من التحديات الكبيرة اللي هتواجهك في مجال العمل الحر إن كل وظيفة هتقدم عليها ليها إنترفيو!

مش بيكون انترفيو بالمعنى الحرفي وتدخل ميتنج بفورمال مع العميل وكده، لكن شوية أسئلة العميل بيحطهم في عرض العمل بتاعه بيكون مستنيك تجاوبهم عشان يقرر انت مناسب لوظيفته ولا لا، وعشان تشتغل لازم تقنع كل عميل بيك قبل كل وظيفة، وتذاكر أسئلته كويس عشان تعرف ترد عليها، ولازم إجاباتك تكون احترافية عشان تقدر فعلاً تشد العميل وتقنعه بيك.

وعلى عكس أسئلة الشركات الشائعة اللي مش بتقيس حاجة في الموظف أوي، العملاء على مواقع العمل الحر بيدرسوا كل سؤال بيسألوه بدقة، عشان كل سؤال هيقولهم حاجة ولو بسيطة عنك وعن طريقة تفكيرك وازاي هتشتغل معاهم على الوظائف.

وعشان تتفوق في المنافسة اللي بتكون موجودة في الوظائف وتقديماتها، فانت محتاج ترد على العملاء بإجابات احترافية على أسئلتهم، وتعرف التكنيك اللي تجاوب بيه على كل سؤال، وتعرف العميل مستنى يسمع منك ايه عشان تقوله، وايه اللي لو قولته العميل هيتجنب اختيارك.

عشان كده قررت أكتبلك المقال ده، عشان اعرفك الإجابات الاحترافية لأشهر الأسئلة اللي العملاء بيسألوها واقولك العميل مستنى يسمع منك ايه، وانت صيغ الإجابة بالشكل اللي يناسب مهاراتك وخبراتك، ولكن أضمنلك إن دي الإجابات اللي العميل بيدور عليها.

في المقال ده هعرفك على أهم 5 أسئلة العملاء بيطلبوا من الفريلانسرز يجاوبوا عليها في مجالاتهم المختلفة، الأسئلة دى انا جمعتها من العملاء على موقع Upwork، ولكن بنسبة كبيرة هتلاقيهم نفس الأسئلة اللي العملاء في مواقع العمل الحر كلها بتسألها في عرض الوظيفة مع اختلاف صياغة السؤال.

1-?What metrics do you measure for job success

السؤال ده من أهم الأسئلة اللي كل العملاء بيسألوه عشان يتأكدوا إنك ماشي معاهم على نفس الخط، وترجمته هي “ايه الحاجات اللي بتقيس عليها نجاحك في الوظيفة دي؟” يعني بتعتبرك شغلك نجح لما يحصل ايه؟

السؤال ده في غاية الأهمية، وانصحك إن حتى لو العميل مسألكش عليه لإنك تحرص على إجابته في البروبوزال بتاعك، لإن أكيد العميل مش فارق معاه الفيديو بتاعك ولا المقال اللي كتبته ولا تصميمك الرائع، هو فارق معاه النجاح النهائي اللي شغلك ده هيقدمهوله، زي عدد المشاهدات أو زيادة المبيعات وغيره، وده بالظبط اللي انت محتاج تقوله للعميل، تقوله ازاي بتقيس نجاح الخدمات اللي بتقدمها دي، وأوقات كمان هتحتاج تقوله بتوصل للنجاح ده ازاي.

الخريطة اللي هتتبعها عشان تجاوب على السؤال ده، هو إنك تعرف في البداية إن غرض العميل في طلبه الخدمة اللي بتقدمها دي هو “الربح المادي” سواء بشكل مباشر أو غير مباشر، وهنا تيجي وظيفتك في إنك تفهمه إن نجاح شغلك بيقدمله ده فعلا!

فلو انت جرافيك ديزاينر بتعمل صور مصغرة لليوتيوب فنجاحك بيتمثل في كونسبت الـ CTR أو عدد المرات اللي المشاهدين بيضغطوا فيها على الفيديو بسبب إن الديزاين شدهم، واللي بدوره بيزود عدد المشاهدات فبيزود ربح العميل.

ولو انت بتشتغل في إدارة قنوات اليوتيوب زيي كده فنجاحك بيتمثل في عدد المشاهدات والزيارات اللي بتوصل للقناة (زيارات حقيقة من ناس مهتمة بالمحتوى الموجود في القناة بالفعل مش مشاهدات وأرقام مزيفة)، فبدورك هتوضح للعميل إن الأرقام دي كلها بتمثل نجاحك في الوظيفة اللي بتقدمهاله، وبتمثله زيادة ربح مادي بسبب الإعلانات، أو بسبب الناس اللي هيبدأوا يشتروا منتجاته اللي بيعرض عنها، وهكذا.

فالسؤال ده دايما إجابته إنك تقيس للعميل نجاحك بالأرقام والمشاهدات والزيارات وغيره، أو بإنك تعرفه إن شغلك ده هيخليه يصرف بعد كده فلوس أقل في حاجة معينة، أو إنه هيبذل مجهود أقل في المستقبل في تاسك معين بسبب شغلك اللي هتقدمه.

2- ?How do you ensure quality and meet deadlines

أغلب العملاء بيسألوا السؤال ده بعد مرحلة البروبوزال، لما يحدد كذا شخص مناسب ليه، فيبدأ يتواصل معاهم عشان يسألهم عن تفاصيل أكتر ويقدر يحدد مين فيهم الشخص المناسب للوظيفة، فمن أوائل الأسئلة اللي بيسألها هي “ازاي بتهتم بجودة الشغل وبتلتزم بمواعيد التسليم؟”

السؤال ده بتجاوب عليه بخطة توضيحية لنظامك وطريقة إدارة شغلك، وبتكون خطة سريعة كده مش تفصيلية عشان يفهم نظامك ويعرف انت بتمشي الشغل ازاي.

فعلى سبيل المثال في شغلي أنا كشخص بيدير قنوات اليوتيوب، بوضح للعميل إننا بنبدأ نعمل مراجعة سريعة على قناتك على اليوتيوب، ونراجع أهدافك اللي عايز توصلها من القناة، بعد كده ببدأ أنا أعمل خطة كاملة واجمع التاسكات اللي هنبدأ نشتغل عليها الفترة الجاية، بعد كده برفعهم على برنامج متابعة بحط فيه كل التاسكات ومواعيد التسليم ومواعيد الرفع على القناة وما إلى ذلك -وفي حالتي أنا البرنامج اللي بستخدمه هو Notion –

وأهمية وجود برنامج متابعة تكمُن في التنظيم العام للشغل، وفي متابعة العميل الخطة والتطورات أول بأول بدون ما يلجأ إنه يدخل يسألني كل شويه “ها وصلنا فين؟”.

ولما ببلغ العميل إني بستخدم أبلكيشن متابعة بيتبسط جداً وبيتأكد إني فعلاً مُنظم ومهتم بالشغل وبالكوالتي وبمواعيد التسليم.

بعد كده بوضح للعميل الخطة دي، واعرفه إنى هسلمه الأبديت الفُلاني في الوقت الُفلاني، ولو في حاجة اتغيرت في خطتنا فلازم نقعد نتكلم فيها سوا ونشوف هنقدر نضيفها ازاي في الخطة من غير ما تأثر علينا بشكل سلبي.

وفي الآخر بسأله انت حابب طريقة التواصل بينا تكون عاملة ازاي، وبتحب تستخدم أبلكيشن ايه عشان نتابع عليه سوا.وملحوظة مهمة جداً ليك يا صديقي، متبعتش أي طريقة للتواصل بينك وبين العميل قبل ما يكون في عقد رسمى مفتوح بينك وبينه على الموقع، عشان لو حصل عكس كده أبوورك ممكن تقفلك الأكونت بتاعك للأسف. 

3- ?Can you tell me about your experience

السؤال ده يبان في ظاهره إنه سؤال بديهي جداً وأي حد يقدر يجاوب عليه، ولكن الحقيقة إن إجابات أغلب الفريلانسرز بتكون الإجابات اللي العميل مش بيدور عليها وبيلجأ إنه يتجنبها، زي إن شخص يبينله في السؤال أد ايه هو جامد، أو يرصله كل مهاراته في 90 نقطة ورا بعض وخلاص، أو يقوله إنه اشتغل في حاجات ملهاش علاقة بالشغل اللي العميل ده طالبه!

طب العميل بيدور على ايه؟

العميل بيدور على خبراتك ومهاراته اللي تهمه وتخدمه في المشروع بس، بيدور على شغل سابق ليك في نفس محيط الشغلانة اللي هو طالبها أو في محيط قريب منها عشان يقدر يحدد هل انت مناسب ولا لا، ومستنى يسمع منك نتايجك في الحاجات اللي انت كتبتها.

فانت بشطارتك هتختصر إجاباتك وخبراتك في الكام نقطة اللي قولنا العميل بيدور عليهم، وتوضح للعميل إجابتك على السؤال بشكل مختصر، لإن التفاصيل هنا هي آخر حاجة العميل مستنى يسمعها منك.

4-?Why should we choose you over other freelancers

السؤال ده شائع جداً بين العملاء، وللأسف هو ملوش إجابة محددة وثابتة تكتبها، لإنه بيحتاج تتعرف على شخصية العميل، وتستشف من الوظيفة العميل عايز شخص عامل ازاي، وفي خلال مسيرتي كفريلانسر أنا مش فاكر إني جاوبت على السؤال ده نفس الإجابة مرتين، لإن دايما شخصية العميل هي المفتاح.

ولكن على سبيل المثال أنا بحب أهزر مع العميل في بداية الإجابة على السؤال ده كنوع من أنواع المرح وبقوله “فكرة إنك لسه بتقرأ البروبوزال بتاعي لحد السطر ده رغم كل الكلام اللي كتبته في البداية عشان أقنعك بيا، فواضح إنك بالفعل مهتم وبتفكر تختارني فعلا” وبحط ايموجي جمب كلامي عشان يبان إنه مجرد لاين وبعدها ببدأ أجاوبه الإجابة الجدية.

إجابتي الجدية في السؤال ده بتكون في الأغلب توضيح للعميل إني أكتر حد مُتفهم هو عايز ايه بالظبط لإني موجود حالياً في مكانه، وبقوله يا سيادة العميل أنا مُدرك ومتفهم أد إيه انت محتاج حد يساعدك تدير قناة اليوتيوب بتاعك، وازاي انت بتمر بمشاكل كتير لإني أنا كمان عندي قناتي الخاصة اللي بنشر عليها محتوى خاص بيا زيك، لكني قدرت اتخطى المشاكل اللي انت بتمر بيها دي كلها وحققت نتائج في قناتي بالفعل، وهكون سعيد جدا أساعدك انت كمان تتخطى المشاكل دي والقناة تكبر أكتر.

وهقولك على سر بيني وبينك، السؤال ده هو كان أحد الأسباب اللي خلتني أبدأ قناة اليوتيوب الخاصة بيا، وأقرر إني عايز يبقى ليا انتشار على السوشيال ميديا عشان أقدر اعرض ده للعملاء في شغلي، فلو عندك فرصة تعمل شيء مماثل يكون خاص بمجالك انت وتبلوره للعملاء فاعمل ده فوراً.

5- ?How do you handle client feedback and revisions

السؤال ده أهميته بتظهر بعدين، لما يحصل مشكلة بينك وبين العميل، فتستخدمه كمرجع عشان تفكر العميل بإجابتك اللي انت بعتهاله في البداية، وتقوله أنا كنت وضحت كذا وكذا وكذا وانت وافقت عليهم، فينتهي الموضوع قبل ما يبدأ وميبقاش في أجزاء رمادية بينك وبين العميل، لإن كل واحد فيكم كان فاكر حاجة معينة في دماغه.

وعشان تجاوب على السؤال ده للعميل هتقوله إنك مُتفهم إن التعديلات دي جزء من الشغل، ولكن احنا هنتفق في البداية على كل التفاصيل الممكنة عشان نحاول نقللها، وهنتفق على نتائج مبدئية احنا عايزين نوصلها سوا عشان نقدر نحكم في النهاية حققناها ولالا، وتوضحله إن لازم يبقى في ريفرنس واضح بينكم مشابه لمتطلبات العميل، عشان تتجنب فكرة إن الشغل ممكن يتلغي بالكامل في النهاية بحِجة إن مش ده اللي كان مطلوب!

كمان هتوضحله إنكم هتتواصلوا سوا بعد كل خطوة ملحوظة هتِخلص، عشان لو في مشكلة ظهرت في البداية تقدروا تلحقوها سوا قبل ما الشغل يخلص، ولو هنحط حاجات زيادة في النص فمحتاجين نقعد نتناقش فيها الأول ونشوف هنقدر نعملها ازاي نسبةً لعامل الوقت وعامل الفلوس.

وملاحظة ليك عالسريع كده، لو العميل طلب منك إضافة بسيطة تقدر إنك تعملهاله كجِميلة ليه عشان تكسب صفه فمتترددش أبداً، لإن الفرص دي هي اللي بتكسبك عميل دائم في رحلتك كمستقل على مواقع العمل الحر.

زي ما العميل بيسألك كل الأسئلة اللي هو عايزها عشان يضمن إنك مناسب ليه فعلاً، انت كمان محتاج تسأله بعض الأسئلة اللي هتفرق معاك في الشغل وفي التواصل معاه عشان الشغل يتم صح، فإليك بعض الأسئلة اللي انا بسألها للعملاء قبل ما نبدأ شغل على الوظيفة:

• هل في برنامج معين العميل بيفضله لمتابعة الشغل؟

بعض العملاء بيحبوا يتابعوا الشغل بتاعهم أول بأول على برامج هما متعودين عليها، وقتها بلجأ للبرامج اللي بيقترحوها، لكن لو العميل معندوش برنامج معين وسايبها مفتوحة فبعرض عليه نتعامل على نوشن، وببعتله التمبلت اللي بكون مجهزه بكل التفاصيل اللي احنا محتاجينها -تقدر توصل للتمبلت من المقال ده- وبكون مجهزله فيديو بسيط لشرح التمبلت ده وازاي هنتعامل عليه، عشان نقدر نتابع الشغل بشكل مريح ليه وليا.

• ايه أفضل طريقة للتواصل بيني وبين العميل؟

بعض العملاء مش بيفضلوا التواصل على أبوورك فالسؤال ده غرضه راحة العميل، لو هو بيحب التواصل على الموقع بنتواصل عليه، ولو هو بيحب نتواصل في مكان خارجي بعمل ده، ولكن بعد ما نعمل عقد عمل مفتوح على الموقع طبعاً عشان أبوورك متسببلكش مشاكل.

• لينك الموقع أو منصات التواصل الإجتماعي الخاصة بالعميل

والسؤال ده راجع لاحتياجي للمعلومة دي في شغلي فعلاً، وأنا بحتاجها عشان أقدر أوصل لمعلومات أكتر عن العميل وأحاول استخدمها في الوظيفة الحالية، وبالمثل انت هتسأل على التفاصيل اللي انت محتاجها من العميل عشان تقدر تنفذله الوظيفة.

• ايه الريفرنس اللي العميل عايزه كنتيجة نهائية؟

وده سؤال مهم جداً تعرف إجابته، ومهم تاخد الريفرنس من العميل، عشان تبدأ تشتغل معاه على المطلوب وانت عارف الطريق اللي انت ماشي فيه.

• ليه العميل محتاج حد يعمله الوظيفة دي؟

السؤال ده هيساعدك تعرف هدف العميل الأساسي ورا الشغل المطلوب ده كله، وده هيساعدك جداً توصل معاه لشغل يحققله النتائج اللي هو عايزها، وهيسمحلك تبدع في شغلك أكتر لإنك عارف حدودك فين بالظبط وليه العميل بيعمل ده.

العميل ده شخص بيدفع فلوس من جيبه مقابل خدمة، فمن أبسط حقوقه إنه يسألك بعض الأسئلة اللي هتوضحله هل انت الشخص المناسب اللي يقدمله الخدمة دي ولا، فمتضايقش من كُتر الاسئلة اللي بعض العملاء بتسألها.

وخليك عارف إن مع كل وظيفة بتقدم عليها تفكيرك وإجاباتك هتتحسن أكتر وهنبقى أشطر وقادر تفهم نفسك وتفهم دماغ العميل، فمتستسلمش لو اترفضت في بعض الوظائف دلوقتي، هي بس مش نصيبك لكن أكيد ليك رزق في وظائف أُخرى في المستقبل القريب بإذن الله.