عشان تشتغل في أي مشروع مع أي عميل بداية الرحلة بتكون كتابتك لعرض عمل محترم توضح فيه شغلك ومهاراتك وطريقتك لحل مشكلة العميل، بعد كده بتبعته للعميل وبتكون واحد وسط عدد كبير جداً من الفريلانسرز اللي بيقدموا على نفس الوظيفة منهم الأقوى منك ومنهم الأضعف.

بعد ما بتقدم على المشروع بتلاقي نفسك بتستنى فترة طويلة ومحدش بيكلمك، ويبدأ الموضوع ده يتكرر مع كذا مشروع وتبدأ تسأل هل المشكلة من عندك ولا العميل بيدور على حاجة مختلفة عن اللي بتقدمها وتفضل محتار وقلقان، بس السؤال اللي عمرك ما سألته لنفسك تفتكر العميل أصلاً بيختار ازاي؟ هل حطيت نفسك مكان العميل وشوفت هو بيفلتر الناس ديه كلها ازاي وعلى أساس إيه عشان يقدر يختار الشخص المناسب؟

فى المقال ده هنقول العميل بيفلتر الناس ازاي, وهنحاول نخليك تبقي واحد من ضمن الناس اللي يشدوا أنتباه العميل ليهم جدا وتجبره أنه يقرأ الــ Proposal بتاعك للنهاية. ويبقي الحكم بعدها علي مهارتك وطريقة تواصلك معاه.

العملاء بينهم اختلافات كتير جداً في تحديد الفريلانسر اللي هيخلصلهم الشغل بالطريقة اللي تناسبهم وده منطقي لإن في عملاء بيدوروا على أشخاص تخلصلهم الشغل بسرعة، أو عملاء بيطلبوا تفرُغ طول فترة المشروع، أو عملاء بيدوروا على الاستمرارية مع الفريلانسر وهكذا، وعشان العميل يختار الشخص المناسب ليه وللمشروع حسب الصفات اللي محددها ديه لازم الفريلانسر نفسه يكون متوافق معاه في نفس الصفات وديه صفات غير إجبارية لإنها بترجع لوقت الفريلانسر وشخصيته وخبرته في المجال وما إلي ذلك.

على الرغم من إن العملاء أحياناً اختيارهم للفريلانسر بيشمل وجود صفات غير إجبارية وبيختاروا على أساسها الشخص اللي يناسبهم، فالعملاء كلهم بدون مبالغة بيتشاركوا سوا في نقط كتير إجبارية وبيشوفوا إنها لازم تكون متوفرة في الفريلانسر ولو مش موجودة فيه بيمسحوا الطلب بتاعه بدون أي تفكير، وده منطقياً صح! 

لإن العميل بيدفع فلوس فبيكون مُنتظر خدمة ممتازة تتقدم حسب الفلوس اللي هو دافعها، أول ما يلاحظ إنك مش تاعب نفسك تظهر بشكل إحترافي كفاية مش هيتعب نفسه هو كمان ويحط إحتمالات لشغلك هل هيبقى كويس ولا لا.

أول ما العميل ينزّل الوظيفة ويعرض فيها كل التفاصيل اللي عنده ويقول مشكلته ويشرح هو طالب إيه من الشخص اللي هيشتغل معاه ويعرض سعر الخدمة، بتبدأ الخدمة تتنشر على الموقع وبتكون متاحة لكل الفريلانسرز ويقدروا يقدموا عليها، وبيبقى ظاهر للعميل هو جاله كام طلب للوظيفة ديه وبيجيله عروض كل الفريلانسرز المقدمين على الوظيفة ديه وجمب كل شخص 3 علامات: 

• علامة لرفض طلب الفريلانسر
• علامة لوضع الفريلانسر على قائمة الإنتظار
• علامة لتوظيف الفريلانسر
•  

بعض المواقع زي Upwork عند النقطة ديه بتظهِر شارة زرقا جمب فريلانسرز محددين ومكتوب عليها “Best match” وديه ميزة الموقع بيقدمها عشان يقول للعميل إن الشخص ده مناسب للوظيفة ديه، وده من باب تسهيل الإختيار على العميل وطبعاً حق العميل يرفضه أو يقبله، والموقع بيعرف الشخص ده عن طريق إنه بيشوف الفريلانسر ده مجاله متناسب مع المجال اللي العميل طالبه ولا لا، قدم خدمات مُشابهة للمشروع ده لعملاء تانيين ولا لا، وهل أدائه في المشاريع المشابهة ممتاز ولا لا وهكذا.

ولو عاوز تعرف أكتر عن ايه اللي بيظهر بالظبط للعميل لما بينزل وظيفة وتبدأ أنت وغيرك تقدموا عليها, فأحنا عملنا تجربة كاملة نزلنا فيها وظيفة وقدم عليها أكتر من 100 فري لانسر مختلف. وأخدنا جولة بنشوف بنقيم فى الناس ازاي وبناءا علي ايه. وتقدر تقرأ المقال كامل من هنا.

طب إيه الحاجات اللي لازم أخد بالي منها وأنا بقدم طلب للعميل؟

الحقيقة هي حاجة واحدة بس، وهي البروبوزال.

وايوه بس كده، دا اللي لازم تاخد بالك منه لإنه أول انطباع العميل بياخده عنك واللي بيحدد على أساسه يديك فرصة ولا لا.

كتابة البروبوزال (عرض العمل) هو أهم خطوة في رحلتك فى عالم الفريلانس لأنه اللي بيوصلك بالعميل وبيخليه يشوفك, وبناءا عليه بنشوف هنكمل فى مرحلة إقناعه؟ ولا أصلا مش هيختارنا اننا نكمل معاه.
في Freelancers كتير جدا بيضيعوا تعب شغلهم فى أستخسار أنهم يكتبوا عرض عمل قوي, وبيستعملوا حاجات Copy/Paste محفوظة والعملا بيلقطوا انها متكررة ومش بتعبر عنهم. ومتنساش يا صديقي أن التقديم علي الوظائف بفلوس (بــ Connects = عملة Upwork اللي بتشتريها بفلوس حقيقية). فمتضيعش فلوسك علي الفاضي.

كم سعر الــ 1 Connect علي موقع Upwork؟

سعر الــ 1 connect علي Upwork بــ 15 سنت أمريكي, يعني ال 10 منهم بدولار ونص. وموقع Upwork بيديك
10 كونيكت شهريا ببلاش. وبعد كده انت بتشتري الــ Connects دي بفلوس حقيقية عن طريق فيزا. أو لو عندك فلوس علي موقع أبوورك, فتقدر تشتري بيهم علطول.

1- بداية البروبوزال 

العميل أما بيراجع طلبات الفريلانسرز بيظهرله الطلبات كلها ورا بعض مش طلب كل شخص لوحده، فكل اللي العميل بيقدر يشوفه من البروبوزال بتاعك هما أول سطرين (بالتحديد أول 250 حرف) عشان كده لازم تهتم بيهم أوي وتخليهم مميزين ويشدوا العميل عشان تجذبه يفتح البروبوزال بتاعك ويقرأه كله ويكون ليك فرصة قبول أكبر.

بلاش تضيع أول سطرين فى كتابة حاجات زي: “أهلا أني أسمي كذا وبشتغل كذا, وعندي خبرة كذا” لأن دي معلومات بالنسباله متكررة هو بيشوفها أصلا من خلال عرض العمل بتاعك اللي بيظهر بأسمك ومجال خبرتك. ده غير أن العميل مش فاضي أنه يقرأ كل الناس ويفضل يبص علي واحد واحد فيهم, فلو أنت ضيعت أول سطرين فى تعريفك عن نفسك, فأنت كده بتفقد فرصة أن العميل يقرأ الــ Proposal بتاعك بالفعل.

2- الترحيب 

ابعد على أد ما تقدر عن الترحيبات المبالغ فيها زي “Dear sir” لإن العميل بيحس انها فورمال بزيادة وبيشوف إن الموضوع أبسط من كده بكتير، بس في نفس الوقت ابعد عن الترحيب الودود أوي زي “Hey Yo” لإن مهما كنت لذيذ وبتعامل العملاء بحب وأخوية فلازم يكون في احترام للعميل وتعامله بشكل ذوقي، عشان كده يكفي إنك تحييه ب “Hi” أو “Hello”.

أشطر حاجة ممكن تعملها عشان تطبق النقطتين اللي فاتوا دول مع بعض بحيث ترحب بالعميل وتشد انتباهه، هي إنك ترحب بالعميل باسمه! 

العميل أما يشوف اسمه هيتشد ليك على طول وهيحس انك كاتب الكلام ده مخصوص ليه وهيحس انك مقدره كشخص مش بتتعامل معاه على إنه مصدر رزق وخلاص، وعشان تجيب اسم العميل تقدر تدخل على الفيدباك الموجود على أكونت العميل وتشوف الفريلانسرز اللي اشتغلوا معاه ومقدمينله فيدباك سابق كاتبين اسمه إيه في الفيدباك. 

3- متكتبش بروبوزال ثابت

أكتر حاجة تخلي العميل يرفض فريلانسر وهو مغمض عينه هي إنه يشوفه باعت بروبوزال كليشيه وثابت بيبعته لأي مشروع عايز يشتغل عليه وخلاص، والعميل اللي بتتعامل معاه بيكون عنده خبرة في الموضوع ده وقادر يحدد انت كاتب ده ليه هو ولا هما كلمتين حافظهم عن نفسك وشغلك وبتبعتهم في أي حته، أولى خطوات التعامل مع أي عميل هو إنك تحسسه انك مقدره عشان كده لازم تتعب نفسك وتكتبله حاجه مخصوص ليه هو.

4- قدم شغل سابق ليك 

العميل مهما كتبتله عن شطارتك وسنين خبرتك وحماسك في إنك تشتغل في المشروع ده معاه مش هيثق فيك غير لما يشوف أمثلة لشغلك في المجال اللي هو بيدور عليه وياريت لو في نفس التخصص اللي بيدور عليه زي لو هو طالب كاتب لقصص رعب قدمله شغلك السابق اللي بيضمن كتاباتك لقصص الرعب بالتحديد.

5- إقرأ عرض الوظيفة بدقة

ديه أهم نقطة في كل النقط لإن على أساسها هتقدر تبني البروبوزال بتاعك وتعرض للعميل الحاجة اللي هو طالبها، وبعض العملاء عشان يقيسوا مدى تركيزك مع الوظيفة ودراستك ليها صح بيحط سؤال خبيث في نص الوصف زي “ابدأ البروبوزال بتاعك بتعريف كلمة…. ” والبروبوزال اللي بيخالف ده العميل بيرفضه على طول. 

6- اعرض البروبوزال بشكل منظم 

البروبوزال بتاعك لازم يشد العميل ويبقى فيه كل التفاصيل اللي اتكلمنا عليها في ازاي تكتب بروبوزال وهي:

• الترحيب 
• توضيحك للعميل إنك فاهم المشكلة
• توضيحك للعميل إن عندك حل المشكلة
• خطتك لحل المشكلة مع العميل 
• تعريف عن نفسك وأمثلة لشغلك 
• سؤال بسيط يخلي العميل يرجع يكلمك 

7- اهتم بالبروفايل بتاعك 

العميل لو شايفك مميز ولفتّ انتباهه أول حاجة هيعملها هي إنه يدخل البروفايل بتاعك ويشوف الفيدباك والبورتفوليو والفيديو التعريفي وكل حاجة موجودة على البروفايل، وكل ما كان البروفايل منظم ومكتمل كل ما كانت فرصتك أكبر.

العميل أما بيعرض وظيفة ويبدأ عملية اختيار الفريلانسر المناسب، مش بيشوف الحاجات اللي بتعملها خلف الكواليس، مش بيشوف سهرك على الكورسات عشان تتطور ولا بيشوف وقت راحتك اللي بتقضيه في تحسين شكل البروفايل بتاعك، ولا بيشوفك بتجتهد عشان تقدر تبني بورتفوليو قوي، ولا بيشوفك وانت بتفهم أكتر عن مجال الفريلانسج وقاعد تقرأ المقال ده دلوقتي. 

بس عارف بيشوف ايه؟ نتيجة اجتهادك ده، بيشوف بورتفوليو قوي، بروبوزال منظم، بروفايل كامل، فيدباك يطمنه، نتايج مشروع مُبهرة. 

عشان كده لازم تسعى، لإن نتيجة السعي ده هي اللي هتخليك مميز وتتقدم خطوات في الطريق اللي بتتمناه.

ولو عاوز تعرف أكتر عن موقع Upwork وتقدر تحترفه وتجيب أول وظيفة ليك عليه. فهنصحك أنك تشوف فيديو لينا نزلناه علي اليوتيوب فيه خبرة 8 سنين كاملة من مجال العمل الحر, وشرحنا فيه موقع Upwork بالتفصيل فى 40 دقيقة كاملة.