مع زيادة عدد الفريلانسرز وظهور صعوبة كبيرة في إن العميل يلاقي الفريلانسر المناسب ليه في أرض الواقع وصعوبة إن الفريلانسر يلاقي مشروع يشتغل عليه، بدأت فكرة تأسيس مواقع العمل الحر, عشان توفّر البيئة المناسبة لتواصل الاتنين سوا مع بعض.
يعني أيه موقع عمل حر؟
هي مواقع بتعمَل كوسيط بين العميل وبين الفريلانسر، عن طريق السماح للعميل بنشر المشروع اللي هو طالب ينفذه بكل المواصفات اللي هو عايزها والموقع بينشر المشروع ده عنده، وبعد نشر المشروع تبدأ رحلة الـ Freelancers في تقديم طلب للعميل عشان يشتغل معاه على المشروع ده ويبدأ يعرض عليه خدماته ومهاراته.
لما العميل بيوافق على عرض فريلانسر معين ويقرر إن هو ده الشخص المناسب للمشروع بتاعه ويتفق مع الفريلانسر على سعر المشروع ده ويقرروا إنهم خلاص هيشتغلوا عليه مع بعض، بيدفع العميل للموقع سعر المشروع اللي اتفقوا عليه والموقع بيحفظ الفلوس عنده لحد ما الفريلانسر يقدم الخدمة اللي اتفقوا عليها والعميل يستلمها, بعدها الموقع بيبعت للفريلانسر المبلغ اللي كان حافظه ليه.
الموقع بيكون بيئة آمنة جداً للتعامل في الماديات يعني مهما حصل مش هتلاقي عميل بينصب عليك في مشروع مثلاً (مادام أنت ماشي بشروط الموقع) وبعد ما تخلصه وتسلمه متاخدش فلوسه، بالعكس الموقع بيحفظلك حقوقك وبيحفظ للعميل حقوقه برضو في إنه يستلم المشروع اللي دفع تمنه، بس قصاد الخدمة اللي الموقع بيقدمهالك ديه وإنه بيسهل عليك تلاقي عميل مناسب وتشتغل على مشروع معاه فالموقع بياخد نسبة مادية منك ومن العميل كعموله ليه.
أنواع مواقع العمل الحر:
مواقع العمل الحر بتتقسم نوعين:
1- أول نوع هو Remote job marketplaces
ديه مواقع مصممة للتعامل مع الشركات والعملاء المستمرين لفترات طويلة، عشان كده المواقع دي بتحتاج يبقي عندك بورتفوليو قوي عشان تشتغل فيه كفريلانسر وبيكون مُتوقع من العملاء يعملوا معاك إنترڤيو عشان يقرروا يقبلوك أو لا.
ومن مزايا المواقع دي أنها:
- ليها فرص أكبر للعمل علي المدي البعيد
- عملاء ذو مستوي أفضل
- فرص ربح أكبر
ومن العيوب:
- المنافسة أصعب.
- تنوع أقل للوظائف
- معظمهم بيحتاج مصاريف إدارية للموقع, أو عند التقديم علي وظائف
أمثلة علي المواقع دي:
- موقع Upwork
- موقع Freelancer
- موقع مستقل
2- تاني نوع هو Gig marketplaces
وبتبقي مواقع مُصممة عشان تقدم طلب أو خدمة واحدة وسريعة، بمعنى إنك كفريلانسر بتعرض خدمة ليك على الموقع والعميل بيدخل يشوفها ولو شايف إن مستواك مناسب وموافق على شكل الخدمة بيدخل يتواصل معاك ويقولك إنه عايز خدمة شبيهة للخدمة المعروضة.
مِيزة المواقع ديه إنها بتجيبلك شغل بسرعة كفريلانسر، بس عيبها إن الشغل فيها مش مستمر لإن نادراً لو لقيت عميل بيطلب منك أكتر من خدمة بالعكس هو بيطلب خدمة واحدة وبياخدها منك وخلاص على كده.
مزايا المواقع دي:
- سهولة البدء عليها وإيجاد أول وظيفة
- تنوع فى الوظائف
عيوب المواقع دي:
- ربح أقل
- فرص أقل علي المدي البعدي
أمثلة علي المواقع:
الفرق بين أنواع مواقع العمل الحر المختلفة:
1- تسجيل الدخول
معظم المواقع اللي تقدر تشتغل عليها كفريلانسر الدخول عليها مجاني وتقدر بكل بساطة تعمل أكونت وتبدأ تشتغل في أي وقت مع إختلاف طريقة المواقع في قبول الأكونت بتاعك.
2- اشتراكات مقابل مزايا
بعض المواقع بتسمحلك تدفعلها نسبة محدد من الفلوس كاشتراك شهري مقابل إنها تقدملك بعض المزايا الخاصة بيك كفريلانسر عن الفريلانسرز التانيين زي إنك تظهر كأول بروبوزال للعميل أو إن يكون مسموحلك تقدم على وظائف مختلفة. أو أنك تشتري مثلا عملة معينة للموقع عشان تدفع بيها لما تقدم علي وظيفة.
وده زي ما بيحصل علي موقع Upwork لما بتيجي تقدم علي وظيفة بــ Connects
كم سعر الــ 1 Connect علي موقع Upwork؟
سعر الــ 1 connect علي Upwork بــ 15 سنت أمريكي, يعني ال 10 منهم بدولار ونص. وموقع Upwork بيديك
10 كونيكت شهريا ببلاش. وبعد كده انت بتشتري الــ Connects دي بفلوس حقيقية عن طريق فيزا. أو لو عندك فلوس علي موقع أبوورك, فتقدر تشتري بيهم علطول.
3- عمولة الموقع
المواقع اللي بتشتغل عليها ديه كلها مش بتشتغل لله وللوطن، لا بتاخد منك نسبة محددة -بتختلف من كل موقع للتاني- على كل مشروع بتشتغل عليه، والنسبة ديه يا بتكون ثابتة دايما لكل المشاريع زي ما موقع Fiverr دايما بياخد 20% على كل مشروع، يا بتكون مختلفة حسب عوامل الموقع بيحددها
ازاي عملية الشغل بتمشي على المواقع؟
الحقيقة إن مواقع العمل الحر بتتعامل بطريقتين لتوصيل العميل بالفريلانسر:
1- إن العميل يعرض خدمته على الموقع بكل تفاصيلها والفريلانسرز يبدأوا يقدموا على الوظيفة ديه عن طريق كتابة بروبوزال بيعرضوا فيه شغلهم ومهاراتهم وخطتهم لحل مشكلة العميل.
2- إن الفريلانسر يعرض خدمته على الموقع مع مثال للخدمة اللي بيقدمها بكامل تفاصيلها ويبدأ العميل ياخد لفة على كل الخدمات اللي موجودة على الموقع وكل المشاريع ويختار فريلانسر محدد ويقوله إنه عايز خدمة شبيهة للخدمة اللي الفريلانسر عارضها.
امتي الموقع بيحوّلك فلوسك وازاي تسحبها؟
معظم المواقع بتسيب مدة 14 يوم بعد انتهاء المشروع عشان تقدر تحولك فلوسك وممكن تزيد أو تقل حسب الموقع اللي بتشتغل عليه وحسب المميزات اللي الموقع بيقدمهالك زي على Upwork لو انت Top rated مثلاً فالوقت دا بيقل وهكذا ، وال 14 يوم دول موجودين عشان لو حصل أي مشاكل بعد التسليم أو في خلاف بينك وبين العميل أو العميل اكتشف إنك سلمته حاجة غلط فيقدر العميل خلال ال 14 يوم دول يعمل ريبورت للموقع ويسترد فلوسه مرة تاني -وده نادراً أما بيحصل-.
وبعد ما الـ 14 يوم يعدوا على خير والفلوس تبقى جاهزة بتتحولك على محفظتك اللي موجودة على الموقع وتقدر تسحبها في أي وقت، والسحب ممكن يكون من خلال حساب بنك مباشر أو حساب PayPal أو من خلال بايونير.
وفي مواقع تاني لما بتبدأ تعليها عليها, المدة دي بتقل, وممكن توصل لــ 5 أيام بس.
عيوب مواقع العمل الحر المختلفة للمبتدئين:
حسب خبرتك في مجالك وفي تعاملك مع الناس ومستواك في اللغة الإنجليزية تقدر تحدد انت بنفسك إيه اكتر موقع مناسب ليك كبداية، بس خليني أقولك مميزات وعيوب كل موقع مع المبتدئين وتقدر انت تحدد بنفسك وتقرأ أكتر عن الموقع اللي انت مهتم بيه.
عيوب موقع Upwork للمبتدئين:
عيب Upwork في البداية هو العملية المُرهقة اللي بتمر بيها عشان تقدر تعمل أكونت ويتقبل على الموقع وديه مرحلة متقدمة شوية على المبتدئين، خصوصاً إن Upwork مش بيقبل فريلانسرز في مجال هو مكتفي فيه بعدد الفريلانسرز اللي عنده.
ده غير أن التقديم علي وظائف فيه بفلوس, أو خلينا نقول بــ Connects. ودي عملة الموقع اللي بتشتريه بفلوس عشان تقدم علي الوظايف. والوظيفة الواحدة حاليا ممكن تاخد منك من 6 كونيكت, ولحد 22 كونيكت, وأحيانا أكتر كمان, فبتكون تكلفة كبيرة علي أي حد لسه بيبدأ.
موقع Upwork هو موقع أجنبي بيحتاج تعرف تتكلم وتتواصل مع العملاء باستخدام اللغة الإنجليزية، و احصائيات Upwork بتقول إن عليه حوالي 12 مليون فريلانسر و 7 مليون عميل ومتاح عليه 12 ألف وظيفة.
كم سعر الــ 1 Connect علي موقع Upwork؟
سعر الــ 1 connect علي Upwork بــ 15 سنت أمريكي, يعني ال 10 منهم بدولار ونص. وموقع Upwork بيديك
10 كونيكت شهريا ببلاش. وبعد كده انت بتشتري الــ Connects دي بفلوس حقيقية عن طريق فيزا. أو لو عندك فلوس علي موقع أبوورك, فتقدر تشتري بيهم علطول.
عيوب موقع Freelancer:
موقع Freelancer هو موقع أجنبي برضو واحصائياته بتقول إن متوفر فيه 30 مليون فريلانسر ومتاح فيه 45 ألف وظيفة ومقارنة ب Upwork ففرص الشغل فيه أقل بكتير.
ومعظم الوظايف بتبقي منافستها أعلي بكتير, بس يظل فى ناس كتير بتبدأ عليه وتنجح. ولكن يمكن أحنا هنا فى Freelanzwya مكنش لينا تجربة كاملة فى الموقع ده, فمش هنقدر نحكم عليه حكم كامل.
عيوب موقع خمسات:
عيبه أنه هيبقي حاكمك فى نطاق العملاء العرب فقط, وبسعر ضعيف مقارنة بباقي مواقع العمل الحر. ولكن يظل دي ممكن تكون ميزة لكثير من المبتدئين فى عالم الفريلانس.
فكونه موقع عربي مش بيحتاج أي مهارات في التواصل واللغة لإنه بيتعامل باللغة العربية، المميز في موقع خمسات إنه بيساعدك تتقبل بسرعة وبيسهل عليك عملية البدء وإنك تجيب أول عميل ليك.
وكمان لأنه مجاني, فده هيتيح ليك أنك تقدر تتعلم عليه مهارات الفريلانس الأساسية.
وفي موقع Freelanzwya, كان لينا تجربة كاملة علي الموقع ده مع د.أحمد السباعي. وعملنا سلسلة كاملة من البداية وإنشاء أكونت من الصفر, وحتي الوصول لأول عميل والحصول علي أول 5 دولار مكسب لنا.
وتقدر تشوف السلسلة كاملة بالضغط علي هنا: “شاهد السلسلة علي اليوتيوب مجانا“
عيوب موقع مستقل:
ده موقع عربي برضو بيقدم نفس المميزات اللي خمسات بيقدمها بس بعيوب أقل وأسعار أعلى, وإن كان مؤخرا أصبح هو الآخر بتدفع ليه فلوس عشان تقدر تشتغل عليه, ولكنها أقل من باقي المواقع عموما.
الخلاصة:
مواقع العمل الحر مفيش أكتر منها وكل ما تقرأ وتتوسع فيهم أكتر كل ما هتفهم عن المواقع ديه أكتر وتختار الموقع المناسب لشخصيتك واللي هتستريح فيه، بس في كل الأحوال جميع المواقع بتحتاج منك سعى وبذل مجهود عشان تقدر تخلي البروفايل بتاعك فيها مميز وتقدر تجيب شغل أكتر
ولو عاوز تستزيد أكتر وتشوف فيديو كامل بيشرح المقال ده بشكل أكبر ومفصّل. فالفيديو ده ليك:
