أنا بشتغل في مجال إدارة قنوات اليوتيوب بقالي 4 سنين، وتميت بالفعل 2000 ساعة عمل على موقع Upwork كـ Youtube Channel Manager، وتم تصنيفي من موقع Upwork كـ رقم 1 في مصر في المجال ده، وكرقم 3 في الوطن العربي. ودي بالفعل صورة من أكونتي علي الموقع.
ولو هطلعلك من خلاصة خبرتي في المجال ده مهارة واحد تقدر تغيرلك شغلك كله مع العميل وتخليه في حتة تانية فهي مهارة تحليل قنوات اليوتيوب أو الـ Channel Audit. ودي المهارة اللي بعتبرها مفتاح كل حاجة، مفتاح انبهار العميل بشغلك، مفتاح تحسين قناة العميل، مفتاح اختلافك عن باقي الفريلانسرز، ومفتاح الخطوة الأولى ليك مع أي عميل.
بس لو عايز تاخد الصورة بشكل أوسع من كده وتتعلم كل حاجة من الصفر عن مجال إدارة قنوات اليوتيوب لحد ما تقدر تشتغل في المجال بنفسك، أو تتميز بيه في مجالك مع مهارتك الأساسية فأنا عاملك كورس تقدر تتعلم فيه مجال إدارة قنوات اليوتيوب في 20 ساعة، والكورس شامل شرح وتطبيق ووجود بعض التاسكات والمهارات الأخرى زي إنشاء بورتفوليو أو ازاي تجيب أول عميل ليك في المجال، وتقدر توصل للكورس من هنا
في نهاية المقال ده هتلاقي Template جاهزة ومنظمة لكل حاجة احنا هنتكلم عنها فى المقال ده، وتقدر تستخدمها بشكل مجاني وتملى فيها بيانات العميل الخاص بيك من غير ما تشيل هم التنظيم أو الشكل أو الخطوات اللي هتمشي عليها لإني جمعتلك كل ده في مكان واحد كهدية مني ليك وتقدر تستخدمه على طول
ملحوظة: الصيغة المجانية اللي انا سايبهالك في آخر المقال تقدر تستخدمها بأي شكل تحبه ماعدا إنك تبيعها، لإني مطلعها بشكل مجاني تماماً لوجه الله بغرض الاستفادة للجميع ^^
تعريف مهارة الـ Channel Audit
مهارة الـ Channel Audit أو كما يطلق عليها “تحليل قنوات اليوتيوب” عبارة عن مهارة بتساعدك تعرف كل المعلومات والإحصائيات اللي موجودة على قناتك أو قناة العميل، والمعلومات اللي بتستخرجها منها بتساعدك تبني خطة كاملة من الألف للياء تقدر تحسن بيها قناة اليوتيوب الخاصة بالعميل.
المهارة دي عبارة عن خطة كاملة بنعملها للعميل على قناته على اليوتيوب علشان نقوله:
- ايه الخطوات اللي ماشي عليها صح فيما يخص القناة
- ايه الخطوات اللي اللي ماشي عليها غلط فيما يخص القناة
- ايه النقط اللي نقصاه
- محتاج يركز على ايه الفترة الجاية
- ايه انسب محتوى لقناته وازاي يطبقه
- ايه الخطة اللي هنمشي عليها خلال الـ 6 شهور القادمة
وانا بالفعل اشتغلت بالمهارة دي مع عملاء صرفوا اكتر من مليون دولار على قنواتهم، واشتغلت مع عملاء عندهم اكتر من مليون متابع وحققنا نتائج رائعة، فالمقال ده مع الـ Template اللي هتلاقيه في آخر المقال هيساعدوك بالمهارات المطلوبة اللي تخليك تقدر تشتغل على القنوات دي زيي بالظبط ^^
أول خطوة قبل الـ Channel Audit
اول خطوة هتعملها بعد ما العميل يتواصل معاك علشان تحلله قناته هو إنك تطلب منه Access كامل لقناته أو تعرفه إنك محتاج صلاحية علشان تقدر تاخد بصة على القناة من جوا وتشوف كل الداتا الخاصة بيه.
تقدر تطلب منه الـ Access كـ Viewer اللي هيساعدك تقدر تتابع الأرقام والداتا كلها ولكن من غير ما تغير أي حاجة في القناة. وده بيبقى أنسب حل لإن العميل لسه مش واثق فيك أوي لدرجة إنه يديك الـ Access كـ Editor يمكن تمسحله فيديو بالغلط أو تلعب في حاجة خاصة بيه.
تقسيمة الـ Template
في نهاية المقال هتلاقي لينك التمبلت اللي انا عاملهالك جاهزة وتقدر تستخدمها على طول، والـ Template دي هتلاقيها متقسمة لـ 7 أجزاء هما دول اللي لما تملاهم هتبقى انت بالفعل قدرت تحلل قناة العميل وتطلع منها كل المعلومات اللي تساعده يحسن القناة. والـ 7 أجزاء دول هما كالآتي:
- Keyword Research for : (اسم قناة العميل)
في الجزء ده هنضيف للعميل الكلمات المفتاحية اللي قناته بتهدف لاستخدامها أو بتتكلم عنها، سواء هو بيستخدم الكلمات دي أو لا. وطبعاً شطارتك هتظهر لما تطلعله كلمات مهمة ليه ولكن هو مش بيستخدمها، فتضيفهاله وتشرحله يستخدمها ازاي.
وهتلاقي في الجزء ده جوا التمبلت تفاصيل بتضيفها عن كل كلمة بتلاقيها زي:
- معدل البحث عن الكلمة
- المنافسة على الكلمة
- سكرين شوت للموقع اللي طلع النتائج عن الكلمة دي
- Channel Audit & Optimization
و الجزء ده هو تحليل القناة اللي احنا هنشرحه في المقال ده.
- SEO & Promotion
الجزء ده بتضيف فيه للعميل كل تفاصيل السيو الخاص بالقناته وايه نسبة نجاحه فيه، وهنتكلم عنه في مقال كامل قريباً.
- Video Content
في الجزء ده بتشوف بنفسك هل العميل فعلا بيقدم محتوى مناسب للقناة بتاعته وللمنافسين ولا لا، فتبدأ تراجع الفيديوهات الخاصة بالقناة من ناحية:
- الاسكربت الخاص بالفيديو
- الهوك بتاعة الاسكربت
- طريقة التصوير
- المونتاج
ومن هنا هتقدر تقترح على العميل محتوى يساعده في تحسين القناة بتاعته نتيجة للتحليل اللي انت لسه عامله.
- Thumbnail
في الجزء ده هتدرس الصور المصغرة الخاصة بفيديوهات العميل وتحللها وتشوف هل هي مناسبة ولا لا، وده محتاج يبقى عندك نظرة فنية تقدر تحدد منها المشكلة في ايه بالظبط. هل العميل مش ملتزم بألوان محددة؟ هل النصوص على الفيديوهات حجمها صغير جدا؟ هل الصور مش مناسبة للمحتوى اللي العميل بيقدمه؟ وهكذا.
- Competitors
في الجزء ده هتدرس المنافسين وتعرف مين هما، وتبدأ تدرس نقاط قوتهم ونقاط ضعفهم وازي تستغل النقاط دي وتتفوق عليهم.
- General Notes
ده جزء خاص بيك هتضيف فيه أي اقتراحات حابب تضيفها للعميل، أو تكتب فيه أي نقطة انت لاحظتها في طريقك وانت بتدرس القناة ومش موجودة في أي جزء من الأجزاء الـ 6 اللي فوق.
والـ 7 أجزاء دول المفروض إنهم يساعدوا العميل يفهم قناته بالفعل، وتساعده يحول الأرقام والإحصائيات اللي في القناة لـ Action plan علشان يعرف هو المفروض يعمل ايه بعد كده.
ولو قدمتله ده بشكل احترافي ومناسب فبنسبة كبيرة جداً هيختارك انت اللي تشتغل معاه كـ Youtube Channel Manager.
خطوات الـ Channel Audit & Optimixation
- أساسيات القناة
في الجزء ده هتبدأ تكتب وتراجع أساسيات القناة، زي:
- القناة فيها كام فيديو وفيها كام مشترك
- الـ Content Fouce الخاص بالقناة، يعني ايه نوع المحتوى اللي القناة بتقدمه
- الـ Current Content Strategy الخاصة بالقناة، يعني العميل بيشتغل ازاي على القناة، وايه نوع الفيديوهات اللي بينزلها، وايه طريقة التسويق الخاصة بيه، وايه هدف القناة.
ففي المثال ده، القناة دي عندها 164 مشترك رغم إن عندهم 126 فيديو، فهما بالفعل بيواجهوا مشكلة من الاتنين. الأولى إن محدش بيشوف القناة بتاعتهم، أو التانية انهم مش قادرين يقنعوا الناس بالمحتوى اللي بيقدموه بالفعل.
فبكتب الكومنت البسيط ده عندي علشان ابقى عارف بعد الـ Audit انا هشتغل على ايه.
- الفيديو الأول على القناة
في الجزء ده بشوف العميل ضايف بالفعل فيديو مثبت ليه في بداية القناة ولا لا، لإن وجوده مهم جداً، فهتوضح ده للعميل في كومنت بسيط.
وعلشان تعمل ده بتروح على الـ Youtube Studio وبتفتح جزء الـ Customization ومنه بتروح على Video Spotlight ومن هنا بتعرف العميل عامل ده فعلا ولا لا.
وفي الجزء ده في اختيارين:
- إنك تضيف فيديو يظهر للناس اللي مش مشتركة في القناة خالص. والفيديو ده انصحك يكون فيديو تعريفي عن القناة، بتقول فيه القناة بتقدم ايه، وتعرف الناس هي هتستفيد ايه لما تشترك فيها، ولازم تكون الأسباب دي قوية فعلا علشان الناس تشترك بالفعل.
- إنك تضيف فيديو يظهر للناس اللي مشتركة بالفعل في القناة. ودي ناس عارفة قناتك بتقدم ايه فعلا ومهتمه بيها، فمش هتفيدهم أوي بالفيديو التعريفي اللي انت حاطه للناس اللي متعرفش القناة. فهنا تقدر تضيف أفضل فيديو ليك على القناة، أو تضيف أحدث فيديو ليك بحيث الناس تبقى متابعة معاك أول بأول، ولو عملت كده فهتبقى محتاج تغير الفيديو ده كل ماتنزل فيديو جديد.
- تنظيم القناة
هنا هتعرف العميل منظم القناة بشكل مناسب في Playlists ولا الفيديوهات سايحة على بعض.
فلو العميل قناته صغيرة لسه مش عليها فيديوهات أوي فتقدر تتخطى الخطوة دي.
لكن لو العميل عنده فيديوهات كتير ومش منظمهم فاكتب كومنت بإنكم محتاجين تنظموا الفيديوهات على القناة بشكل معين.
ولو العميل بالفعل عامل Playlist فهتبدأ انت تحللها وتسجل ملاحظاتك وتشوف:
- هل الفيديوهات اللي متجمعة سوا فعلاً مرتبطة ببعض؟
- هل في وصف مكتوب للـ Playlist؟
- هل أول فيديو في الـ Playlist هيشد الناس فعلاً تكملها؟
- واجهة القناة
في الجزء ده بنشوف الـ Branding الخاص بالقناة، فمن Customization هتروح على Profile هتلاقي حاجتين:
- الـ Watermark، وده لوجو القناة أو زرار بيظهر في أسفل الفيديوهات كده لو المشاهد داس عليه بيظهرله زرار الـ Subscribe على طول. ومن خبرتي برضو في الجزء ده إنك تخلي الزرار ده لوجو القناة بتاعتك علشان يقدر يثبت في ذهن المشاهد طول ماهو بيتفرج.
- الكافر الخاص بالقناة، وده هتحتاج هتراجعه مع اللوجو وتشوف هل مناسبين للقناة فعلا ولالا، ومن خبرتي بحب في الجزء ده اقترح على العميل لو هو ناوي يلتزم بإنه ينزل فيديوهات بشكل دوري إننا نكتب المعاد ده في الكافر.
والمعاد ده برضو تقدر انت تقترحه على العميل لو قناته بالفعل شغالة وعليها فيديوهات، والطريقة دي بنجيبها من احصائيات القناة على اليوتيوب برضو، اللي بيقولنا ايه افضل وقت المتابعين بيتفاعلوا مع القناة وبيكونوا فاتحين يتفرجوا على الفيديوهات.
وتقدر توصل للوقت ده من جزء الـ Analytics وبعدها تروح على Audience وتنزل لحد الجزء اللي فيه When Your Viewers Are On YouTube، ومن هنا بالظبط هيقولك القناة بتاعتك بتكون نشطة جدا يوم كذا الساعة كذا، فتقدر وقتها تحدد انت محتاج تنزل الفيديو الساعه كام.
أما بقى لو انت شغال على قناة مع عميل لسه معندهوش اي فيديوهات فاليوتيوب هنا مش هيقدر يساعدك بأي إحصائيات، فهتروح انت بنفسك تعمل سيرش عن المواعيد المناسبة طبقاً لبلد العميل وتوقيت البلد دي والناس اللي انت بتستهدفها داخل البلد دي بتفتح امتى.
- معلومات القناة
الجزء ده هو اللي تحت الكافر والبروفايل بالظبط، وهتلاقي فيه معلومات القناة الأساسية زي اسم القناة والدسكربشن والـ Handle.
مهم جدا تحلل الدسكربشن بتاع القناة وتشوف هل العميل كاتبه فعلا ولا لا، ولو كاتبه فهل هو وصف مناسب للقناة ولا محتاجين نغيره؟ وتبدأ تحط الكومنتات بتاعتك كلها للعميل. وهتبقى نقطة قوة ليك جداً لما تقترح على العميل إنكم تكتبوه باستخدام الـ Keywords اللي انت طلعتها في أول جزء علشان ده هيحسن نتائج الظهور للقناة.
وهنا نيجي على جزء الـ Handle، وده الجزء اللي بيبقى مكتوب فيه القناة هتظهر باسم ايه وهي بترد على كومنتات الناس، فبدل ماتبقى شوية حروف و أرقام عشوائية اقترح على العميل نغيرها لاسم القناة او اسم قريب علشان نقدر نثبت في ذهن الناس أكتر لما تشوف اسمنا في الكومنتات.
- احصائيات القناة
في الجزء ده كل اللي هتعمله هو إنه ترجع لبداية الصفحة الخاصة بالـ Analytics وتاخد سكرين شوت لإحصائيات القناة في آخر 90 يوم. وتوضح للعميل إن الاسكرين دي للمتابعة علشان تساعدنا نعرف لما نشتغل سوا القناة اتطورت بنسبة اد ايه.
والاسكرين دي بالفعل فيها كل الإحصائيات المهمة اللي انت محتاجها علشان تقيس نجاح القناة وتساعد في تحسينها زي:
- عدد المشتركين الجداد في القناة خلال الـ 90 يوم اللي فاتوا
- عدد المشاهدين لفيديوهات القناة خلال الـ 90 يوم اللي فاتوا
- الأرباح اللي القناة حققتها خلال الـ 90 يوم اللي فاتوا
- فيديوهات القناة اتشافت كام مرة خلال الـ 48 ساعة اللي فاتوا
- انجح فيديوهات للقناة خلال الـ 90 يوم اللي فاتوا
وآخر نقطة دي هتعملها تحليل لوحدها، وتدرس الفيديوهات دي بالتفصيل وتوضح للعميل من وجهة نظرك ايه اللي حصل في الفيديوهات دي مختلف عن غيرها خلاها ناجحة. ووراد جدا تلاقي القناة اللي انت شغال عليها ملهاش فيديوهات ناجحة، فهتحتاج تبذل مجهود أكبر علشان تعرف هتحسنهم ازاي.
- محتوى القناة
في صفحة الـ Analytics هتروح من فوق تختار Content وتنزل عند How Viewers Find You علشان نعرف الناس بتجلنا ازاي وعلى اساس ايه فنقدر نحدد احنا هنركز على ايه اكتر.
هتدوس على See More فهتلاقي نفسك روحت لصفحة فيها احصائيات اكتر هتعرف منها ايه كل الطرق اللي الناس بتجي للقناة من خلالها لو القناة شغالة بالفعل وعليها مشاهدات ومشتركين. فهتلاقي أغلب الوقت الناس بتيجي عن طريق الـ Browse Feature وهي الناس اللي بتيجي بسبب ترشيحات اليوتيوب للفيديوهات على الـ Home Page الخاص بيهم، أو الناس اللي مشتركة في القناة بالفعل وبيظهرلهم فيدوهات القناة فبتدخل تشوفها.
ولكن احنا هنا هنهتم أكتر بالـ Search Traffic اللي هو ناس بحثت بكلمات محددة فاليوتيوب بيظهرلها القناة بتاعتك فبتشوف الفيديوهات بتاعتك. لما بتدوس على الـ Search Traffic هيجيبلك اهم الكلمات اللي الناس بتبحث بيها وبتظهِرلها القناة بتاعتك.
من الكلمات دي هيبقى معاك خيط البداية اللي هيقولك إنك محتاج تركز أكتر على الكلمات دي في المحتوى بتاعك وعلى قناتك علشان نسب مشاهداتك تعلى. والكلمات دي تقدر تدخلها مع السيرش بتاعك في خانة الـ Keyword Research.
ومن الاحصائيات اللي فاتت دي اكيد هتلاحظ إن الأفضل إن أرقامنا تكون أعلى في الـ Search Traffic عن إننا نعتمد بس على الـ Browse Feature، فهتحتاج توضح للعميل ده وتضيفله الكومنت بتاعك.
- بلد متابعين القناة
من نفس المكان اللي انت كنت بتشوف فيه الـ Search Traffic هتلاقي فوق خانة الـ Geography اللي هتعرف منها المتابعين للقناة دي منين بالظبط، ومن الخطة بتاعة العميل والجمهور اللي هو مستهدفه هتقدر تلقط بنفسك لو في مشاهدات فيك للقناة. لإن مش طبيعي إن العميل يبقى مهتم بالمصريين وتبقى أغلب مشاهداته من كندا مثلا!
- متابعين القناة
لو القناة شغالة بالفعل وعليها فيديوهات ومشاهدات فالجزء ده مهم جداً جداً ليك وهيفرق معاك في تحسين القناة.
من صفحة الـ Analytics هتروح فوق تختار Audience وتنزل تحت على اليمين هتلاقي جزء اسمه Channels That Your Audience Watches. الجزء ده هيعرفك المتابعين اللي عندك على قناتك بيتابعوا قنوات ايه تاني، فتدخل انت تحللهم وتدرسهم، ولو لقيت فعلاً قنوات شبيه ليك فتخليها على جنب علشان هنستخدمها في بحث المنافسين، أو تقدر تستخدمها عن طريق إنك تعمل بينهم شراكة وتقدموا فيديو سوا فتقدروا تعلموا ماركتنج لبعض.
وفي نفس الصفحة برضو هتلاقي جزء اسمه What Your Audience Watches، وده جزء هيعرفك متابعينك بيتفرجوا على فيديوهات ايه تاني، واللي غالباً هتبقى شبيهة لمحتواك. فهتدرسها كويس وتطلع منها أفكار ترشحها للعميل كأفكار محتملة يقدر يقدم بيها محتوى للفيديوهات في الخطة القادمة، وتضيفه في جزء الـ Video Content في التمبلت.
- مجتمع القناة
أغلب العملاء مش بيهتموا بجزء المجتمع الخاص بالقناة أو ما يسمى بالـ Community Posts ولكنها مهمة جداً، فدورك إنك ترشحها للعميل وتقنعه بأهميتها لإنها بتساعد المتابعين يتفاعلوا مع القناة خصوصاً لو في تصويت أو مشاركة بأي شكل، وتقدر انت تنزل بوستات وتصويتات ليها علاقة بمحتوى القناة بتاعك يساعدك تعرف المتابعين عايزين يسمعوا ايه وتضيفه في خطة محتواك.
لينك الـ Template
كل اللي شرحتهولك في المقال ده هتلاقي ريفرنس ليه في التمبلت بشكل منظم جداً، كل اللي عليك تعمله هو إنك تملى التمبلت بالكومنتات والصور اللي هتاخدها من قناة العميل من غير ما تبذل أي مجهود تاني.
وتقدر توصل للينك الـ Template من هنا
الخلاصة
وهنا نكون وصلنا لنهاية المقال اللي فيه كل التفاصيل اللي انت محتاج تعرفها عن مهارة الـ Channel Audit اللي بدورها مجرد مفتاح لشغلك كـ YouTube Channel Manager. ولو مهتم تتعلم أكتر عن المجال وتعرف إيه الخطوات القادمة اللي بنعملها بعد ما العميل يقبلنا في المشروع ونبدأ نشتغل عليه بالفعل فمتنساش إنى عاملك كورس فيه شرح المهارة بالكامل تقدر توصله من هنا وبالتوفيق يا صديقي ^^
