أسلوب حياة الفريلانسر بيقدم بعض المزايا الرائعة اللي بتسهل حياة كل مستقل، وأهم ميزة من مزايا العمل الحر هي حرية التحكم في مكان شغلك سواء كان في البيت أو أي مكان مناسب ليك، والميزة دي تعتبر فرصة متتعوضش لتوفير مجهود كنت بتبذله يوميا في نزول الشركة.
ورغم كده أكبر المزايا قد تتحول لأكبر العيوب لو تم التعامل معاها بشكل غير مناسب، ولو إجابتك على الأسئلة دي “اه” يبقى انت في مرحلة تحويل ميزة وجودك في البيت يوميا لعيب كبير:
- بتكسل تروح الجيم بحجة إن الوقت ده الشغل أولى بيه؟
- بتقضي وقت طويل بتشتغل وبتقوم بس عشان تعمل قهوتك وترجع تكمل؟
- بتتحرك قليل جدا وجسمك مش بيبذل أي مجهود؟
- اضطريت تفوت وجبات عشان محتاج تشتغل ومفيش وقت؟
عشان تحول إجاباتك من “اه” لـ “لا” فانت محتاج تخرج من الفخ اللي وقعت فيه عشان توصل لزروتك المهنية كفريلانسر من غير ما تأثر على حياتك الصحية، وده هيحصل عن طريق المحافظة على صحتك الجسدية والاهتمام بلياقتك البدنية كمستقل.
نصيحة 1: دمج الرياضة في روتينك اليومي كفريلانسر
الاحصائيات بتقول إن 80% من الفريلانسرز بيعانوا من مشاكل صحية بسبب اسلوب حياتهم، وده بيظهر بشكل واضح على أجزاء معينة زي الضهر والعين.
وعشان تبقى من الـ 20% التانين وتتغلب على ده فانت محتاج تدمج الرياضة في حياتك بشكل يومي، حتى لو بحركات بسيطة جدا زي المشي أو اليوجا وتتعلم ازاي تربط لياقتك البدنية مع شغلك عن بعد، وهقولك تعمل ده ازاي.
إضافة التمارين لجدول مهامك
زي ما بتحدد جدول يومى لشغلك وبتصحى عارف وراك ايه وبتلتزم بيه كل يوم عشان انت مدرك أهميته، جرب تحط جدول وخطة للتمارين أو الرياضة اللي تقدر تمارسها في يومك.
لو عملت كده وبقيت تصحى كل يوم عارف إن يومك فيه وقت للرياضة وسط التاسكات هتبدأ تلتزم، لإنك مسبتش الفرصة لظروف يومك هى اللي تحدد انت فاضى تحرك جسمك بشوية تمارن ولا لا.
اختيار التمارين المناسبة
من وجهة نظرك إيه التمارين المناسبة ليك كفريلانسر؟
لما تظبط جدول تمارينك متكتفيش بس بإنك تكتب “تمرين لمدة 20 دقيقة” وعلى حسب مزاجك وقتها تقرر التمارين دي هتكون إيه، لا جرب تحدد في جدولك انت هتتمرن إيه بالظبط في الـ 20 دقيقة دول.
نسبة لستايل حياتك كفريلانسر ولمستوى لياقتك البدنية هتقدر تحدد بنفسك انت محتاج تمارس تمارين لمساعدتك في ايه بالظبط، وده هيساعدك تختار التمارين المناسبة ليك والأكثر إفادة لجسمك.
وحسب التزاماتك ووقتك هتختار نوع التمرين المناسب معاك ممكن يبقى ليك يوم في الإسبوع يوجا ويومين تنزل تتمشى وتلات ايام تمارين أونلاين في البيت ويوم تمرين في الجيم وهكذا.
اتحرك كتير خلال يومك
بخلاف وقت تمرينك حاول تتحرك دايما خلال يومك وتعمل حركات بسيطة تساعد جسمك يفك من القعدة الطويلة اللي بتفضل قاعدها طول اليوم، عن طريق إنك:
- تتمشى في الشقة كل شوية
- تقضي البريك بتاعك بتنط الحبل أو بتلعب سكواد
- تعمل 10 ضغط كل ساعة
نصيحة 2: الأكل الصحى مهم لصحة الفريلانسر الجسدية
الرياضة لوحدها مش كفاية عشان تخليك لائق بدنيا ومتتعرضش لأي مشاكل صحية، لازم كمان تهتم بنوع الاكل اللي بتاكله وكميته وتوفر لجسمك احتياجاته عشان يقدر يساعدك بالشكل اللي انت عايزه.
والاكل المفيد هيفرق معاك جدا في مستوى أدائك في الشغل قبل ما تلاحظ فرقه على شكل جسمك، لإنه بيمثل الطاقة اللي جسمك محتاجها عشان تعرف تبقى نشيط وفايق طول اليوم ومتتعرضش لأي أعراض دوخة أو صداع.
وانت محتاج تهتم بأكلك خصوصا بعد ما أثبتت الدراسات إن 70% من الفريلانسرز بيواجهوا مشاكل صحية بسبب عدم اختيارهم نظام غذائي مفيد، وعشان تتجنب ده وتهتم بأكلك هتعمل الآتى:
تحضير وجبات مغذية في البيت
عمرك اندمجت اوى فى الشغل ولقيت فجأة الوقت اتأخر ومعندكش فكرة هتتغدى ايه؟
في الأوقات دي بتلاقي نفسك تلقائيا بتطلب دليفري لإن مفيش وقت تحضر حاجة، وطبعا الأكل ده بيكون غير صحى بس انت مضطر وبتستسهل.
الحل الوحيد للمشكلة دي هو إنك تحضر وجباتك الصحية في البيت من قبلها بفترات كبيرة عشان تتخطى المواقف الصعبة دي ومتلجأش للأكل الغير صحي، زي إنك تبقى متوقع انت ممكن تاكل ايه خلال الكام يوم الجايين وتجهز الحاجات اللي ممكن تتحضر من يوم الأجازة عشان تسهل عليك ومتلجأش إنك تطلب أكل من برا.
بس تفتكر إيه الأفكار التانية اللي ممكن تساعدك تحسن نظامك الغذائي؟
اشرب مياه عشان تنتعش!
أغلبنا بينسى يشرب مياه خلال يومه لإنه مش بيفتكر ولما تراجع نفسك آخر اليوم بتلاقي إنك شربت كمية قليلة جدا مقارنة بالكمية اللي جسمك محتاجها.
فانت محتاج تشرب مياه وسوائل كتير عشان تدى جسمك احتياجاته وتقلل أعراض الصداع والخمول اللي بتحسها أغلب الوقت واللي بيكون سببها احتياج جسمك للسوائل.
والحل إن يبقى فيه مصدر مياه جنبك وانت شغال دايما كل ما تشوفه تفتكر انك محتاج تشرب، أو تنزل أبلكيشن يساعدك تظبط كميات المياه اللي محتاج تشربها يوميا ويفكرك كل فترة إنك محتاج تشرب.
نصيحة 3: مساحة العمل المريحة ضرورية للفريلانسرز
أي شركة بتهتم بمساحة العمل اللي الموظفين بيتشغلوا فيها، عشان هما مدركين أهمية راحة الموظفين الجسدية في مكان الشغل اللي بيقضوا فيه أوقات طويلة جدا.
فتلاقي الشركة بتوفر كراسي مريحة، وإضاءات مناسبة للعين، ومكاتب على أرتفاع معقول، وكل ده مش رفاهية ده أساسي ومهم لجميع الموظفين.
طب لو انت مدير شركتك وموظفها الوحيد مش المفروض تهتم بمساحة عملك؟
استثمر فلوسك في أثاث مريح
كلنا بنحب قعدة السرير جدا، بالذات في الشتا واحنا تحت البطانية وبنشرب قهوتنا واللاب قصادنا وبنشتغل.
بس لو ديه قعدتك كل يوم فانت بتعرض جسمك لخطر شديد واكيد وانت بتقرأ المقال ده حاسس إن ضهرك ورقبتك في ذمة الله.
عشان كده انت محتاج لأثاث مريح عشان تقدر تبني المكتب الخاص بيك وتقضي أكبر وقت ممكن بتشتغل بدون تعب.
وده مش معناه إنك محتاج تشتري أثاث جديد بالكامل، لكن تقدر تستخدم الأثاث اللي عندك بشكل مناسب وتستخدمه صح عشان توصل لنفس النتيجة، وديه بعض النصائح اللي تقدر تعرف بيها الاستخدام الصحيح:
- الكرسي: حاول تظبط ارتفاع الكرسي بحيث كعبك يقدر يرتاح على الأرض، أو استخدم مسند لرفع رجلك
- المكتب: اهتم بوجود مساحة كافية لرجلك وقدمك تحت المكتب عشان ترتاح، ولو المكتب قصير حاول ترفعه بكتل قوية عشان يوصل لطولك المناسب
- الماوس: اهتم بظبطه بحيث تكون إيدك على مستوى كوعك أو أقل شوية
- الشاشة: مكان الشاشة المناسب هو على بعد ذراع تقريبا من وشك عشان تتجنب وجع العين
- اللاب توب: تقدر تستخدم ماوس وكيبورد خارجين لو بتستخدم اللاب توب عشان تقدر ترفع شاشته للمستوى المناسب لعينك من غير ما ترتبط بالكيبورد الخاص بيه
ومهما كان أثاثك مريح ومناسب ومش بيتعبك، افتكر إنك محتاج تتحرك كتير كل فترة عشان القعدة لفترات طويلة هتسببلك أضرار انت في غنى عنها.
خد بالك من عينك
أحد عيوب اختيارك لمجال العمل الحر هو إن شغلك من بدايته لنهايته بيعتمد على القعدة الطويلة قدام الكمبيوتر لإنجاز كل مهامك.
وده بيسبب بعض المشاكل لعينك ولو محافظتش عليها دلوقتى هتعاني من مشاكل كبيرة على المدى البعيد، والوقاية دايما خير من العلاج فاهتم بالنصائح دى عشان تحافظ على عينك :
- أفضل وضع لشاشة الكمبيوتر هو على بعد ذراع زي ما وضحتلك في الفقرة السابقة
- حاول تظبط الكمبيوتر الخاص بيك على إضاءة متوسطة
- اهتم بإضاءة الغرفة اللي بتشتغل فيها
- خد بريك كل 20 دقيقة وبص على أي حاجة بعيدة عنك نسبيا عشان تريح عينك
نصيحة 4: ضرورة اهتمام المستقل بصحته النفسية
الفريلانسرز بيمروا بفترات انعزال تام عن الناس في بعض الأوقات بسبب طبيعة شغلهم، وده سبب كافي إنه يؤثر على صحة الفريلانسر النفسية وبدوره يؤثر على صحته الجسدية.
لذلك ضروري جدا إن الفريلانسر يهتم بصحته النفسية زي ما بيهتم بصحته البدنية لتجنب أي نوبات حزن أو اكتئاب.
إدى لنفسك مساحة للتعامل مع الناس
أوقات كتير بعد ما الشغل ياخد منك اليوم كله تقرر إنك تقضي أوقات راحتك لوحدك تتفرج على حاجة بتحبها أو تنام.
حاول تتغلب على أفكار الانعزال دي وتتعامل مع ناس كتير حتى وانت شغال، وتقدر تغش من الأفكار دي:
- خصص بريك من البريكات الكتير اللي بتاخدها وسط الشغل إنك تقضيه مع عيلتك في البيت وتطمن عليهم وتعرف آخر أخبارهم
- صمم يوم أسبوعي تنزل فيه مع اصحابك مهما كانوا بعاد أو مشغولين
- اتعرف على ناس في نفس مجالك وخلي بينكم باب مفتوح دايما تقدروا تتواصلوا منه سوا في أي وقت عن أي شيء متعلق بالشغل
واظب على هوايتك
أول طريق ظهور مشاكل نفسية في حياتك كفريلانسر هو إنك تهب حياتك كلها للشغل وتقطع كل عاداتك وهوايتك بحجة إن مفيش وقت وإن الشغل أهم حاليا.
عشان تعيش حياة مستقرة كفريلانسر وتتجنب عيوب المجال لازم تحطه تحت باند “الشغل”، يعني تخليه جزء من حياتك وتقتنع إنك بتمارسه بحب عشان تقدر تكسب قوت يومك آخر الشهر لكن هو مش كل حياتك.
ولو أدركت ده واستمريت في المواظبة على هواياتك وتخصيص أوقات في يومك للحاجات اللي بتحبها برا الشغل، فانت عرفت سر الاهتمام بصحتك النفسية كفريلانسر.
نومك أولوية
كفريلانسر، شغل أكتر يعني اكتساب مهارات وفلوس أكتر، لكن ده معناه إنك تيجي على مواعيد نومك وترهق نفسك عشان توصل للنتيجة اللي نفسك فيها؟
لو فاكر إن الإجابة “اه” يبقى انت لسه مفهمتش ازاي توصل لأفضل نتيجة في شغلك كفريلانسر.
لإن ببساطة نومك قادر يأثر على صحتك الجسدية عن طريق تشتت تركيزك وتقليل أدائك وقادر يسببلك دوخة وصداع وإرهاق.
وقادر كمان ياثر على صحتك النفسية ويخليك مش مستريح في مجال العمل الحر وحاسس انك مش مناسب للمجال ده وإنه مش بتاعك.
عشان كده نومك مهم، وانت محتاج تظبط وقته وعدد ساعاته وجودته عشان تدى جسمك احتياجاته وتوصل لأفضل نتيجة في شغلك.
الخلاصة
انت مدخلتش مجال العمل الحر لفترة صغيرة كشغل جانبي وشوية وهتسيبه، أي فريلانسر بياخد الخطوة دي بيبقى عارف إنها خطوة طويلة المدى، وبما إنك في بدايتها فلازم تهتم بكل العوامل اللي حوالين شغلك، ولازم تعرف ازاي هتأقلم حياتك على النظام ده.
وأهم شيء تاخد بالك منه هو صحتك النفسية والجسدية كفريلانسر، لإنها حاجات مينفعش تتجنبها ونتخليها تاني أولوية بعد الشغل، ولو مهتمتش بيها دلوقتي هتندم بعد فترة.
والفريلانسر الشاطر هيعرف إن صحته أهم من أي شغل.
