العمل الحر هو منظومة كاملة بيقوم بيها شخص واحد بس، انت اللي بتشتغل وانت اللي بتسوق لنفسك وانت اللي بتحدد المشاريع اللي هتشتغل عليها وانت اللي بتحدد ساعات شغلك، ومع كل ده بيقع عليك حِمل التعامل مع دخلك وتنظيم مواردك المالية من الألف للياء.
.
نظرًا إن أحد عيوب مجال العمل الحر هو عدم انتظام تدفق دخلك الشهري، فدوناً عن باقي الناس، الفريلانسر بالذات لازم يهتم بأموره المالية وياخدها على محمل الجدية.
.
الحل في إنهاء التشتت ده وتقليل الخوف من عدم الإستقرار المادي اللي بعض الفريلانسرز بيحسوا بيه هو إتباع النصائح ديه.
.
.
1- تتبع دخلك ومصروفاتك الشهرية
.
دخلك كفريلانسر هيتقسم لإتنين جزء فيه العملاء اللي مستمرين معاك و بيطلبوا منك شغل شهري بمبلغ معين ثابت، وجزء تاني فيه المشاريع اللي بتيجي مرة واحدة أو العملاء اللي بتتعامل معاهم مرة واحدة أو أي شغل ممكن يحصل بشكل غير منتظم.
.
هتعمل شيت بيضم أول جزء من العملاء وتجمع فيه المبلغ اللي هتبقى متوقع تاخده منهم كل شهر واللي بيتم بشكل مستمر، وشيت تاني بيضم النوع التاني من العملاء والمشاريع اللي بتتم بشكل غير منتظم وتجمع المبلغ الكلي من الشيت وتقسمه على 2، بعد كده هتاخد مجموع الشيت الأول ومجموع الشيت التاني بعد ما قسمته على 2 وبكده هتكون طِلعت بمتوسط دخلك.
.
.
2- حدد مصاريفك الشهرية
.
دخلك الشهري كفريلانسر مش ثابت، بس فواتيرك و مصاريفك الشهرية ثابتة، وديه الدافع الأساسي اللي المفروض يحركك ويعرفك إن مهما حصل مينفعش دخلك يقل عن المبلغ المعين اللي بيقدر يساعدك تتحمل ظروف المعيشة.
.
مصاريفك الشهرية بتتقسم لمصاريف شخصية زي الأكل واللبس وفواتير الكهربا والماية والضرائب اللي بتدفعها، أو مصاريف خاصة بالشغل زي الأدوات والأجهزة اللي بتحتاج تشتريها المتعلقة بمجالك.
.
.
3- اعمل خطة إدخار
.
واحدة من أكبر عيوب مجال العمل الحر هو عدم توفر تأمين صحي أو أجازات مدفوعة أو معاش وتأمينات، عشان كده المطلوب منك كفريلانسر تأمن نفسك وتتوقع حدوث أي مشكلة في أي وقت، والحل الوحيد عشان تكون مرتاح البال ومتشيلش هم هو إنك تحوش من دخلك شهريا مبلغ على جنب عشان تقدر تتصرف مع أي حالة طوارئ ممكن تقابلها.
.
وخطط الادخار بتتقسم 2 واحدة على المدى القريب وواحدة على المدى البعيد، الخطط اللي على المدى القريب ديه اللي بنحوش فيها مبالغ معينة بهدف شراء حاجات معينة بتحتاج مدة كبيرة تجمع فيها فلوس سواء ديه حاجه شخصية ليك أو حاجة تخص الشغل مثلا، والخطط على المدى البعيد ديه الخطط اللي بنحوش فيها الفلوس وننساها وديه اللي بتكون متوفرة في حالات الطوارئ أو الشهور اللي لقدر الله ممكن توقف فيها الشغل مثلا لأي سبب.
.
المبلغ اللي بتحوشه بيتراوح بين 5% ل 50% من دخلك وطبعاً دا بيرجع لعوامل كتير حواليك ولمصاريفك وما إلى ذلك، بس وقت الأمان وإنك تعرف إنك مش محتاج تقلق من عدم الإستقرار المادي بيحصل لما يبقى معاك تحويشة تساوي دخلك لمدة 6 شهور.
.
الخلاصة
.
الحرية اللي بتمتلكها كفريلانسر في حياتك المهنية سواء كانت مخيفة أو حماسية هتمتد لحياتك المادية برضو، بس النصايح اللي قولنا عليها هتحسسك إنها مبقتش مشكلة خلاص وإنك مرتاح أكتر، كل اللي محتاجه هو شوية وقت وهتقدر تتعامل معاها صح، ومع الوقت هتدرك إن الريسك اللي خدته في إنك تشتغل كفريلانسر والتعامل مع عدم إستقرار دخلك، أهون كتير من شغلك كموظف بمرتب ثابت لا بتقدر تعليه ولا تطلب أكتر لما تطور نفسك بعد فترة.
