لو بتخطط تبدأ مشوارك في الفريلانس وعاوز تجمع مصادر تعلم موثوقة و مجانية، يبقى المقال ده هيكون مرشدك الأول. هنا هتلاقي ترشيحات لناس عندهم قنوات يوتيوب بتقدّم محتوى مجاني قيّم يقدر يساعدك تاخد أولى خطواتك في أكتر من مجال مهم ومشهور فى مواقع العمل الحر.
الترشيحات دي هي بعد مراجعة أكتر من مصدر, وبعد آراء الكثير من الأصدقاء اللي بالفعل بيشتغلوا بالمهارات دي, وكانت دي ترشيحاتهم, وأكيد فى أصدقاء كتير ممكن مذكرناهمش وده لسهو مننا فقط, أو لأننا ذكرنا حد تاني. فنسأل الله التوفيق لكل اللي بينشر علم يفيد بيه غيره. ونبدأ علي بركة الله.
1- مصادر لتعلّم الجرافيك ديزاين وتصميم الصور.
- قناة نور ديزاين: قناة خفيفة ومناسبة جدًا لأي حد عاوز يبدأ يتعلم تصميم الجرافيك من الصفر. نور بيقدّم كورس فوتوشوب للمبتدئين، والكورس مجاني ومدته حوالي 4 ساعات، بيغطّي فيه الأساسيات خطوة بخطوة. بعدها بيقدّم سلسلة تانية تساعدك تكمل في مجال الجرافيك ديزاين وتطوّر نفسك، وبيعرّفك على مصادر ممكن تزود منها معلوماتك في المجال ده.
- لينك القناة: أضغط هنا
- قناة محمد خيال: محمد خيال بيوفّر كورسات متكاملة عن الفوتوشوب، الإلستريتور، والانديزاين، وبيشرح التصميمات المخصصة للسوشيال ميديا بشكل بسيط وممتع.
- لينك القناة: أضغط هنا
2– مصادر لتعلم البرمجة:
- من أكتر الناس اللي بنرشّحهم وبشدة لأي حد مبتدئ في البرمجة “وحتي لو محترف”:
- كودزيلا: قناة كودزيلا مناسبة لو أنت لسه في أول طريقك في البرمجة وبتدور على أساسيات تقدر تبني عليها.
- لينك القناة: أضغط هنا
- يحيى تك: القناة دي بتقدّم محتوى للمبتدئين والمتوسّطين في البرمجة، وتقدر تختار بعد كده التخصص اللي يناسبك، سواء تطوير المواقع أو التطبيقات أو غيرهم.
- لينك القناة: أضغط هنا
- أسامة الزيرو : قناة أسامة الزيرو هي من أقدم وأفضل القنوات علي الإطلاق اللي بتشرح البرمجة واللي أتربي عليها الاف المبرمجين فى مراحلهم المختلفة.
- لينك القناة: أضغط هنا
3- مصادر لتعلّم الميديا بايينج Media Buying:
- Content is Content – أحمد حافظ: البشمهندس أحمد حافظ بيشرح الميديا بايينج بطريقة بسيطة وواضحة، واللي بيخليك تفهم الأساسيات بشكل احترافي، وده هيساعدك تبدأ في المجال وتوسّع معرفتك فيه.
- لينك القناة: أضغط هنا
- باسم مجدي: لو حابب تدخل مجال إدارة الإعلانات والتسويق على السوشيال ميديا، قناة باسم هتكون مفيدة جدًا ليك. بيقدّم محتوى فيه تفاصيل كتير وإرشادات هتساعدك تفهم أسس المجال ده كويس.
- لينك القناة: أضغط هنا
4- مصادر لتعلم المونتاج وتحرير الفيديوهات:
- مصطفى مكرم: واحد من أفضل الناس في مجال المونتاج والفيديو إيديتنج على اليوتيوب. مصطفى بيشرح برنامج Adobe Premiere، وهو برنامج أساسي لأي شخص مهتم بالمونتاج. بعد ما تخلص السلسلة دي، ممكن تبدأ تشوف برامج تانية زي Filmora أو غيره على حسب اختيارك.
- لينك القناة: أضغط هنا
Amr Atallah – عمرو عطاالله:
واحدة من أفضل القنوات علي الإطلاق لتعلم المونتاج والتصميم عموما, وميزتها أن ليها سلاسل منظمة جدا وبتاخدك من البداية تماما لو لسه متعرفش أي حاجة. فهي قناة ننصح بيها جدا
مواقع وكورسات عالمية ممكن تستفيد منها:
- كورسات على كورسيرا (Coursera): الموقع ده بيوفّر كورسات من جامعات عالمية، وفيه ميزة “Financial Aid” اللي بتسمح ليك تاخد كورسات بشهادات لو قدّمت طلب إنك محتاج تدعم الكورس بشكل مجاني بسبب الظروف الاقتصادية.
- كورسات جوجل المجانية بشهادات: لو مجالك له علاقة بالديجيتال ماركتينج، فالشهادات اللي جوجل بتقدّمها هتكون إضافة قوية ليك، وهتفرق معاك كتير في مجالك.
- موقع هابسبوت (HubSpot): بيوفّر كورسات في التسويق الرقمي بشهادات معتمدة ومجانية، ودي هتكون مفيدة جدًا لو مهتم بمجال التسويق. وهتلاقي في شهادتين مجانيتين تماما فى مجال التسويق الرقمي, وهي شهادة قوية جدا وهتفرق معاك جدا
- لينك الموقع: أضغط هنا
الجدول المقترح للدراسة والتطبيق:
بعد ما اخترت المجال اللي هتبدأ فيه، حط لنفسك خطة يومية تلتزم بيها كالتالي:
- ساعة يومياً للدراسة والمتابعة مع المحتوى التعليمي.
- ساعة للتطبيق على اللي اتعلمته في اليوم ده.
ولو عاوز تعرف أزاي تطبّق ده داخل خطة كاملة لشرح الفريلانس, فممكن تشوف الخطّة دي من هنا:
استمر على الجدول ده لمدة أسبوع، وفي النهاية هتلاقي نفسك وصلت لمدخل كويس للمجال اللي اخترته، ومعاك أول خطوة حقيقية بخبرة بسيطة فيه.
نصيحة أخيرة:
ركز على إنك تطبّق على المهام اللي شايفها مطلوبة في سوق العمل؛ يعني لو مثلاً بتتعلم المونتاج وعاوز تدخل في مجال تحرير فيديوهات الإنستجرام ريلز، شوف شغل الناس اللي ناجحين في المجال على مواقع زي أبوورك أو مستقل، وابدأ تطبّق وتدرب بحيث تطلّع حاجة شبيهة، ومع الوقت والممارسة هتلاقي نفسك بتتطور وهتوصل للمستوى المطلوب.
