جربت تسأل نفسك قبل كده “ايه الفرق بين الفريلانسر العادي على موقع أبوورك وبين الفريلانسر الـ Top Rated؟” 

الفريلانسر العادي هو شخص عمل أكونت على موقع العمل الحر وعنده المهارات الكافية اللي تساعده يبحث عن وظيفة على الموقع، ويختار العميل والوظيفة المناسبين لطبيعة شغله، بل وقِدر يشتغل على الموقع بالفعل وحقق بعض الأرباح من أبوورك.

لكن الفريلانسر التوب ريتد مش بس بيعرف يتعامل مع الموقع ويوصل للعملاء، لكنه الفريلانسر اللي عارف خبايا الموقع، وازاي دماغ العميل بتفكر، وقادر بطُرق بسيطة جداً يتحول للفريلانسر الجيد في رواية أحدهم (العميل).

لو انت لسه مش النوع الأول من الفريلانسرز، وبتواجه بعض المشاكل في التعامل مع الموقع، ومش عارف كيفية الوصول لأول عميل على أبوورك فانصحك بقراءة مقال “كيف تحصل على أول عميل على Upwork | دليلك الكامل” قبل ما تقرأ المقال ده.

ولو انت بالفعل النوع الأول من الفريلانسرز ولكن مهتم تبقى النوع التاني وتعرف طريقة الوصول لبادج التوب ريتد على موقع Upwork فالـ 13 نصيحة دول مهمين ليك!

وعشان تستفيد منهم أكبر استفادة انصحك تحفظ لينك المقال ده عندك عشان كل فترة تبدأ تطبق واحدة من النصائح دي، لإنك مش هتقدر تطبقهم كلهم في وقت واحد وهتحتاج تطبق كل واحدة منهم على حدا لحد ما تتعود عليها وبعدين تبدأ في اللي بعدها!

إليك الـ 13 نصيحة اللي هيحولوا مسيرتك المهنية على موقع أبوورك!

وقت الفجر فيه بركة مختلفة عن باقي اليوم، والرسول دعا لأٌمته في وقت الفجر بالرزق الواسع وقال صلى الله عليه وسلم “اللهم بارِكْ لأمتي في بكورها”.

ولكن ده مش السبب الوحيد اللي يخليك تشتغل وقت الفجر وتقدم على وظائف للعملاء -رغم إنه كافي جداً-، ولكن في سبب تاني مهم جداً أغلب الفريلانسرز العرب بيغفلوا عنه وهو قلة المنافسة على الوظائف في الوقت ده، لإن في الوقت ده بالتحديد في بلاد بتكون في توقيت زمني مختلف عننا كعرب، والبلاد دي زي أمريكا وكندا اللي عملائهم بيدفعوا مبالغ ضخمة على أبوورك، واستعجالهم على الوظائف أحياناً بيخليهم يقبلوا أوائل الناس اللي قدمت على الوظيفة ومش بيستنوا حتى الأحسن كفاءة، ونسبة إنك تكون الشخص ده كبيرة جداً.

فلو شخص قدم على وظيفة الساعة 5 الفجر والعميل مستعجل إنه يختار فريلانسر يشتغل معاه على مشروعه، ففي احتمالية كبيرة إنه يختار شخص قبل ما الساعة تبقى 10 -اللي هو الوقت اللي انت بتصحى فيه- حتى لو كنت انت أفضل كفاءة من الشخص اللي تم اختياره بمليون مرة ولكنه لعبها بذكاء وحجز مكانه في الصفوف الأولى!
فمعنى كده إن التقديم على الوظائف وقت الفجر كجونيور ليه فرص قبول أكتر من التقديم على الوظائف في الصباح الباكر وانت سينيور.

 تعرف إن العملاء ليهم منتدى خاص بيهم على ابوورك؟
بيتكلموا فيه عن تجاربهم مع الفريلانسرز، وبيسألوا فيه عن استشارات ونصائح عشان يعرفوا يختاروا الفريلانسر المناسب لوظايفهم فعلا، وبيشتكوا احياناً من بعض الصفات اللي أرهقتهم في الشغل مع الفريلانسر عشان العملاء التانيين ياخدوا بالهم من الصفة دي ويحاولوا يتجنبوها.

المنتدى ده للعملاء، ولكنك تقدر تستفيد منه بشدة لو تابعته!

متابعتك للمنتدى ده هيساعدك تعرف العميل بيفكر ازاي، وايه اللي بيبسطه فعلاً وايه اللي بيضايقه، فهتعرف ببساطة العميل بيدور على ايه.

وانت بتتابع المنتدى ده سجل ملاحظاتك في نوتة سميها “العميل عايز”، وشوف ايه اللي عاجب العميل، ايه اللي بيشده، ايه اللي بيخليه ينفر منك، وايه اللي بيخليه يسيبك ويختار شخص تاني رغم إنك ممكن تكون مناسب أكتر للوظيفة دي من الشخص التاني، وهكذا.

و هي دي مهارة الفريلانس اللي انت محتاج تكتسبها عشان تعرف تبيع مهارتك الأساسية.

وتقدر بكل بساطة توصل للينك المنتدى من هنا

في النصيحة اللي فاتت انت دخلت على منتدى العملاء عشان تفهم دماغهم وانت عامل فيها عميل (كده وكده ^^)،  بس لو في فرصة تخليك عميل حقيقي ليه تسيبها؟

لما دخلت على المنتدى بتاع العملاء كنت بتراقبهم في صمت، يمكن في شوية حاجات مكنتش بتقتنع بيها أوي ومش فاهم وجهة نظرهم فيها، لكن النصيحة دي هتقنعك بكل حاجة، وهتخليك تخوض التجربة وتكون عميل على موقع أب وورك بالفعل!

كل اللي عليك تعمله هو إنك تختار خدمة انت فعلا محتاجها وتعمل اكونت كعميل على موقع أبوورك وتطلب الخدمة دي، وأنصحك تكون حاجة انت ليك خبرة فيها أو بتعرف تعملها عشان تعرف تحكم صح.

لما تطلب الخدمة انت هتكون شايف الجهة الأُخرى من الموقع، شايف كل حاجة بعين العميل، وقادر تاخد قرارات وتقارن بين الفريلانسرز وتشوف مين اللي شغله شدك فعلا ومين اللي كاتب بروبوزال أي كلام، وهتكتشف ازاي الفريلانسرز الأقوياء بيظهروا نقاط قوتهم للعميل وازاي بيشدوه ليهم، وهتعرف انت ليه استبعدت الفريلانسرز الضعاف، وفي وسط المنافسة دي دماغك هتترجم لوحدها إنك لما تكون في مكان الفريلانسرز دول المرة الجاية هتعمل كذا وتتجنب كذا!

الحركة دي مش هتخسرك حاجة بالعكس انت الكسبان، لإنك استفدت بالخدمة اللي اتعملت، وبقى عندك مهارة فلترة الفريلانسرز واختيار الشخص المناسب، وبقيت عارف مشاعر العميل ايه وقت مبتشتغلوا على المشروع سوا ، وليه هو بيهتم بالكوالتي والمواعيد!

ونصيحة لوجه الله، متعملش الحركة دي غير لو انت متأكد 100% انك هتقبل حد للوظيفة دي فعلا، لإن التقديم على ابوورك بكونكتات اللي هي في النهاية فلوس بيخسرها الفريلانسرز اللي بيقدموا، فمتكونش سبب في خسارتهم كلهم بدون ما حد يستفيد بالوظيفة في النهاية. 

عارف الفترة اللي بتبقى محتاج تصرف فيها على شغلك عشان يقدر يجيبلك شغل أكتر؟

في مجال العمل الحر دي مش بتكون فترة، دا غالبا بيكون لايف ستايل لإن كل يوم المنافسة بتزيد أكتر من اليوم اللي قبله، ومفيش حد مبسوط بالموضوع ده أكتر من مواقع العمل الحر، لإنها بتبدأ تقدم خدمات أكتر بمقابل مادي أكبر عشان بس تخليك مُلاحظ من قِبل العملاء!

فلو عندك القدرة انك تشتري كونكتات أكتر على الموقع وتستخدمها في واحدة من 3 مزايا دول فانت المستفيد تماما!

• ميزة ظهور البروبوزال بتاعك في بداية الوظيفة:

أبوورك بيقدم ميزة قوية جداً وهي إنه بيحتفظ بأماكن أول 3 بروبوزالز لأكتر 3 أشخاص هيدفعوا كونكتات عشان يظهروا للعميل في البداية، فلو انت مقدم على وظيفة ومتأكد من قوة البروبوزال بتاعك وقوة مهارتك وضامن قبولك فيها، فتقدر تدفع الكونكتات في نوع الإعلانات دي لإنها هتساعدك جداً وهتزود فرصة قبولك، لإن العميل عمره ما هيتخطى البروبوزال بتاعك من غير ما يقرأه، دا أبوورك شخصيا اللي مرشحاك يا صديقي!

• ميزة ظهور حسابك الشخصي في البداية  للعملاء اللي بيبحثوا عن مهارتك:

أبوورك بتقدملك خدمة تاني قادرة تزود فرصتك وسط المنافسة على الموقع، وهي إنك بتدفع كونكتات عشان الأكونت بتاعك يظهر للعميل في الأول لما يجي يبحث عن أشخاص بتقدم المهارة بتاعتك، ودي ميزة هتساعد العملاء تلاحظ وجودك أكتر حتى لو مش هيكلموك في شغل في وقتها، ولكن هيفتكروك لو قدمت على وظيفة عندهم.

• ميزة ظهور بادج (Available Now) جنب البروفايل بتاعك:

ودي خدمة أبوورك بتقدمهالك برضو مقابل كونكتات، والخدمة عبارة عن بادج اسمها “متاح الآن” بتظهر جنب البروفايل بتاعك عشان العملاء يعرفوا إنك متاح للشغل حاليا، فيقدروا يعتمدوا عليك، ومقارنة بالميزتين اللي فاتوا فالميزة دي مش أقوى حاجة ومنصحكش تدفع كوكنتات عشانها إلا في بعض حالات معينة.

وعشان فكرة الإعلانات دي مُكلفة شوية فالنصيحة دي اختيارية 100% تقدر تعملها أو لا، ولكن لما ربنا يكرمك في القريب العاجل أنصحك باتباعها لإنها هتساعدك تعدي خطوات كتير بمجهود أقل.

مين قال إنك عشان تشتغل على أبوورك لازم تصرف كونكتات على الوظائف كل شوية؟

في الفترة الأخيرة أبوورك عملت ميزة جديدة شقلبت الطريقة التقليدية اللي الفريلانسرز والعملاء بيمشوا عليها، فبدل ما كان العميل بينزل وظيفة ويقدمله عشرات الفريلانسرز ويختار منهم براحته، بقى في فرصة إن الفريلانسر هو اللي ينزل خدمته بكل تفاصيلها والعميل يدخل يقلب فيها ويقرر يشتري منك الخدمة دي وتبدأوا شغل على طول، وفي الحالة دي انت مش مطالب بدفع كونكتات!

والسبب اللي خلى أبوورك تعمل الميزة دي هي إنها عايزة تجمع بين كونها Remote Job Market Place (يعني العميل هو اللي بيعرض احتياجه والفريلانسرز بيقدموا لمساعدته)، وبين كونها GIG Market Place (يعني الفريلانسرز هما اللي بيعرضوا خدماتهم والعملاء بيشتروها وقت احتياجهم) ولو عايز تعرف أكتر عن الفرق بين النوعين دون من المواقع تقدر تقرأ مقال “مقارنة تفصيلية بين أشهر مواقع العمل الحر”.

كل المطلوب منك هو انك تروح على الاكونت بتاعك وتعمل “Prepackage to Project” يعني تظبط الخدمة اللي بتقدمها بالكامل، وتعرضها بشكل مناسب، وتكتب كل التفاصيل اللي العميل هيكون محتاج يعرفها عشان يشتري منك الخدمة دي.

تقدر توصل للخاصية دي عن طريق إنك تنزل لآخر صفحتك الشخصية  وتختار(Your Projects Catalog) هتدوس بعدها على (Manage Projects) اللي هتوصلك لمرحلة (Create a Project) ومن هنا تقدر تضيف خدمتك اللي حابب العملاء يشتروها منك، وتقدر تضيف لحد 20 خدمة، وكده انت بقى عندك فرصة تشتغل مع العملاء في وظائف على أبوورك من غير ما تدخل نفسك في دوامة الكونكتات.

تعرف إنك ممكن تاخد فلوس عشان تنصح العملاء في مشاريعهم من غير حتى ما تشتغل عليها؟

هى دي ميزة الـ Consultation اللي بيقدمها موقع ابوورك، وهي عبارة عن ميتنج بتدخل فيه مع عميل عايز استشارة في شيء ليه علاقة بالمجال بتاعك، والميتنج ده بيكون مدفوع وبتاخد منه فلوس عادي جداً.

بعض العملاء بيحتاجوا فريلاينسرز يشتغلوا معاهم على مشاريعهم ولكنهم بيخافوا يوظفوا شخص ممكن يكون مش مناسب اوي للوظيفة، فعشان يتجنبوا فكرة إنهم يرموا فلوسهم كلها على الأرض، بيلجأوا لفكرة الـ Consulting عشان يتكلموا مع الفريلانسر في البداية ويتعرفوا على أفكاره ومقترحاته وطريقة شغله، ولو لقوا الشخص ده مناسب وهما مرتاحين معاه بيعرضوا عليه يشتغل معاهم في الوظيفة بتاعتهم.

فأنصحك وبشدة تقدم خدمة الاستشارات للعملاء لإنها ميزة قوية جداً قادرة تعلمك كتير، وفي الأول وفي الآخر هي ميزة مدفوعة فانت هتستفيد منها، ولكن السبب الأساسي ورا إني بقولك اشتغل فيها هو إن الميزة دي مجرد بداية ليك مع عميل، وقادرة تفتح عليك أبواب شغل ورزق كتير مع الوقت لما العميل يلاحظ شطارتك في المجال.

وعشان تقدم استشارات للعملاء أنصحك إنك تختار أفضل خدمة بتقدمها وأقوى مهارة عندك، عشان مجرد ما العميل يلاحظ أد ايه انت متميز فيها هيرتاحلك ويعرض عليك شغل معاه وده المطلوب. 

عشان تختار الوظيفة المناسبة ليك فعلاً بتحط عوامل كتير بتحدد من خلالها الوظيفة دي تستحق تقدم عليها ولا لا، زي عدد الناس اللي مقدمة على الوظيفة، سعر الساعة اللي العميل هيدفعه، تقييم العميل على الموقع، … وهكذا.

أحد العوامل اللي المفروض لا تغفل عنها هى كمية الفلوس اللي العميل ده صرفها على الموقع، وده عامل بيساعدك تعرف هل العميل ده ثقة ولا لا، هل هو شخص جاد ومنزل وظيفة محتاج حد يشتغل عليها فعلا ولا ممكن بعد ما تقدم وتدفع كونكتات ميقبلش حد، هل ممكن يبقى نصب ولا لا.

وطبعا كل ما العميل يصرف فلوس على الموقع أكتر كل ما بيكون ثقة اكتر.

وعشان تسهل على نفسك، أبوورك فيها فلتر مهم جداً بيساعدك تفلتر الوظائف عن طريق كمية الفلوس اللي العميل صرفها على الموقع، وكل ما يصرف أكتر كل ما هيظهر في البداية وده هيسهل عليك كتير، وهيظهرلك أتقل العملاء اللي بتنزل وظائف ليها علاقة بمجالك وبتصرف فلوس عليه، ولكن عيب الفلتر ده الوحيد هو إن الوظائف ممكن تكون قديمة أو جديدة، يعني ممكن تلاقي وظيفة من يومين ووظيفة من شهر، وده هيخليك تاخد وقت عشان تحدد إيه الوظيفة اللي مستاهل تقدم عليها وإيه الوظيفة اللي لا.

ولكن أنصحك متتجاهلش الوظائف اللي عدا عليها فترة كبيرة وخلاص، لإن حسب الفلتر اللي احنا عاملينه فالعميل صارف كتير! انت بس اللي مدورتش في الوقت المناسب، فهنعمل حركة بسيطة كده عشان العميل ده ميضيعش مننا، وهي إننا هنحتفظ بوظيفة العميل وهنتابعه كل فترة ونشوف هو بينزل وظائف ولا لا، عشان لما ينزل وظيفة جديدة عجبانا نلحق نقدم عليها، وعشان تعرف العميل نزل وظائف جديدة ولا لا فهتلاقيها في آخر جزء موجود في أكونت العميل اللي اسمها (Other Open Jobs By This Client)، بالشكل ده هتقدر تتابع وظائف العميل المستقبلية اللي ممكن تكون مناسبة ليك.

من أحد المميزات في ابوورك حاليا إنها ضافت جزء الـ Introductory Video، وهو بيكون فيديو من تصويرك عشان تعرَف فيه نفسك أكتر للعملاء، أو تعرض فيه مهاراتك، أو تضيف فيه أي حاجة قادرة تخدِم على البروفايل بتاعك.

ومن خلال خبرتي وبعد شوية بحث، أكتشفت إن أنجح الفيديوهات دي بتكون لفريلانسرز بيظِهروا فيها مهاراتهم بشكل غير مباشر، مثال على ده بعض الأشخاص بيوضحوا في فيديوهاتهم هما ازاي بيعلموا مهاراتهم لناس تانية، فبالتالي هما كده قدروا يوصلوا للعميل احترافيتهم في مجالهم بشكل غير مباشر لإن اللي بيعلِم شخص مهارة لازم يكون متقنها من البداية.

وبمجرد ما تعرف انت حابب تقدم ايه في الفيديو بتاعك فتقدر تستعين بتولز تساعدك في المهمة دي، زي إنك تسأل Chat GPT على أفكار تكتبها في الاسكربت بتاعك.

وتقدر تستخدم برنامج Bigvo عشان يساعدك في التصوير عن طريق إنك تكتبله الإسكربت بالكامل وهو هيعرضهولك على الموبايل وانت بتصور الفيديو، فالشكل النهائي هيظهر إنك بتصور عادي ولكنك في الحقيقة بتقرأ الاسكربت اللي بيطلعلك على الشاشة وانت بتصور -دا بعد ما تدرب على الاسكربت طبعا- وبكده يكون معاك فيديو قوي هيساعد العملاء يتعرفوا عليك أكتر.

تخيل نفسك موظف مجهول في شركة حكومية بتطلع ورق لعامة الشعب عشان المصالح تمشي، وجه واحد قالك صباح الخير يا أستاذ فلان كنت عايز كذا، اتخطفت صح؟ أصل محدش يعرفك غير والدتك ففكرة إن حد يخاطبك باسمك مثيرة للانتباه وهتخليك غصب عنك تهتم بكل حاجة الشخص ده بيقولهالك عشان تشوف هتساعده ازاي.

هو ده بالظبط التكنيك اللي بنستخدمه مع العملاء، هتلاقي أغلب البروبوزالز اللي الفريلانسرز التانيين عارضينها للوظيفة بتبدأ بـ (Hi Sir)، لكن البروبوزال بتاعك هيبدأ بـ (Hi John) على افتراض إن اسم العميل جون يعني، تتوقع مين اللي هيشد العميل فيكم؟

ولإن العميل عارف إن اسمه مش معلومة عادية بيتم تداولها على الموقع عادي كده، فهيكون مبسوط أكتر إنك تعبت نفسك شوية ودورت على اسمه، وأول انطباع هياخده عنك هو “لا دا انت مهتم بقى مش بتقدم كده وخلاص!”، فمتخيل تركاية بسيطة زي دي هتقول للعميل عنك ايه؟

عشان توصل لاسم العميل بقى فكل اللي هتحتاج تعمله هو إنك تدخل على أكونت العميل، وهتروح للتقييمات اللي الفريلانسرز سابوها للعميل ده قبل كده، لو قلبت وسط التقييمات دي شوية وقرأت هما كاتبين ايه هتلاقي واحد منهم على الأقل ذاكر اسم العميل، وقايل إنه مبسوط إنه اشتغل معاه وهكذا، ومن هنا انت كده عرفت اسم العميل وقدرت تجذب انتباهه.

كفريلانسر وشخص بيشتغل من البيت، أحد أصعب المشاكل اللي هتواجهك هي تنظيم الوقت، لإن وقت شغلك مش هيكون وقت بتخلص فيه الوظائف اللي انت شغال فيها مع العملاء بس ولكن هيكون وقت بتقدم فيه على وظائف جديدة عشان لما الشغل يخلص يبقى فيه شغل غيره وهكذا، فانصحك قبل ما تبدأ يومك خصص ساعة تقدم فيها على وظائف جديدة، وباقي اليوم تقدر تشتغل عادي.
 

وعشان تنظم وقتك صح فانت محتاج قبل بداية كل أسبوع تشوف ايه الأهداف المهمة اللي انت محتاج تحققها الإسبوع ده بالكامل عشان تقدر تقسمها على مدار الأيام، وقبل بداية كل يوم هتحتاج تنظم يومك وتشوف وراك ايه وهتقدر تخلصه ازاي، سواء شغل مع عملاء أو تقديمات في شغل جديد.

وخلال يومك هتحتاج خطة عشان تنظم وقتك صح واليوم ميجريش منك، فممكن تشتغل بطريقة البومودورو يعني تشتغل نص ساعة وتاخد بريك عشر دقايق، أو تشتغل بطريقة التاسكات اللي هو بعد كل تاسك هيخلص هتاخد بريك كبير، أو بأي طريقة بتحبها، لكن تنظيم وقتك هو عامل كبير بيحدد نجاحك كفريلانسر ومحتاج تاخده على محمل الجدية

العميل لما بيدور على فريلانسر يشتغل معاه مش بيبقى عايز شخص جامد جداً في مهارته وخلاص، ولكنه عايز شخص بيحققله نتايج، سواء كانت النتايج دي بالنسبة للعميل عبارة عن أرقام أو مبيعات أو مشاهدات أو أي شيء.

وأفضل طريقة تظهِر بيها للعميل إنك شخص بتحقق نتائج فعلاً هو إنك تخلي البورتفوليو بتاعك أو معرض أعمالك يتكلم بلغة الأرقام، يعني حط فيه النتائج اللي الفيديو ده حققها، أو عدد الزيارات اللي المقال ده وصله، وهكذا.

إضافتك لبعض الشهادات اللي خدتها في مجالك قادرة تخلي العميل يثق فيك أكتر ويتأكد من قوتك داخل مجالك، عشان كده بنصحك تضيف شهاداتك.

والشهادات متقسمة نوعين، نوع موثق من موقع أبوورك زي شهادات جوجل اللي هتلاحظ قبل ما تبدأ الكورس إن مكتوب عليها (Verified By Upwork)، والنوع التاني هو شهادات غير موثقة زي أي شهادات تاني ممكن تاخدها من أي مكان.

عشان تضيف شهادة موثقة ليك على الموقع كل اللي هتعمله هو إنك تتواصل مع موقع أبوورك، وتبعتلهم الشهادة الموثقة بتاعتك وهما هيرفعوهالك على الأكونت بتاعك وجنبها  (Verified By Upwork)، لكن لو عايز تضيف الشهادة انت سواء كانت موثقة أو مش موثقة فتقدر تضيفها عادي بنفسك من الاكونت بتاعك، ولكن مش هيكون جنبها علامة الـ Verified By Upwork.

وبعض الكورسات اللي شهادتها موثقة من جوجل أو أي موقع تاني أحيانا بتكون كورسات بسيطة جدا تقدر تخلصها في يومين أو تلاتة وتستسلم الشهادة، فانصحك تدور على الكورسات دي وتقدم فيها عشان الشهادة هتفرق معاك جدا فى الأكونت بتاعك و هتخلي العميل يثق فيك أكتر.

الفيدباك مهم ليك جداً والعملاء قبل ما يشتغلوا معاك لازم يقرأوه عشان يتأكدوا من صفاتك اللي هتسهل أو تصعب عليهم الشغل، عشان زي ما انت بيكون فارق معاك تقرأ فيدباك الفريلانسرز على أكونت العميل عشان تتعرف عليه، هو كمان فارق معاه الفيدباك بتاعك عشان يتعرف عليك.

وللاسف بعض العملاء بيكسلوا يكتبوا الفيدباك ده، أو بيمروا عليه مرور الكرام بعد الوظيفة، فانت هتحتاج تفكرهم بيه ولو مش عارف طريقة مناسبة فانا هقولك.

بعد ما تخلص المشروع بتاعك انت والعميل هتدخل تبعتله ماسج كده مضمونها إن الفيدباك ده مهم ليك شخصياً مش بس عشان الشغل، فهتقوله إنك مستنيه يكتبلك فيدباك لإنك بتحب ترجع كل شوية للتقييمات دي وتفتكر شغلك مع العميل وقتها، وبتحب كل فترة تكلمه تاني وتسأله لو تقدر تساعده بأي شيء في المستقبل وهكذا.

بالطريقة دي العميل هيحس إنك لطيف وهيبقى متحمس يعملك الفيد باك بتاعك عشان تبقى تفتكره وهيكتبلك كلام حلو في الآخر، فمتتكسفش تطلب من العميل الفيدباك بتاعك وجرب الطريقة دي.

زي ما قولتلك في البداية النصائح دي مهمة جدا، وأكيد بعد ما قرأت المقال لقيت إن في نصيحتين أو تلاتة جداد عليك وانت حاسس إنك لو طبقتهم هيفرقوا معاك جدا.

فانصحك تبدأ من دلوقتي تطبق نصيحة نصيحة منهم على حدا، وبعد فترة معينة ابدأ ادخل في النصيحة اللي بعدها عشان فعلا تستفيد منهم أكبر استفادة ومتشتتش نفسك، وانتظر المقال القادم بنصائح وخبايا أكتر في موقع أبوورك.