيه دا انت مخلصتش المشروع اللي بعتلك تفاصيله من 3 دقايق؟”

دا شخص بيتعامل مع الفريلانسرز على إن اللي بيقدموه حاجه سهلة جداً وتاخد 5 دقايق ومش محتاجة كل المجهود ده يعني، وده الشخص اللي بيبقي فاكر إن لو عنده المهارة ديه بس كان خلص المطلوب في وقت أقل بكتير بس للأسف هو مضطر يلجألك.

ازاي تتعامل معاه؟

اتكلم معاه بكل صراحة ووضحله إن الشغل مش بيحتاج 5 دقايق ولا حاجة وفي مشاريع بنقضي فيها أيام كاملة عشان تخْلص وإن المسألة مش مسألة وقت بس على أد ما هي وقت ومجهود وبتعتمد على شطارة اللي بيقدمها.

13- العميل بتاع “اسف غيبت عليك اسبوع، ها وصلنا فين فالمشروع؟”

دا عميل بيغيب أوقات طويلة ومش بيكون متاح وقت ما تبعتله تسأل على تفاصيل أو تحتاج منه معلومات، ووقت ما يظهر بيبقي عايز الحاجات المطلوبة تتسلم في أسرع وقت عشان إزاي يسيبك كل الوقت ده ومتكونش خلصت! 

ازاي تتعامل معاه؟

عرّف العميل في العقد إنك معاك وقت محدد تخلص فيه المشروع من يوم كذا ليوم كذا، ولو حصل لأي ظرف إن الفترة ديه خلصت بعدم تواجده وعدم الانتهاء من المشروع فانت مش مسئول وللأسف مش هتقدر تكمل المشروع أو تسلمه.

الخلاصة

مجاراتك لسوق العمل الحر بيتطلب يبقي عندك مهارات تواصل إجتماعي عشان تعرف ترضي العميل من غير ما تيجي على نفسك، وديه مهارات هتيجي بالخبرة وكتر المواقف وبتطلب يبقي عندك ذكاء اجتماعي عشان تعرف تكتسبها مع الوقت.

طب العميل المرهق ده ازاي أخليه يتعود على أسلوب الشغل الخاص بيا ومهما كانت العادة اللي مخلياه مرهق ديه يبطلها ويتحول لعميل مُريح واحافظ عليه كعميل مستمر معايا دايما؟

دا اللي تقدر تعرفه في مقال 8 مفاتيح لتحويل العميل المرهق لعميل مُريح.