مع زيادة عدد الفريلانسرز، بتزيد المنافسة الموجودة في سوق العمل الحر، خاصةً مع قلة فرص الشغل الموجودة على أرض الواقع وضَعف المرتبات اللي بتقدمها الشركات للموظفين، على الرغم من إن الفرص والمشاريع اللي العملاء بيطلبوها من الفريلانسرز في سوق العمل الحر بتكتر برضو، بس كُتر الإختيارات بتخلي العميل ينقي أفضل شخص هيقابله ويرفض أي شخص مش هيكون مريح ليه بأي شكل من الأشكال.
.
علشان كده قررت أقولك إزاي تواجه المنافسة في سوق العمل الحر في أربع نقط بس:
.
.
1- خليك مميز
.
أول خطوة هتحتاج تعملها قبل ما تدخل في سوق العمل الحر هى إنك تراقب كل حاجه حواليك بتحصل ازاى، وتاخد ملاحظات على شغل الفريلانسرز اللي في مجالك وتشوف ازاي بيتعاملوا، ازاي بيتكلموا، ازاي بيقدموا شغلهم، ازاي بيجذبوا العميل ليهم، ازاي بيتعاملوا مع الفلوس وكل الحاجات ديه، و هتلاحظ بعد فترة من الوقت إنك أخدت فكرة من كل شخص وعجبك حاجات معينة من أشخاص بعينهم وقررت انت كمان تعمل زيها والأفكار ديه هتساعدك تعرف نقاط قوتك واللي هتكون أول خطوة في طريق تميزك.
.
مراقبتك لكل حاجه بتحصل حواليك ديه مجرد ملاحظة ولو عملت زيها فانت كده بتقلد مش أكتر، شطارتك هتظهر لما تعرف نقطة قوتك الحقيقة والمختلفة عن كل الناس اللي حواليك وتقدمها للعميل واللي بتتسمي في مجال البزنس بال “unique selling point” زي إنك بتسمح بتعديل مجاني للعميل بعد ما تسلمله المشروع، أو بتدي باكدچ مريحة للعميل ماديا، أو بتكون متاح للرد في أي وقت في اليوم، أو بتخلص المشروع في خلال 24 ساعه مثلا او أي حاجه هتخلي العميل عينه تلمع أما يسمعها منك وتكون بتميزك انت بس، والحاجه ديه هتكون إجابة السؤال بتاع “ليه العميل المفروض يختارك انت دونًا عن باقي الناس المقدمة على الوظيفة ديه؟”
.
.
2- خليك شخص يُعتمد عليه
.
إن العميل يطلب منك شغل مش معناه إنه مش هيعرف يعمله، يمكن طالب حد يخلصله الشغل بجودة أعلي أو في وقت أقل أو حتى عشان يخفف الضغط على نفسه، معني كده إن مسئوليتك مش بس بتكون النتيجة اللي بتطلعها للعميل، لا انت مسئول عن راحة العميل وعن جودة المشروع المطلوب منك وعن الرد عليه في أسرع وقت واحترام المواعيد والشروط اللي انتوا متفقين عليها سوا.
.
عشان تتفوق على المنافسة في سوق العمل لازم تتعود تكون شخص مريح للعميل اللي قدامك، يعني تساعده في اللي محتاجه كله وتشرحله عملت ايه في المشروع بعد ما تسلمه واهمية كل خطوة عملتها فيه من وجهة نظرك كمحترف في المجال وتلتزم بمواعيد التسليم والاستلام، أول ما تلتزم بالنقط ديه، فمبروك انت كده ريحت العميل وكسبته عشان هو شايفك شخص مريح فهيرجعلك في أي مشروع جديد لو احتاج حد في مجالك.
.
3- خلي الوصول ليك سهل
.
الشغل على مواقع العمل الحر مش مقتصر بس على وجودك على منصات العمل الحر زي upwork لإن مش كل العملاء اللي بتدور على شغل بتكون موجودة على المواقع ديه، في عميل ممكن بواقع خبرته يدور على ناس متخصصة في مجال معين على LinkedIn مثلا.
.
فالمطلوب منك حاليا والأحسن ليك إنك تعمل أكونت أو بروفايل على كل مواقع التواصل الإجتماعي اللي ممكن بشكل أو بآخر تجيبلك عميل يحتاج شخص في مجال شغلك، وكل المطلوب منك هو إثبات حضورك بس وإن الأكونت يبقى فيه معلوماتك الشخصية والبورتفوليو الخاص بيك، ومع إهتمامك بالأكونتات ديه وربطك ليهم ببعض إنت أثبت للعميل إنك فريلانسر محترف وعارف ازاي تسوق لنفسك، و هتزود فرص الشغل قدامك وفرص إن أي عميل يتواصل معاك من أي بلاتفورم.
.
.
4- اهتم بال personal branding
.
كفريلانسر انت مدرك تماما إنك بتشتغل لنفسك وإنك المسئول عن كل حاجة من الالف للياء، وأهم حاجة فى الحاجات ديه هي إهتمامك بال personal branding وهيئتك العامة وازاي بتسوق لنفسك.
.
البروفايل اللي هيمثلك على أي بلاتفورم زي ما هيشد عملاء ليك ويكون سبب في إن عميل يكلمك ويطلب منك شغل، ممكن يكون برضو سبب في إن عميل يبعد عنك ويقرر إنه لا مش حابب إنه يشغلّك.
.
طب ده يعتمد على إيه؟
يعتمد على شكل الأكونت بتاعك وكل حاجه بيتم نشرها عليه، يعني لو انت مثلا بتشتغل content writer مينفعش يبقي عندك أي أخطاء إملائية بأي شكل من الأشكال لإن ده بيعكس صورتك للعميل من قبل ما يشتغل معاك حتى، ومن جِهة أَخرى حاول على اد ما تقدر تبعد عن المنشورات السلبية أو النقد أو الآراء المختَلف عليها بشدة لتجنُب رفض العميل ليك بشكل مباشر بسبب حاجه مش عجباه على الاكونت مش بسبب شغلك.
.
الخلاصة
.
على الرغم من إن المنافسة تكاد تكون صعبة ومُرهقة على البعض بسبب الانتشار الواسع لمجال العمل الحر، بس مع بَذلك للمجهود المطلوب في المكان المناسب، الموضوع هيبقى أسهل وأريح كتير، مع أول عميل هتلاقي الشغل بيجر بعضه وهتلاقي نفسك بتحسّن البورتفوليو الخاص بيك وبتتطور، والعميل ديما بيدور علي الشخص اللي بيتطور وبيسعى.
