عشان تبدأ تشتغل فريلانسر ده بيحتاج منك تفكر الأول في المجال اللي هتشتغل بيه، يعني ممكن يبقي عندك مهارة معينة تقويها وتشتغل بيها وتفضل تطورها مع الوقت، أو يبقى ده مجال دراستك من الأساس اللي انت شاطر فيه وهتقدر تقدم فيه شغل كويس نتيجة لمجهودك طوال فترة الجامعة.
.
طب لو افترضنا ان مجالك الدراسي بيحتاج انك تتخرج الأول عشان تشتغل بيه، أو بعيد عن فكرة العمل الحر زي إنك بتدرس طب مثلا، هل في فرصة تتعلم حاجة من أول وجديد؟
.
إجابة السؤال ده هو اه، تقدر تتعلم مهارة من الصفر وتطور نفسك فيها بشكل مستمر لحد ما تقدر توصل للمستوى اللي يأهلك تشتغل بيها كفريلانسر.
.
وبما إننا في المقال اللي فات قولنا أهم خمس مجالات في سوق العمل الحر الفترة ديه وفي المستقبل، تقدر تختار منهم أو تختار أي مجال تاني انت حابه أو حاسس إنك هتتميز فيه وتتعلمه وتبدأ شغل.
.
طب تبدأ منين ؟
في أربع طرق مجانية يقدروا يعرفوك ويعلموك أي مجال تختاره من البداية للإحتراف هنتكلم عنهم بالتفصيل.
.
.
1- منحة وزارة الاتصالات FWD
.
وديه منحة ممتازة جدا بتوفرها وزارة الاتصالات لجميع المصريين من سن 18 سنة عشان يدخلوا عالم الـ freelancing وتحتوي علي كورسات لسبع مجالات وهما:
– Digital Marketing
– Data Analysis
– Web Development
– Embedded Systems
– Mobile Development
– Software Testing
– Cloud specialization
كل كورس منهم بيبقى متقسم 3 ليفلات مبتدئ ومتوسط ومحترف، وفي كورسات منهم بتحتوي علي ليفلات تكميلية من كورسات مختلفة زي ال UX design مع كورس ال digital marketing.
.
.
2- Coursera
.
هو ويب سايت خاص للكورسات الأونلاين في جميع المجالات العلمية والعملية والتطبيقية اللي ممكن تقابلها في حياتك وفيها أكتر من 5 آلاف كورس، أيا يكن المجال اللي هتختار تشتغل فيه فهتلاقي ليه كورسات مفيدة على كورسيرا بلا شك، حتى لو كنت متقدم فهو مليء بكورسات الاحتراف في أي مجال.
.
بس نظرا إن كورسيرا منصة هادفة للربح، في طرق تقدر تقدم بيها على الكورس اللي محتاجه من غير ما تدفع ولا جنيه عشان تستفاد بقيمته والمادة العلمية اللي بيقدموها وتقدر بالاستفادة ديه تطور من نفسك ومن مهاراتك
.
- أول طريقة هي إنك تقدم على financial aid وده بيبقى جزء موجود على الويب سايت بتقدم فيه طلب إنك عايز تاخد الكورس ده for free وتكتب في مقال صغير أسبابك وليه هما المفروض يقبلوا طلبك زي إنك طالب مثلا ولسه مش متوفر ليك دخل تقدر تشتري بيه كورسات وإن ده سببك الأساسي في إنك عايز تاخد الكورس عشان تطور من نفسك وتبدأ تستقل وتشتغل لوحدك وهكذا.
- تاني طريقة هي إنك تقدم على الكورس عن طريق الجزء اللي بيقول enroll for free وديه بتكون خاصية بتُتيح ليك الكورس لمدة اسبوع واحد، بس عشان تحاول تزود الفترة ويبقى وقت أطول من أسبوع واحد بتدوس علي الاوبشن اللي اسمه audit، وديه خاصية بتسمحلك تشوف محتوى الكورس ويبقي معاك الماتريال بس مش بتوفرلك الإمتحان النهائي اللي في اخر الكورس ومش بتوفرلك شهادة الكورس، وده بيبقي مش مهم أوي نظرا إنك بتسعي ورا اكتساب خبرة مش شهادة.
.
.
3- منصة إدراك
.
ديه منصة عربية مجانية بالكامل فيها كورسات كتير عن مجالات ومهارات مختلفة تقدر تعرف من خلالها مقدمة أو بداية لكل مجال قبل ما تقرر تدخل فيه.
.
المميز في منصة إدراك إنها بتوفر كورسات كتير جدا لل soft skills اللي بلا شك هتحتاجها بجانب شغلك وبجانب مجالك عشان تقدر تتعامل مع العميل وتتواصل مع الشركات وتحل المشاكل اللي ممكن تقابلك وتنظم وقتك وما إلي ذلك.
.
.
4- YouTube
.
طبعا مش محتاج أقولك إن ده بحر لوحده، وموجود عليه كل المجالات اللي هتحتاجها والكورسات وال tips الخاصة بكل مجال، وقصص ل freelancers كتير كانوا في يوم لسه بيبدأوا مسارهم زيك.
.
كل اللي محتاج تتعلمه فيه هو إزاي تدور فيه بشكل صحيح وتوصل للفيديو اللي فيه المعلومة الصح و القنوات اللي هتساعدك فعلا.
.
زي مثلا لو شغال في الـ digital marketing نقي الكلمات المميزة اللي هتطلعلك معلومات مفيدة زي marketing objectives أو KPI او marketing channels بحيث يطلعلك فيديوهات قيمة فعلا وفي معلومات مفيدة عكس لو عملت سيرش عن التسويق الرقمي بشكل عام وسبتها مفتوحة.
.
الخلاصة
.
تقدروا تبعتولي في أي وقت المجال الخاص بيكم أو المجال اللي قررتوا تبدأو فيه وانا هرشحلكم أهم الكورسات فيه طبقا لخبرتي في هذا النوع من الترشيحات.
