ليه مهم جدا أنك تحط نفسك مكان العميل؟
حاولت قبل كده تحط نفسك مكان العميل وهو بيختار الناس علي موقع Upwork, وتحاول تشوف انت بتظهر قصاده ازاي لما تقدم علي وظيفة؟ وعرض العمل بتاعك بيبقي شكله عامل ازاي؟ وهو بيختار الناس بناءا علي أيه؟
الحركة دي كانت كفيلة أنها تقلب عالم الفريلانس بالنسبالي, لما أحتجت مساعدة فى حاجة وعملت أكونت عميل عشان أطلب خدمة من حد, ,وقتها لقيت نفسي تلقائي اتحطيت فى نفس الوضع اللي بيبقي فيه العملا اللي بيقيموني أنا وغيري عشان يقبلوا واحد مننا يشتغل معاهم, ولقيت نفسي تلقائي قاعد بشوف مين عاجبني (وعاجبني ليه), ومين كنت بقول من أول لحظة أني مش هشتغل معاه (وليه كنت بقول كده). ومن وقتها بقيت مدرك جدا الوضع اللي بيبقي فيه العميل. وفهمت ازاي أقدر أحسن من مستوايا لما أقدم عرض العمل تبعي عشان أقنع العملا بيا بعد كده. والحمد لله ده فرق معايا جدا فى رحلتي فى عالم الفري لانس.
فالمقال ده هو تجربة حقيقية مننا في “Freelanzwya“ اننا ننزل عرض عمل من أكونت علي أشهر مواقع العمل الحر “موقع Upwork”، وقدملنا اكتر من ١٠٠ شخص علي الوظيفة دي، وقبلنا واحد بس منهم، فاتمني انك تركز جدا في المقال ده لأنه ممكن يكون أهم مقال يعرفك بطريقة عملية حقيقية العميل بيفكر أزاي وهو بيختار الشخص المناسب ليه، وكمان تقدر تشوف ايه اللي بيظهرله لما بتقدم علي وظيفة من الموجودين علي مواقع العمل الحر.
الوظيفة اللي نزلناها علي Upwork:
الصورة دي هي شكل الوظيفة اللي نزلناها علي Upwork، كنا محتاجين حد يترجم فيديوهات قناتنا من اللغة العربية للانجليزية، وياريت تركز علي آخر سطرين لأن دي حركة بيعملها عملاء كتير جدا, وهي طريقة بيستخدموها عشان يستبعدوا الفريلانسرز اللي بيقدموا عروض عمل من غير ما يكملوا قراءة العرض، وبيقدموا كلام محفوظ وخلاص.
هنا هتلاقينا منزلين الوظيفة وكاتبين في الآخر أنهم يبدأوا عرض العمل بتاعهم بكلمة Tarjama.
فبالتالي لو لقينا حد مقدم من غير ما يعمل ده، فأحنا نستبعده تلقائي. وده اللي بيعمله العملا بالفعل. فهتلاقيهم أحيانا بيحطوا جملة تبدأ بيها, او حاجة تقولها فى البداية معينة, عشان يفلتروا الناس اللي قرأت الوظيفة كويس وفهمتها, من الناس اللي بتقدم علي أي حاجة. بل أحيانا كمان هتلاقي العملا بيكتبوا كلام فى النص بسؤال معين “مثلا ايه أكتر لون أنت بتحبه”, عشان يتأكد انك لو جاوبت علي السؤال ده, يبقي انت فعلا قريت عرض العمل بتاعه كويس. لأنهم مش مستعدين يدفعوا فلوس لحد بيقدم علي أي وظيفة بتنزل وخلاص.
المفاجأة بقي أن من ال ١٠٠ واحد اللي قدم، كان في أكتر من ٧٠ واحد مبعتش لينا الكلمة دي، فلك أن تتخيل أن في ٧٠ واحد قدملنا وأصلا احنا مقرأناش عرضهم، ولغينا عرضهم من البداية، فدي أول نقطة مهمة جدا تطلع بيها من المقال ده وهي أنك تكمل قراءة البروجكت كامل لأن ممكن كلمة واحدة بس تغير موازين العرض اللي أنت بتبعته, وتبقي قدمت علي الفاضي ورميت فلوس فى الهوا “ متنساش ان التقديم بكونيكتات” اللي هي بفلوس علي أبوورك.
كم سعر الــ 1 Connect علي موقع Upwork؟
سعر الــ 1 connect علي Upwork بــ 15 سنت أمريكي, يعني ال 10 منهم بدولار ونص. وموقع Upwork بيديك
10 كونيكت شهريا ببلاش. وبعد كده انت بتشتري الــ Connects دي بفلوس حقيقية عن طريق فيزا. أو لو عندك فلوس علي موقع أبوورك, فتقدر تشتري بيهم علطول.
أيه اللي بيظهر للعميل لما بتقدم عرض العمل تبعك علي موقع Upwkork؟
بعدين نيجي للصفحة دي اللي بتظهر للعميل بالفعل، وخلينا نكتشف بعض الحاجات منها
كل واحد مننا بيظهر للعميل بيبقي جنبه بعض الاختيارات زي دي:
- 1- ده بيبقي المسمي الوظيفي اللي أنت كاتبه عن نفسك بالفعل, فالمفترض لما تقدم علي وظيفة, تقدم علي وظيفة تناسب المسمي الوظيفي بتاعك. لأنكم هتلاقوا ناس كاتبين انهم مبرمجين, ومع ذلك بيقدموا علي شغلانة طالبة ترجمة.. فدول بنسبة كبيرة العملا أصلا مش بيبصوا علي عرض العمل بتاعهم, وعشان كده أبوورك نفسها حاطة أنك ممكن يبقي ليك أكتر من بروفايل بأكتر من مسمي وظيفي مختلف عشان لو هتقدم علي وظايف بمهارات مختلفة “ هنشرح ده لوحده فى مقال قادم”.
- 2- ده السعر اللي أنت مقدم بيه علي الوظيفة
- 3- ده المكسب الإجمالي اللي أنت كسبته علي الموقع
- 4- ده التقييم بتاعك علي الموقع, ولو كنت واخد بادج علي الموقع, فهيظهر جنبه.. زي مثلا Top Rated / Top Rated Plus
- 5- دي معناها أنه بيستبعدك تماما, وبيحط العرض بتاعك فى الأرشيف عشان ميظهرلهوش تاني, وخلي بالك أن من أقوال العملا علي موقع أبوورك, أن أسهل حاجة عندهم أنك لو مشديتهوش من اللحظة الأولي, هيحطك فى الأرشيف, خصوصا لو مقدم غيرك كتير.. فيرضيك تتحط فى الأرشيف يا صاحبي؟
- 6- دي معناها أنه معجب بيك وبيحطك فى قايمة ال Shortlisted قايمة ال VIP يعني.. يعني أبسط ياعم .. الراجل بيفكر يختارك, بس بيشوف مين اللي هينافس معاك.
- 7- ودي معناها انه داخل يكلمك, سواءا بقي هيستفسر منك علي حاجة, أو هيقولك يلا نشتغل سوا وتظبطوا الكونتراكت سوا.
- 8- ودي الخطوة اللي كلنا بنحلم بيها بإذن الله, وهي أننا العميل يختارنا فى الآخر .. وبإذن الله ده اللي هيحصل لما نتعلم سوا أزاي نقدم علي عرض عمل.
عدد المقدمين علي الوظيفة:
لو بصينا فوق هنلاقي ان 110 شخص مقدم علي الوظيفة،. 7 منهم عجبونا جدا ,بس ٣ منهم عجبونا لدرجة أننا دخلنا كلمناهم، وفي الآخر أخترنا واحد منهم يشتغل معانا.
بس هتلاقي في ٦٩ واحد واحد احنا رفضناها تماما لأنهم مكتبوش كلمة ترجمة.
فتعالي بقي معانا في رحلة أزاي كنا بنختار ما بين الناس اللي حققوا أول شرط أساسي لينا وبدأنا نقارن ما بينهم، وتعرف العميل نفسه بيفكر ازاي.
ازاي العميل بيقيّم الناس ويختار اللي يشتغل معاه علي مواقع العمل الحر:
زي ما أنت شايف ان كل حد بيقدم عرض عمل، فأبوورك بتخلي أول سطرين بس من عرض العمل الخاص بيه هما اللي يظهروا. بالتحديد أول 250 حرف بالظبط. ولازم العميل هو بنفسه اللي يدوس علي عرض العمل بتاع الفريلانسر اللي مقدم عشان يفتح ويقرأ العرض كامل. فبالتالي لازم أول سطرين يخطفوا عين العميل وتجبره فيهم أنه يتشد ليك عشان يكمل قراءة. وده لأن فعلا معظم العملاء معندهمش وقت يبصوا علي كل اللي مقدم.. فاللي مش يشده من أول لحظة، مش هيكمل قراءة ليه.
والنقطة دي فيها كلام كتير من الشرح لأزاي تصيغ أحسن سطرين فى عرض عمل يخلي العميل يدخل يكلمك, او علي الاقل يحطك فى دماغه وتبقي احتمال كبير ليه يكلمك.. هتلاقينا شارحين ده في مقال تاني كامل وكاتبين أمثلة لأحسن الــ Proposals اللي قدرنا نجيب بيها أحسن العملا فى شغلنا. وأزاي تخلي مقدمة عرض العمل بتاعك مبتكرة بالفعل.
بس خلونا نتفق فى المقال ده أننا بلاش نستخدم المقدمات المحفوظة اللي كلنا بناخدها Copy/Paste ومفيهاش أي حاجة تخص شغل العميل نفسه ولا تعبر عن أننا مهتمين بيه, أو بنحرق أول سطرين فى اننا نتكلم عن نفسنا أحنا بدل ما نتكلم عن شغل العميل نفسه.
المهم أننا هنلاقي أن كل حد بيبعت بيظهر أسمه والمسمي الوظيفي اللي هو كاتبه عن نفسه، وتقييمه علي الموقع وكسب فلوس كام عليه.
وهتلاقي كمان علامة صغيرة كده لو حد عامل عرض العمل تبعه مموّل عشان يظهر في الأول ، ودي أسمها Boost your proposal ، ،واللي بيستعملها بيستهلك Connects أكتر علي أبوورك، وبيدخلوا علي مزاد علي أول ٣ أماكن بيتنافسوا عليهم
أخطاء وقع فيها معظم المقدمين علي الوظيفة:
يلا بقي بينا نشوف مفاجئات قابلناها غريبة جدا وأحنا بنشوف الناس اللي قدمت علي الوظيفة دي، وهختارلكم بعض الأمثلة بس عشان وقتكم.
المثال الأول:
ده حد كتبلنا سطر واحد بس، هو أها قرأ عرضنا كامل، والدليل علي كده أنه كتبلنا كلمة “Tarjma” في الأول بالفعل.. بس هو تقريبا أفتكر أن ده خلاص كافي عشان يقنعنا نختاره، وصرف كونيكتات عشان يقدم علي وظيفة يكتب فيها سطر واحد بس “أنا مهتم، كلمني نتناقش سوا”.
أنت متخيل أن ال “Connect الواحد اللي بتقدم بيه علي الوظيفة ب ١٥ سنت، يعني ده صرف تقريبا دولار عشان يكتبلي أنه مهتم، وبس.. تفتكر ده ليه فرصة في القبول؟ لو كنت مستغرب زيي بالظبط، فتعالي أوريك الأعجب من كده.
“أنا اجيد اللغة تماما”
فقط ده اللي اتبعت.. يعني تفتكر أن في حد من اللي مقدم لا يجيد اللغة؟ امال هيقدم ليه مثلا؟ ما اكيد كل اللي مقدم يجيد اللغة وبيتنافس مع 100 واحد غيره عشان يقولنا انه أحسن من غيره, يعني تفتكر أنه كده خلاص أقنعني أني أكلمه؟ يعني ليه ممكن واحد يبقي عنده الثقة دي في نفسه للدرجة دي؟ ^^
طيب شوف بقي اللي أجمل, كل اللي كتبهولنا, Tarjama:
أنا بستعرض معاك الأمثلة دي عشان تشوف معانا وتقتنع أن من ضمن العدد الضخم اللي بيقدم علي الوظايف, بيبقي كتير منهم بيرمي فلوسه ووقته وجهده فى الأرض تماما, والعميل مش هيبص علي أي حاجة من المكتوبة دي علي الإطلاق. وبالتالي اللي هيقدر يستغل ده لصالحه, فرصه هتضاعف بمراحل كبيرة جدا.
أحسن العروض اللي جاتلنا:
عد ما شفنا ناس مبصيناش علي عروضهم, تعالوا نشوف بعض الناس اللي كنا بنفكر نختار حد منهم بالفعل, ونشوف كان بيتوفر فيهم ايه:
هنلاقي ان كلهم بدأ العرض بتاعه بكلمة “Tarjma” زي ما طلبنا منه, وهنلاقي أن أول واحدة كمان كلفت نفسها وبحثت أكتر عننا وعرفت أن أسمنا “الكوفة” وده أسم الاستوديو اللي كنا مقدمين الوظيفة دي من خلاله, وهي عرفت أسمنا لما نزلت فى التقييمات اللي سايبهالنا بعض الفريلانسرز اللي قبلها اللي أشتغلوا معانا, وكتبوا تقييم بأسمنا, فده معناه أنها بحثت عننا أكتر.
طبعا لو حد منهم كان بيشدنا, فبنروح ندوس علي عرض العمل بتاعه عشان يظهر كله كامل لينا ونقرأه كامل.. فعشان كده بقولك أهتم جدا بأول سطرين..
حتي فى عرض عمل بدايته كانت مرحة وكتبلنا: Tarjma, Lol
فيما معناه أنه الحكاية اللي احنا طالبنها كوميدية, واحنا عملا دمها خفيف فأخدنا الموضوع بمرح, وحمّسنا أننا نفتح العرض بتاعه بالفعل ونقرأه.. وده اللي حصل فعلا وقرأناه كامل
ولقيناه بالفعل عرض كويس وبيتكلم عن الترجمة المخصصة لقنوات اليوتيوب زي ما أحنا عاوزين, وقايلنا كمان اننا لما ندخل الأكونت بتاعه هنلاقي حاجات من شغله اللي نقدر نقيمها “وإن كنت هعيب عليه أنه كان ممكن يسهل الأمر عليا أكتر ويبعتلي واحد أو اتنين منهم هو يكونوا شبه اللي انا عاوزه, لأن العميل بطبيعته معندهوش وقت”
ولو عندي تعقيب معين علي عرض العمل الخاص بيه اللي هو كاتبه, هيبقي أنه مش باعت أمثلة واضحة, وسيبلي الدنيا عايمة أنا اني أدخل علي ال Profile بتاعه وأدور في معرض أعماله بنفسي, ودي مش حاجة مفضّلة, والأحسن أنك تحصر العميل فى حاجتين تلاتة من أحسن الحاجات اللي أنت عملتها عشان ميتوهش وميتفرجش علي حاجات مختلفة. وتوفر عليه وقت.
بس احنا مكنش عندنا مشكلة .. ودخلنا شفنا بعض الأمثلة اللي هو منزلها وكلمناه بالفعل, ولما رد علينا أقتنعنا بكلامه وقررنا أننا نشتغل معاه.
كده أحنا الحمد لله شوفنا مثال عملي بالصور لأزاي العميل بيشوف عرض العمل بتاعك, وبيقيم الناس بناءا علي ايه. ولو عاوز تعرف أزاي تقدم بناءا علي الخطوات اللي أتعلمناها سوا هنا, هيبقي المقال ده هو الأنسب ليك عشان تشوف أزاي تكسب المنافسة دي وتقدر تفوز بالوظيفة بإذن الله
ولو عاوز تشوف التطبيق ده بالفعل خطوة بخطوة في فيديو كامل, فأحنا عاملين ليك فيديو علي قناتنا علي اليوتيوب بنوريك فيه بتطبيق عملي قصادك الرحلة دي كلها بالفعل. وتقدر تشوفه من هنا:
