أكيد مريت في وقت من الأوقات بتسارع دقات قلبك وانت داخل تشوف الفيدباك اللي العميل كتبه على البروفايل بتاعك بعد ما خلصتوا مشروع كامل سوا بتعديلاته وتسليم فلوسه وكل حاجة، وكنت بتدعي من كل قلبك إنه ينسى أي نقاش حاد حصل بينكم أو أي تقصير ظهر منك غصب عنك.
العميل عشان يديك فيدباك بيعمل حاجتين، أول حاجة إنه يديك ريت من نجمة لخمس نجوم وإحنا دايما بنتمنى نشوف الخمسة أو الأربعة بالكتير أوي، تاني حاجة إن العميل بيكتب الفيدباك بتاعه سواء إيجابي وبيشكرك فيه وبيتكلم عن ازاى انت مُريح وشاطر، أو سلبي وبيكتب فيه ليه تجربته معاك مكنتش ألطف تجربة بالنسباله وإيه المشكلة اللي حصلت وكانت السبب في ده.
الفيدباك مهم جداً ليك كفريلانسر لكذا سبب:
- بيعكس صورتك وصورة البزنس بتاعك وديه حاجه لازم تركز معاها جداً لان انت كفريلانسر شغلك مش ثابت كل فترة بل بيعتمد على جودة تقديمك ليه، كل ما تحسن جودة خدمتك كل ما تاخد فيدباك أحسن فالريت بتاعك هيكون عالي فتقدر تجيب شغل أكتر
- الفيدباك مصدر جذب عميل ليك أو نفوره منك، لأن أول حاجة العميل بيعملها قبل ما يكلمك على شغل وبعد ما يبص على البورتفوليو بتاعك إنه بيشوف الفيدباك على بروفايلك واللي هيقوله هل انت منظم؟ هل مواعيدك مظبوطة؟ هل بتتواصل مع العملاء بأسلوب محترم؟ هل بتقدم الخدمة بالشكل اللي ظاهر في البورتفوليو بتاعك؟ وما إلي ذلك.
- الفيدباك والريتنج بتوعك هما السبب ورا ترتيبك وسط الفريلانسرز التانيين وترتيب ظهورك وسطهم لما العميل يبحث عن حد بيقدم شغل في المجال بتاعك، كل ما الريت بتاعك زاد كل ما هتزيد درجة على الموقع لحد ما تتصنف ضمن الـ top rated فريلانسرز على الموقع ودول ناس مميزة جداً العميل مبيفكرش مرتين قبل ما يتعامل معاهم، وده الهدف اللي عايزين نوصله.
طب ازاي اتعامل مع الفيدباك الإيجابي والسلبي؟ وازاي أرد على كل واحد فيهم؟ خليني
اقولك.
أولاً الفيدباك الإيجابي
1- ليه مهم أرد على العميل اللي اداني فيدباك إيجابي؟
- ده هيشجع صاحب الفيدباك يرجع يشتغل معاك تاني
الناس بطبعها بتحب الإطراء والكلام الحلو، زي ما انت اتبسط إن في عميل كتب عنك فيدباك كويس هو كمان هيتبسط جداً أما ترد عليه وتشكره على الفيدباك ده وتقوله إنك اتبسط في الشغل معاه، اللطافة اللي هتقدمها للعميل ده هتخليه يحبك كشخص ويحس بالانتماء ليك وإنه خلاص بقى زبونك وهيرجعلك دايما لانك بتريحه وبتقَدره.
- العميل صاحب الفيدباك هيرشحك لعملاء تانيين
قبل ما تشتري اي حاجه انت متردد فيها أول حاجة بتخطر على بالك تعملها انك تسأل شخص مجرب الحاجه ديه أو بيمتلكها لأن الإنسان بيثق في رأي الشخص اللي مجرب أكتر من رأي الشخص اللي بيسوّق للحاجه ديه، وده بالظبط اللي هيحصل معاك، لو عميل حابب يشتغل معاك ومقلق أو خايف يقدر يبعت بكل بساطة لصاحب الفيدباك ويسأله هل فعلاً الكلام اللي كتبه ده صحيح وإن شغلك مميز؟ وإن لو هو عايز يشتغل معاك في كذا يكلمك ويخوض التجربة؟ وقتها صاحب الفيدباك هيطمن العميل ده ويحكيله عن تجربته معاك بكل صراحة وهيكون السبب ورا إن شغل جديد يجيلك.
2- ازاي ارد على الفيدباك الإيجابي؟
- استخدم اسم العميل
عشان تجذب انتباه العميل وعاطفته ليك يُفضل تذكر اسمه في تعليقك، لإن العميل وقتها هيحس الموضوع شخصي ويبدأ يحبك كشخص أكتر ويحس إنه بينتمي ليك
- استخدم كلمات قوية
أما تكتب ردك على فيدباك العميل اتعلم تكتب حاجات دافية تحسس الشخص اللي بتكتبله انك كنت مبسوط فعلاً وتحاول تنشر الروح الإيجابية اللي العميل هيحس بيها اما يقرأ تعليقك واللي لو أي عميل تاني قرأ التعليق هيحسها، وده مثلاً ممكن يظهر بتبديلك “شكراً لحضرتك جداً كانت فرصة سعيدة” ل “شكراً على رأيك الجميل يا أستاذ أحمد، أنا كنت سعيد جداً في الشغل مع حضرتك كانت فرصة مميزة واتعلمت فيها كتير” الفرق واضح صح؟
- قدم عرض أو مقترح
ديه بتكون حركة لذيذة جداً منك عشان تاخد العميل ده تحت دراعك وتعرَفه إنك هتستنى منه مشروع تاني، زي انك تقوله إن ليك خصم للمشروع الجاي اللي هتشتغلوا عليه سوا، أو تقدمله خدمة مجانية مثلاً بجانب المشروع.
ثانياً الفيدباك السلبي
1- ازاي اتعامل مع الفيدباك السلبي؟
على أد ما تجربة إن عميل يديك فيدباك سلبي بتكون مش أحسن حاجة لأي فريلانسر، على أد ما هي أكبر فرصة ممكن تغتنمها عشان تحسن من نفسك، لإن للأسف نتيجة لشغلك لوحدك من غير مدير أو تيم معاك دا مش بيساعدك تعرف أخطائك كل فترة أو تعرف إن بقالك فترة كبيرة واقف عند نقطة ثابتة مش بتتطور، والفيدباك السلبي ده بيكون بمثابة الحاجة اللي بتفوقك من الفترة ديه عشان تعرف انك لازم تحسن من نفسك.
والفيدباك السلبي بيتقسم ل 3 أنواع:
- تعليق واقعي: وده اللي العميل بيتكلم بيه بإحترام وأدب عن المشكلة اللي واجهته معاك وإيه السبب ورا إنه اداك الفيدباك السلبي ده.
- تعليق غير واقعي: دا اللي العميل بيبالغ في الطريقة اللي بيقول فيها مشكلته وبيحكيها بشكل غير لائق.
- تعليق خاطئ وغير لائق: ودا التعليق اللي العميل بيقول فيه كلام وأحداث محصلتش وبيتهمك بحاجات انت معملتهاش بطريقة غير محترمة.
آخر نوعين تقدر تتواصل فيهم مع العميل عشان يمسحهم وتوَصله إن اللي هو كاتبه ده مش اللي حصل بالظبط وتوريله إثباتات لده، او انك تعمل ريبورت لإدارة الموقع وهي بتتبع المشكلة وبتمسحهم بنفسها، بس اللي يهمنا فعلاً هو أول نوع وده النوع اللي هيساعدك تطور من نفسك.
2- ازاي أرد على الفيدباك السلبي الواقعي؟
- سيب لنفسك وقت تهدى الأول
محدش بيحب يستقبل فيدباك سلبي لأي سبب، فلو قررت ترد على فيدباك العميل وانت مضايق ممكن تقول كلام مش مناسب نتيجة للمشاعر اللي انت حاسس بيها رغم إن العميل ممكن يبقي معاه حق وانت فعلاً غلطان، فدايما سيب لنفسك وقت تهدى وتحاسب نفسك وتشوف إيه المشكلة.
- حِل المشكلة اللي العميل اشتكى منها
قبل ما تبعت للعميل اعتذارك عن اللي حصل حل المشكلة الأول عشان لما تيجي ترد عليه تقدر تعرَفه إن المشكلة اتحلت وإنها مش هتتكرر تانى وانك مستعد تعوضه عن اللي حصل ده بخصم أو بأوفر حسب نوع الخدمة اللي بتقدمها، وده هيخليك تعلى في نظره وفي نظر أي عميل غريب بيقرأ الفيدباك بتاعك عشان يتواصل معاك.
الخلاصة
الفيدباك هو جزء كبير من شكل البزنس بتاعك وبسببه العملاء بياخدوا قرارات كتير أوي تخصك، سواء يتعاملوا معاك أو لا وده شيء كبير ومهم ليك كفريلانسر، عشان كده إهتمامك بيه وبتفاصيله لازم يكون كبير جداً.
